ភ្នំពេញៈ ក្រុមហ៊ុនម៉ូនូមែនប៊ុក (Monument Books) ឧបត្ថម្ភសៀវភៅភាសាអង់គ្លេសចំនួន ១៧ ៥០០ ក្បាលដល់ក្រសួងអប់រំ យុវជន និងកីឡា សម្រាប់សិស្សានុសិស្សកម្រិតបឋមសិក្សា និងមធ្យមសិក្សារៀនសូត្រ និងជួយសាលាដែលខ្វះខាត និងមានតម្រូវការសៀវភៅភាសាអង់គ្លេស។
ពិធីប្រគល់-ទទួលសៀវភៅភាសាអង់គ្លេស ១៧ ៥០០ ក្បាលពីក្រុមហ៊ុនម៉ូនូមែនប៊ុក ធ្វើឡើងក្រោមអធិបតីភាព លោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា និងលោក ម៉េង ហៀង អគ្គនាយកក្រុមហ៊ុនម៉ូនូមែនប៊ុកនាថ្ងៃទី ១៨ មេសានៅក្រសួងអប់រំ។
លោក ហង់ជួន ណារ៉ុន បានថ្លែង អំណរគុណដល់ក្រុមហ៊ុនម៉ូនូមែនប៊ុក ដែលបានឧបត្ថម្ភសៀវនេះ និងរួមចំណែកជាមួយក្រសួងអប់រំក្នុងការជួយសាលាដែលខ្វះខាត និងត្រូវការសៀវភៅភាសាអង់គ្លេស។
លោកថ្លែងថា៖ «សៀវភៅភាសាអង់គ្លេសទាំងនេះនឹងចែកជូននៅតាមសាលារៀនក្នុងស្រុកកងមាស សាលារៀនជំនាន់ថ្មីក្នុងវិទ្យាល័យស៊ីសុវត្ថិ និងសាលារៀនមួយចំនួន តាមរាជធានី-ខេត្ត ដើម្បីចែកឱ្យសិស្សានុសិស្សសិក្សារៀនសូត្រ និង បំប៉នភាសាបរទេសរបស់ពួកគេ»។
លោក ម៉េង ហៀង ថ្លែងថា កម្ពុជាក៏ដូចជាសកលលោកបានរងនូវវិបត្តិធ្ងន់ធ្ងរបណ្តាលមកពីជំងឺរាតត្បាតកូវីដ ១៩។ វិបត្តិនេះធ្វើឱ្យសាលារៀនមិនអាចបើកទ្វារទទួលសិស្សចូលរៀនជាប្រក្រតី។ សិស្ស និស្សិតភាគច្រើនបានទទួលសេវាបង្រៀន និងរៀនតាម Online។
លោកថ្លែងថា៖ «ក្នុងឆ្នាំ ២០២១ អំឡុងវិបត្តិកូវីដ ១៩ ខ្ញុំបាទបានបរិច្ចាគសៀវភៅសិក្សាភាសាអង់គ្លេសជាង ១៨ ០០០ ក្បាលជូនដល់សាលារៀននៅស្រុកសូទ្រនិគម ខេត្តសៀមរាប ស្រុកកោះសូទិន និងស្រុកស្រីសន្ធរ ខេត្តកំពង់ចាម ព្រមទាំងបណ្តាអង្គការមួយចំនួន ដូចជា World Vision Cambodia Children’s Fund និងស្ថានទូតអូស្ត្រាលីជាដើម»។
លោកថា៖ «ខ្ញុំបាទសូមបន្តបរិច្ចាគសៀវភៅសិក្សាភាសាអង់គ្លេសចំនួន ១៧ ៦៧៣ ក្បាលគិតជាទឹកប្រាក់ប្រមាណ ១០០ ០០០ ដុល្លារអាមេរិក ដើម្បីចូលរួមចំណែកជាមួយក្រសួងអប់រំ យុវជន និងកីឡា»៕