The Phnom Penh Post Search

Search form




Logo of Phnom Penh Post newspaper Phnom Penh Post - ប្រជាសហគមន៍​នេសាទ​បារម្ភ​ពី​ការបាត់បង់​ពូជ​ត្រី​ ខណៈ​ត្រី​នៅ​ទន្លេសេសាន​ងាប់​រាប់រយ​គីឡូ

ប្រជាសហគមន៍​នេសាទ​បារម្ភ​ពី​ការបាត់បង់​ពូជ​ត្រី​ ខណៈ​ត្រី​នៅ​ទន្លេសេសាន​ងាប់​រាប់រយ​គីឡូ

Content image - Phnom Penh Post
ត្រី​ងាប់​នៅ​ទន្លេសេសាន​ក្នុង​ភូមិ​ស្រែស្រណុក ឃុំ​ក្បាលរមាស ស្រុក​សេសាន​។ រូបថត ហ្វេសប៊ុក

ប្រជាសហគមន៍​នេសាទ​បារម្ភ​ពី​ការបាត់បង់​ពូជ​ត្រី​ ខណៈ​ត្រី​នៅ​ទន្លេសេសាន​ងាប់​រាប់រយ​គីឡូ

ស្ទឹងត្រែងៈ ប្រជាសហគមន៍​នេសាទ និង​ប្រជាពលរដ្ឋ​នៅក្នុង​ភូមិ​ស្រែស្រណុក ឃុំ​ក្បាលរមាស ស្រុក​សេសាន បាន​សម្តែង​ការព្រួយបារម្ភ​ជាខ្លាំង ចំពោះ​ការបាត់បង់​ពូជ​ត្រី ខណៈ​ឃើញ​ត្រី​រាប់រយ​គីឡូ​បាន​ងាប់​អណ្តែត​ទឹក​ព្រោងព្រាត​ក្នុង​ទន្លេសេសាន​ជាច្រើន​ថ្ងៃ​មកហើយ ប៉ុន្តែ​មិនឃើញ​មាន​មន្ត្រី​ជំនាញ​ចុះទៅពិនិត្យ​ស្រាវជ្រាវ​ឱ្យដឹងពី​មូលហេតុ​នៅឡើយ​។

លោក ស៊ិន សុវណ្ណារ៉ា ប្រធាន​សហគមន៍​នេសាទ​ស្រែ​ស្រណុក​សាមគ្គី​ថ្លែង​នៅ​ថ្ងៃទី​ ១៨ ខែមេសា​ថា មាន​ត្រី​ចម្រុះ​ប្រភេទ​ជាច្រើន​ក្បាល ក្នុងនោះ​មាន​ភាគច្រើន​ជា​ត្រី​ទីឡាព្យ៉ា​បាន​ងាប់​ជា​បន្តបន្ទាប់​ព្រោងព្រាត ក្នុង​ទន្លេសេសាន​នៅក្នុង​ភូមិ​ស្រែស្រណុក ឃុំ​ក្បាលរមាស​។ លោក​ថា មុនពេល​មាន​ត្រី​ងាប់​បែបនេះ គឺមាន​ប្រជាពលរដ្ឋ​មួយចំនួន​ជា​ខ្មែ​អ៊ិស្លាម​បាននាំគ្នា​ទៅ​ដាក់មង​ទំហំ​ ១០០​ ម៉ែត្រការ៉េ ហើយ​បាននាំគ្នា​ធ្វើ​សកម្មភាព​នៅក្នុង​បរិវេណ​ដែល​បានដាក់​មង​នោះ ក្រោយមក​ទើប​ឃើញ​ត្រី​ងាប់​អណ្តែត​ទឹក​យ៉ាងច្រើន​។

លោក​បាន​ថ្លែងថា​៖ «​មិនដឹងថា ជា​គេ​ធ្វើ​រូបភាព​យ៉ាងណា​ទេ យើង​អត់​ដឹង ប៉ុន្តែ​ឃើញថា បងប្អូន​អ៊ិស្លាម​ហ្នឹង​គាត់​រាយ​មង​ប្រហែល​ ១០០ ​ម៉ែត្រ​ ៤​ ជ្រុង រួច​គាត់​ធ្វើ​សកម្មភាព​នៅក្នុង​ហ្នឹង ព្រោង​ប្រាវៗ​ទៅ ក្រោយមក​ឃើញ​ត្រី​ងាប់​ព្រោងព្រាត​អ៊ីចឹង​តែម្តង​» ។

លោក​បន្តថា ត្រី​ងាប់​ក្នុង​ទន្លេ​នេះ​បាន​កើតឡើង​រយៈពេល​ជាង​ ១​ សប្តាហ៍​មកហើយ​។ ពេល​ឃើញ​ត្រី​ងាប់​បែប​នោះ ប្រជាសហគមន៍​នេសាទ និង​ប្រជាពលរដ្ឋ​ក្នុងភូមិ​បាន​រើសយក​ត្រី​ដែល​ងាប់​នោះ​មួយចំនួន​ទៅ​ធ្វើ​ម្ហូប​ដើម្បី​ទទួលទាន ប៉ុន្តែ​យ៉ាងណា​ក៏ដោយ​រហូតមកដល់​ថ្ងៃទី​ ១៨ ខែមេសា មិនមាន​ប្រជាពលរដ្ឋ​ណា​ម្នាក់​មាន​បញ្ហា​សុខភាព​ដោយ​ប្រការ​ណាមួយ​ឡើយ​។

លោក​ ស៊ិន សុវណ្ណារ៉ា បញ្ជាក់ថា ក្រោយ​ឃើញ​មាន​ត្រី​ងាប់​ក្នុង​ទន្លេ​លោក​បាន​រាយការណ៍​ទៅ​មន្ត្រី​ជំនាញ ប៉ុន្តែ​មិនទាន់​ឃើញ​មាន​មន្ត្រី​ចុះមក​ពិនិត្យ​ធ្វើការ​ស្រាវជ្រាវ​នៅឡើយ​។ ដោយឡែក​ចំនួន​ត្រី​ដែល​ងាប់​នោះ​គឺ​មិនអាច​ប៉ាន់ប្រមាណ​បាន​ថា មាន​ចំនួន​ប៉ុន្មាន​ឱ្យ​ប្រាកដ​នោះឡើយ​ ប៉ុន្តែ​បើ​គិតតែ​ពី​ចំនួន​ដែល​ប្រជាសហគមន៍​ជិះទូក​រើស​ត្រី​យកបាន​នោះ​មិន​ក្រោម ៣០០ គីឡូក្រាម​នោះទេ​។

Content image - Phnom Penh Post
ត្រី​នៅ​ទន្លេសេសាន​ត្រូវបាន​ប្រទះឃើញ​ងាប់​។ រូបថត ហ្វេសប៊ុក

លោក​ថ្លែងថា​៖ «​ត្រី​ដែល​ងាប់​នោះ​គឺមាន​ចម្រុះ​ ប៉ុន្តែ​ភាគច្រើន​ត្រី​ទីឡាព្យ៉ា គេ​បាន​រើសយក​ត្រី​ណា​ដែល​ល្អៗ​ធំៗ ចំណែក​ត្រី​ដែល​ទំងន់​ប្រហែល​ ១ ​ខាំ ២​ ខាំ ហ្នឹង​គេ​ចោល​ឱ្យ​អណ្តែត​ស្អុយ​ពេញ​ទឹក​ហ្នឹង​ទៅ​។ ខ្ញុំ​សូម​សំណូមពរ​ឱ្យ​មន្ត្រី​ជំនាញ​គាត់​ចុះជួយ​សិក្សា​ និង​ស្រាវជ្រាវ​ឱ្យបាន​ម៉ឺងម៉ាត់​ជាទីបំផុត​ផង​» ។

លោក មន សុខម៉េង ប្រជាពលរដ្ឋ​នៅ​ភូមិ​ស្រែស្រណុក ថ្លែង​នៅ​ថ្ងៃទី​ ១៨ ខែមេសា ថា លោក​បានឃើញ​ត្រី​ងាប់​អណ្តែត​ក្នុង​ទឹក​ទន្លេសេសាន នៅពេលដែល​លោក​ទៅ​ស្ទួច​ត្រី​។ ពលរដ្ឋ​ក្នុងភូមិ​បាន​រើស​ត្រី​ដែល​ងាប់​នោះ យកទៅ​ធ្វើ​ប្រហុក​ទុក ខ្លះ​ប្រឡាក់​ទុក និង​ខ្លះទៀត​ធ្វើ​ម្ហូប​ផ្សេងៗ​បរិភោគ​។ មកដល់​ថ្ងៃទី ១៨ ខែមេសា ត្រី​នៅតែមាន​បន្ត​ងាប់​ដោយ​មិនដឹង​ពី​មូលហេតុ​ធ្វើឱ្យ​ប្រជាពលរដ្ឋ​មាន​ការព្រួយបារម្ភ​ចំពោះ​ការបាត់បង់​ត្រី​ពី​ក្នុង​ទន្លេ​។ លោក​ថ្លែងថា​៖ «​អ្នកស្រុក​ភ័យ​បារម្ភ ទី​ ១ ខ្លាច​គេ​ឆក់​គេ​អី​ច្រើន​ហើយ​ទី​ ២​ ខ្លាច​គេ​ដាក់​ថ្នាំ អ៊ីចឹង​វា​អស់​ផុត​ពូជត្រី​ធំៗ​» ។ លោក មន សុខម៉េង ប្រាប់ថា ប្រជាពលរដ្ឋ​ទៅ​រើស​ត្រី​ពី​ក្នុង​ទឹកទន្លេ​បាន​យ៉ាងច្រើន​ក្នុង​ ១​ ទូកៗ​យ៉ាងហោចណាស់​រើស​បាន​ត្រី​ពី ៥០ ទៅ ៦០​ គីឡូក្រាម ហើយ​ត្រី​ដែល​ពលរដ្ឋ​រើសយក​នោះ​ភាគច្រើន​ជា​ត្រីធំៗ​មាន​ទម្ងន់​ពី ១ ​គីឡូ ទៅ ​២ ​គីឡូក្រាម​។

លោកស្រី សមវិចិត្រ នាយខណ្ឌ​រដ្ឋបាល​ជលផល ខេត្តស្ទឹងត្រែង ថ្លែង​នៅ​ថ្ងៃទី​ ១៨ ខែមេសា​ថា មាន​ករណី​ត្រី​ងាប់​ក្នុង​ទឹក​ទន្លេសេសាន ប៉ុន្តែ​ព័ត៌មាន​ដែល​លោក​ទទួលបាន គឺ​ងាប់​តាំងពីដើម​ខែមេសា ហើយ​ត្រី​ទាំងនោះ​មាន​ចំនួន​តិចតួច​ប៉ុណ្ណោះ​។ មូលហេតុ​ដែល​បណ្តាលឱ្យ​ត្រី​ងាប់​នេះ គឺ​មិនទាន់​បានដឹង​ច្បាស់​នៅឡើយ​ទេ ព្រោះ​លោក​មិនបាន​បញ្ជូន​ត្រី​ទាំងនោះ​ទៅពិនិត្យ​នៅ​មន្ទីរពិសោធន៍​។ ប៉ុន្តែ​តាម​ការសន្និដ្ឋាន​ដំបូង ត្រី​ទីឡាប់ព្យ៉ា​ងាប់​ក្នុង​ទឹកទន្លេ​សេសាន​នេះ មិនមែន​កើតឡើង​ពី​ការ​ឆក់ ឬ​បំពុល​នោះឡើយ ព្រោះ​បើ​មានការ​ឆក់ បំពុល មិនអាច​មានតែ​ត្រី​ ១ ​ប្រភេទ​ងាប់​នោះទេ ។

លោក​ថ្លែងថា​៖ «​សន្និដ្ឋាន​ដំបូង​ប្រហែលជា​ទាក់ទង​នឹង​បញ្ហា​លក្ខណៈ​ជីវសាស្ត្រ​របស់​ត្រី​ទីឡាប់ព្យ៉ា វា​អត់​សមស្រប​នៅ​កន្លែង​ហ្នឹង​បាន​អាចធ្វើឱ្យ​ពពួក​ត្រី​ហ្នឹង​ងាប់​។ កន្លែង​ដែល​វា​ពុល​ងាប់​ហ្នឹង វា​អាចមាន​លក្ខខណ្ឌ​មិន​សមប្រកប​សម្រាប់​ត្រី​ពពួក​ហ្នឹង​នៅបាន អ៊ីចឹង​ធ្វើឱ្យ​ពួកវា​ងាប់​» ។

លោកស្រី សមវិចិត្រ បញ្ជាក់ថា លោក​បាន​ប្រាប់​ទៅ​ប្រជាសហគមន៍​នេសាទ​ឱ្យជួយ​ធ្វើការ​តាមដាន​ ដើម្បី​ដឹង​ពី​ស្ថានភាព​ព័ត៌មាន​ច្បាស់លាស់ និង​ងាយស្រួល​ដល់​មន្ត្រី​ជំនាញ​ដាក់ចេញ​នូវ​វិធានការ ដើម្បី​សង្គ្រោះ​ត្រី​កុំឱ្យ​ងាប់​ទៀត​។ លោក​ថា មន្ត្រី​ជំនាញ​ធ្វើការងារ​ដោយ​ពឹង​លើ​លក្ខណៈ​ជីវសាស្ត្រ បើតាម​ការសន្និដ្ឋាន​របស់​ប្រជាពលរដ្ឋ គឺ​មិន​ច្បាស់លាស់​ឡើយ​ព្រោះ​នោះ​គ្រាន់​តែ​ជា​ដំណឹង​បឋម​ប៉ុណ្ណោះ​។ ដំណឹង​ដែល​ពលរដ្ឋ​បាន​រាយការណ៍​នោះ គឺ​ដឹង​តៗ​គ្នា មិនមាន​ភ័ស្តុតាង​ច្បាស់លាស់​បន្ថែម​ឡើយ​។

លោក​បាន​បញ្ជាក់ថា​៖ «​ព័ត៌មាន​ដែល​ខ្ញុំ​ទទួលបាន​តាមរយៈ​ការរាយការណ៍​របស់​ប្រជាសហគមន៍ គឺ​មានតែ​ត្រី​ទីឡាប់ព្យ៉ា​ទេ រូបថត​ក៏មាន​តែ​ទីឡាប់ព្យ៉ា​សុទ្ធ​ដែរ អ៊ីចឹង​ព័ត៌មាន​ហ្នឹង​អត់​ទាន់​ច្បាស់​ទាំងអស់​។ ខ្ញុំ​បានឱ្យ​ពួកគាត់​នៅ​ទីនោះ​ជួយ​តាមដាន​មើល​ឱ្យ​ច្បាស់​ ដើម្បី​ស្រួល​ពួកខ្ញុំ​ពិនិត្យមើល និង​សន្និដ្ឋាន​ ឬក៏​ចុះ​ទៅយក​សំណាក​»៕

វីដេអូ៖

អត្ថបទគួរចាប់អារម្មណ៍