ព្រះសីហនុៈ អាជ្ញាធរខេត្ដមួយចំនួនបញ្ជាក់ថា ភ្ញៀវទេសចរទៅលេងកម្សាន្តនៅតាមរមណីយដ្ឋាននានា ក្នុងឱកាសនៃពិធីបុណ្យចូលឆ្នាំប្រពៃណីជាតិខ្មែររយៈពេល ៣ ថ្ងៃ (ថ្ងៃទី ១៤-១៦ ខែមេសាឆ្នាំនេះ) ភាគច្រើន មានឥរិយាបថចេះវេចខ្ចប់ទុកដាក់សំរាមបានល្អប្រសើរជាងឆ្នាំមុនៗ ខណៈនៅទូទាំងប្រទេសមានទេសចរជិត ៤,៦ លាននាក់បានដើរលេងកម្សាន្ត។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុ ថ្លែងប្រាប់ភ្នំពេញប៉ុស្ដិ៍នាថ្ងៃទី ១៧ មេសាថា ភ្ញៀវទេសចរដែលបានចូលមកកម្សាន្តក្នុងឱកាសចូលឆ្នាំប្រពៃណីជាតិខ្មែររយៈពេល ៣ ថ្ងៃ នៅខេត្តព្រះសីហនុមានចំនួនសរុបប្រមាណ ២៣២ ២៦៤ នាក់ (ភ្ញៀវទេសចរផ្ទៃក្នុងប្រមាណ ៥០%) ក្នុងនោះមានភ្ញៀវជាតិចំនួន ២១៨ ៨៥៣ នាក់ និងភ្ញៀវបរទេសចំនួន ១៣ ៤១១ នាក់។
លោកថ្លែងថា៖ «អំឡុងពេលបុណ្យចូលឆ្នាំថ្មីប្រពៃណីជាតិខ្មែរនេះឃើញថា បងប្អូនប្រជាពលរដ្ឋមួយចំនួនធំបានចូលរួមក្នុងការទុកដាក់សំរាមបានល្អ ប៉ុន្ដែក៏នៅមានមួយចំនួនតូច អត់ទាន់បានសហការចូលរួមក្នុងការវេចខ្ចប់បានល្អប្រសើរដែរ»។ លោកបន្តថា៖ «ដើម្បីឱ្យទីក្រុងយើងស្អាត បរិស្ថានល្អ អនាម័យល្អ គឺទាមទារឱ្យបងប្អូនប្រជាពលរដ្ឋចូលរួមសម្អាតជាប្រចាំ ហើយការវេចខ្ចប់ ទុកដាក់សំរាម គឺត្រូវវេចខ្ចប់ទុកដាក់ឱ្យបានត្រឹមត្រូវឬក៏ដាក់ចូលទៅក្នុងធុងសំរាម»។
លោក ហេង ប៉េងហាក់ តំណាងក្រុមហ៊ុនប្រមូលសំរាម KSWM នៅខេត្ដព្រះសីហនុ បានឱ្យដឹងថា ឆ្នាំនេះប្រជាពលរដ្ឋមកលេងកម្សាន្តនៅតាមតំបន់រមណីយដ្ឋានឆ្នេរសមុទ្រនានាក្នុងខេត្ដព្រះសីហនុបានរៀបចំទុកដាក់សំរាមបានត្រឹមត្រូវប្រសើរជាងមុន ដោយពួកគាត់ចេះវេចខ្ចប់ ច្រកសំរាមក្នុងថង់នឹងយកទៅដាក់នៅតាមគល់ឈើ ឬធុងសំរាម ក្រោយពេលលេងកម្សាន្តរួច។
លោកប្រាប់ថា៖ «វាល្អជាងមុន ពួកគាត់មានការវេចខ្ចប់ យើងគ្រាន់តែប្រមូលពីឆ្នេរមក ដោយមិនសូវបោសសម្អាត ព្រោះសំរាមបានវេចខ្ចប់ជាកញ្ចប់ៗ។ កម្មករយើងគ្រាន់តែប្រមូលមករួចរាល់ វាមានភាពងាយស្រួលខុសពីមុន។ កាលពីមុន បើយើងមិនយកអំបោសទៅបោស ឬរនាស់ជ័រទៅកាយសំរាមទេ សំរាមគឺរាយបាយពាសពេញតែម្ដង»។
លោកបន្តថា៖ «យើងក៏សង្កេតឃើញថា ឥឡូវនេះ ការហូបចុករបស់ពួកគាត់មកលេងកម្សាន្ត ក៏មិនសូវប្រើប្រាស់ថង់ប្លាស្ទិក ឬប្រអប់ស្នោដូចពេលមុនៗដែរ គឺមានប្រើតិចតួចប៉ុណ្ណោះ»។
លោក ប៉េងហាក់ បានឱ្យដឹងថា ការមានសណ្ដាប់ធ្នាប់រក្សាអនាម័យល្អ ចេះវេចខ្ចប់សំរាមពីសំណាក់ប្រជាពលរដ្ឋពេលមកលេងកម្សាន្តក្នុងខេត្ដព្រះសីហនុពេលពិធីបុណ្យនេះក៏ដោយសារមានការចុះអប់រំផ្សព្វផ្សាយពីមន្ដ្រីជំនាញនានារបស់រដ្ឋបាលខេត្ដព្រះសីហនុទៅដល់ប្រជាពលរដ្ឋមុនពេលពិធីបុណ្យ ឬក្នុងពេលពិធីបុណ្យតែម្ដង។
លោកថា៖ «និយាយទៅមន្ដ្រីចម្រុះរបស់រដ្ឋបាលក្រុង និងក្រុមការងារក្រុមហ៊ុន ប្រមូលសំរាមយើងបានចុះទៅណែនាំដោយផ្ទាល់ដល់ប្រជាពលរដ្ឋឱ្យទុកដាក់សំរាមឱ្យបានត្រឹមត្រូវ អ៊ីចឹងយើងឃើញមានរបៀបវាអត់ដូចមុន»។
លោក រស់ ឧត្ដង្គ អ្នកនាំពាក្យរដ្ឋបាលខេត្ដកែបបានឱ្យដឹងថា ពិធីបុណ្យចូលឆ្នាំប្រពៃណីជាតិរយៈពេល ៣ ថ្ងៃឆ្នាំនេះ ភ្ញៀវទេសចរបានមកលេងកម្សាន្តតាមរមណីយដ្ឋាន និងឆ្នេរសមុទ្រក្នុងខេត្ដកែបមានចំនួនសរុប ១២៣ ៧១៤ នាក់ ក្នុងនោះភ្ញៀវជាតិជាង ១២ ម៉ឺននាក់ និងភ្ញៀវអន្តរជាតិជាង ១ ពាន់នាក់។
លោកថ្លែងថា៖ «ភ្ញៀវទេសចរមកលេងកម្សាន្តឆ្នាំនេះ បើយើងសង្កេតមើល ជាទូទៅមានឥរិយាបថប្រសើរជាងឆ្នាំមុនៗ ក្នុងការទុកដាក់សំរាមរបស់ពួកគាត់។ ចំណែកសណ្ដាប់ធ្នាប់ផ្សេងៗក៏មិនមានបញ្ហាអ្វីកើតឡើងដែរ»។ លោកឱ្យដឹងថា ទាក់ទងនឹងការផ្សព្វផ្សាយលើការទុកដាក់សំរាមថែរក្សាបរិស្ថាននេះ រដ្ឋបាលខេត្ដកែប ជាទូទៅរាល់ពិធីបុណ្យជាតិម្ដងៗ គឺរដ្ឋបាលខេត្ដ តែងតែសហការជាមួយសមត្ថកិច្ចពាក់ព័ន្ធចម្រុះ ដើម្បីណែនាំដល់អាជីវករ និងប្រជាពលរដ្ឋនៅតាមទីរមណីយដ្ឋាននានា។
លោក លីវ សុខុន អ្នកនាំពាក្យរដ្ឋបាលខេត្តសៀមរាបបានឱ្យដឹងថា ក្នុងរយ:ពេល ៣ ថ្ងៃ នៃពិធីបុណ្យចូលឆ្នាំខ្មែរ ចំនួនភ្ញៀវទេសចរជាតិ និងអន្ដរជាតិ សរុបប្រមាណជា ៤០០ ៥៩១ នាក់ ក្នុងនោះភ្ញៀវទេសចរជាតិមានចំនួនប្រមាណ ៣៩៧ ០០០ នាក់ ក្នុងនោះមានភ្ញៀវទេសចរមកពីខេត្តនានា ៤៥-៥០% និង ភ្ញៀវទេសចរបរទេសផ្ទៃក្នុង ចំនួន ៣ ៥៩១ នាក់ បានមកកម្សាន្តជាលក្ខណៈគ្រួសារតាមរមណីយដ្ឋាននានាក្នុងខេត្ដសៀមរាប។
លោកបានថ្លែងថា៖ «ខ្ញុំពិនិត្យមើលទៅឃើញថា ប្រជាពលរដ្ឋមានការយល់ដឹងច្រើន តាមរយៈការផ្សព្វផ្សាយការអប់រំ ពីសំណាក់ស្ថាប័នពាក់ព័ន្ធ និងអាជ្ញាធរក្រុង ស្រុក ពិសេសក្នុងពេលពិធីបុណ្យនេះតែម្ដង ដែលបានផ្សព្វផ្សាយទៅដល់ប្រជាពលរដ្ឋគ្រប់ទីកន្លែង។ យើងឃើញពួកគាត់មានការវេចខ្ចប់ទុកដាក់សំរាម និងថែរក្សាបរិស្ថានបានល្អប្រសើរច្រើន»។
បើតាមលោក ថោង ខុន រដ្ឋមន្ត្រីក្រសួងទេសចរណ៍បានបញ្ជាក់ថា នាឱកាសពិធីបុណ្យចូលឆ្នាំប្រពៃណីជាតិខ្មែររយៈពេល ៣ ថ្ងៃចាប់ពីថ្ងៃទី ១៤-១៦ ខែមេសា នៅទូទាំងប្រទេសទទួលបានភ្ញៀវទេសចរសរុបចំនួន ៤ ៥៩០ ៣២៦ នាក់ ក្នុងនោះភ្ញៀវជាតិ ៤ ៥៦១ ៤៧៧ នាក់ និងភ្ញៀវបរទេសផ្ទៃក្នុង ២៨ ៨៤៩ នាក់។
លោកថ្លែងថា៖ «មន្ទីរទេសចរណ៍សហការជាមួយមន្ទីរជំនាញនៃរដ្ឋបាលរាជធានីខេត្តបានចាត់តាំងក្រុមការងារចុះប្រចាំការនៅតាមគោលដៅទេសចរណ៍សំខាន់ៗ ដើម្បីគ្រប់គ្រងចរន្តភ្ញៀវ ការពង្រឹងការអនុវត្តវិធានសុវត្ថិភាព និង SOP ក្នុងការទប់ស្កាត់ការរាលដាលជំងឺកូវីដ ១៩ និងបញ្ចៀសការលក់ឡើងថ្លៃហួសហេតុ និងបញ្ហាបរិស្ថានអនាម័យជាដើម ដែលក្នុងរយៈពេល ៣ ថ្ងៃនេះ ហាក់មិនមានបាតុភាពធំដុំណាមួយកើតឡើងទេ»៕