បន្ទាយមានជ័យៈ មន្ត្រីអាជ្ញាធរមូលដ្ឋានបាននិយាយថា មានផ្ទះប្រជាពលរដ្ឋចំនួន ៨២ ខ្នងនៅក្នុងឃុំចំនួន ៤ នៃស្រុកស្វាយចេក ខេត្តបន្ទាយមានជ័យបានរងការខូចខាតយ៉ាងដំណំ ដោយសារគ្រោះធម្មជាតិភ្លៀងលាយឡំខ្យល់កន្ត្រាក់បក់បោកខ្លាំង កាលពីល្ងាចថ្ងៃទី ១៧ ខែមេសា។ ទោះយ៉ាងណាគ្មានពលរដ្ឋណាម្នាក់រងរបួស ឬស្លាប់នៅក្នុងហេតុការណ៍នេះឡើយ។
លោក លឿង សុភ័ក្ត អភិបាលស្រុកស្វាយចេកបានប្រាប់ភ្នំពេញប៉ុស្តិ៍នៅព្រឹកថ្ងៃទី ១៨ ខែមេសាថា នៅពេលនេះ លោកកំពុងដឹកនាំកម្លាំងបញ្ជាការឯកភាពស្រុកស្វាយចេកប្រមាណជិត ១០០ នាក់ ចុះជួយអន្តរាគមន៍ជួសជុលផ្ទះឡើងវិញជូនប្រជាពលរដ្ឋរងគ្រោះនៅក្នុងឃុំទ្រាស ដែលទទួលរងការខូចខាតធ្ងន់ធ្ងរខ្លាំងជាងគេ។
លោកបានថ្លែងថា៖ «នៅព្រឹកនេះក្រុមការងារយើងបានជួយប្រមូលឈើ និងកំណាត់ស័ង្កសីដែលខូចខាតសរុបចំនួន ៩៧៨ ស្លឹក ទុកដាក់ឱ្យមានសណ្ដាប់ធ្នាប់ និងបាននាំយកស័ង្កសីថ្មីចំនួន ១ ០០០សន្លឹកមកជួសជុលផ្ទះជូនគ្រួសារពលរដ្ឋរងគ្រោះ ដើម្បីឱ្យពួកគាត់មានទីជម្រកសុវត្ថិភាពឡើងវិញ»។
បើតាមលោក សុភ័ក្ត ភ្លៀងលាយឡំជាមួយនឹងខ្យល់កន្ត្រាក់កាលពីល្ងាចថ្ងៃទី ១៧ ខែមេសានោះ បានបង្កការខូចខាតផ្ទះប្រជាពលរដ្ឋសរុបចំនួន ៨២ ខ្នង ក្នុងនោះ នៅក្នុងឃុំទ្រាស ៧៤ ខ្នង,ឃុំតាផូ ៣ ខ្នង,ឃុំសារង្គ ៣ ខ្នង និងឃុំរលួស ២ ខ្នង។ ទោះយ៉ាងណា គ្មានពលរដ្ឋណាម្នាក់រងគ្រោះនៅក្នុងហេតុការណ៍នេះទេ។
ចំណែកលោក ជា ស្លូញ អធិការស្រុកស្វាយចេកបានប្រាប់ភ្នំពេញប៉ុស្តិ៍ថា គិតត្រឹមម៉ោង ១១:៣០ នាទីព្រឹកថ្ងៃទី ១៨ ខែមេសា កម្លាំងបញ្ជាការឯកភាពស្រុកស្វាយចេកបានជួយជួសជុលផ្ទះឡើងវិញជូនគ្រួសារពលរដ្ឋរងគ្រោះដោយខ្យល់កន្ត្រាក់បានចំនួន ១៥ ខ្នងហើយ។ បើផ្អែកតាមកម្លាំង និងល្បឿនការងារ លោករំពឹងថានៅល្ងាចនេះ (ថ្ងៃទី ១៨ មេសា) ក្រុមកម្លាំងអន្តរាគមន៍នៃបញ្ជាការឯកភាពស្រុកស្វាយចេកអាចនឹងជួសជុលបាន ៣០ ខ្នងបន្ថែមទៀត។
លោកបានបញ្ជាក់ថា៖ «ទោះមិនហើយនៅថ្ងៃនេះ ថ្ងៃស្អែកកម្លាំងរបស់យើងនឹងមកជួយជួលជុលផ្ទះជូនគ្រួសាររងគ្រោះជាបន្តទៀត ដោយមិនប្រកាន់និន្នាការនយោបាយបក្សណាឡើយ»៕