សៀមរាប/កំពង់ធំៈ ក្រុមសមត្ថកិច្ចចម្រុះថ្នាក់ជាតិ និងថ្នាក់ខេត្តជុំវិញបឹងទន្លេសាបបានបន្តធ្វើការបង្ក្រាបបទល្មើសនេសាទ ដែលនៅតែបន្តកើតមាន ដោយបានធ្វើការរុះរើ និងរឹបអូសវត្ថុតាងផ្សេងៗក្នុងនោះមានសាច់អួនប្រវែងរាប់ពាន់ម៉ែត្រ និងបានធ្វើការអប់រំណែនាំប្រជានេសាទចំនួន ២៦ នាក់ ដែលបានចូលទៅកាវលៀសនៅក្នុងតំបន់អភិរក្ស។
កម្លាំងអន្តរាគមន៍នៃគណៈកម្មាធិការបង្ក្រាបបទល្មើសជលផលថ្នាក់ជាតិ ដែលប្រចាំការនៅស្នាក់ការស្រាលក្នុងតំបន់កំពង់ភ្លុក ខេត្តសៀមរាប កាលពីថ្ងៃទី ១៨ ខែមេសាបានចុះល្បាតស្រាវជ្រាវ និងបង្ក្រាបបទល្មើសនេសាទនៅក្នុងភូមិសាស្ត្រ ឃុំកំពង់ឃ្លាំង ស្រុកសូទ្រនិគមបានប្រទះឃើញបទល្មើសនេសាទធំមួយ [ឆ្នុក និងហ៊ុមសម្រាស់ចាប់ត្រី] នៅចំណុចយាមកាមលេខ (៣៩៦៧៨២-១៤៥២៤-៨៨) ស្ថិតក្នុងភូមិតាទូ សង្ស័យក្រុមជនប្រព្រឹត្តបទល្មើសបានលួចឆ្មក់ធ្វើសកម្មភាពបទល្មើសកាលពីអំឡុងថ្ងៃបុណ្យចូលឆ្នាំខ្មែរ។
បើតាមមន្ត្រីនៃអធិការដ្ឋានរដ្ឋបាលជលផលខាងជើងបឹងទន្លេសាប ដែលបានចូលរួមនៅក្នុងប្រតិបត្តិការនោះបានប្រាប់ភ្នំពេញប៉ុស្តិ៍ថា ក្រុមសមត្ថកិច្ចចម្រុះថ្នាក់ជាតិបានរុះរើ និងរឹបអូសវត្ថុតាងនៃបទល្មើសជាច្រើន រួមមានរបាំងសាច់អួនប្រវែង ៣ ៤០០ ម៉ែត្រ ឧបករណ៍លូសាច់អួន ចំនួន ៤ មាត់បង្គោលចម្រឹងចំនួន ២ ៧០០ ដើម និងបានដោះលែងត្រីចម្រុះប្រភេទចូលទៅក្នុងបឹងធម្មជាតិវិញចំនួន ៣០ គីឡូក្រាម។
មន្ត្រីដែលបដិសេធប្រាប់ឈ្មោះរូបនោះបាននិយាយថា តាមទំហំនៃឧបករណ៍ និងសម្ភារនេសាទ ដែលត្រូវបានរឹបអូសនោះ គឺក្រុមជនល្មើសអាចនឹងចំណាយដើមទុនមិនក្រោមពី ១ ម៉ឺនដុល្លារនោះទេ ហើយថា ប្រជានេសាទក្រីក្រមិនមានលទ្ធភាពធ្វើបែបនោះឡើយ។
ចំណែកលោក ប៉ែន វណ្ណារិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានប្រាប់ភ្នំពេញប៉ុស្តិ៍ថា ក្នុងរយៈពេល ២ ថ្ងៃជាប់គ្នាកន្លងមកនេះ កម្លាំងអនុកម្មការ បង្ក្រាបបទល្មើសជលផលខេត្តកំពង់ធំបានចុះបង្ក្រាបបទល្មើសក្នុងភូមិសាស្ត្រឃុំផាត់សណ្ដាយ ស្រុកកំពង់ស្វាយ និងក្នុងភូមិសាស្ត្រឃុំពាមបាង ស្រុកស្ទោង ដោយបានធ្វើការចាប់រឹបអូសឧបករណ៍នេសាទមួយចំនួន រួមមាន របាំងសាច់អួនចំនួន ៨ របាំងស្បៃមុងចំនួន ៨ និងមង ១ ត្បូង សរុបប្រវេង ២ ១០០ ម៉ែត្រ ឧបករណ៍កាវលៀសចំនួន ៦ គ្រឿង លប ២៦ គ្រឿង និងបង្គោលសម្រាស់ចំនួន ៩០០ ដើម ព្រមទាំងបានដោះលែងត្រីចម្រុះប្រភេទចំនួន ១៣ គីឡូក្រាម ចូលទៅក្នុងបឹងធម្មជាតិវិញ។
លោកថា៖ «ក្នុងប្រតិបត្តិការនោះ ក្រុមសមត្ថកិច្ចបានឃាត់ខ្លួនធ្វើការអប់រំប្រជានេសាទសរុប ២៦ នាក់ ដែលលួចធ្វើសកម្មភាពកាវលៀសក្នុងតំបន់អភិរក្ស អតីតឡូត៍នេសាទលេខ ២ និងក្នុងតំបន់អភិរក្សបឹងទន្លេឆ្មាដោយបានឱ្យពួកគាត់ធ្វើកិច្ចសន្យាឈប់លួចឆ្មក់ចូលមកកាវលៀសក្នុងតំបន់អភិរក្សទៀត បើពុំនោះទេនឹងត្រូវប្រឈមការផ្ដន្ទាទោសតាមច្បាប់ជលផល»។
លោកបានបន្ថែមថា ទន្ទឹមនឹងនេះ ក្រុមការងារបានចុះធ្វើការអប់រំណែនាំដល់ប្រជានេសាទ និងឈ្មួញដែលចាំទទួលទិញផលនេសាទក្នុងភូមិសាស្ត្រទាំង ២ ខាងលើនេះឱ្យបញ្ឈប់ជាបន្ទាន់នូវសកម្មភាពនេសាទខុសច្បាប់ និងការប្រមូលទិញផលនេសាទដែលបានមកពីបទល្មើសនេសាទផងដែរ៕