.jpg)
អ្នកជំនាញពេលកំពុងពន្យល់ដល់មគ្គុទ្ទេសទេសចរណ៍នៅជាយក្រុងកំពង់ឆ្នាំងកន្លងមក។ ហុង មិនា
ភ្នំពេញៈ រាជរដ្ឋាភិបាលតាមរយៈក្រសួងការងារ និងបណ្តុះបណ្តាលវិជ្ជាជីវៈបានប្រកាសបន្តផ្តល់ប្រាក់ឧបត្ថម្ភលើកទី ៨០ ជូនដល់កម្មករនិយោជិតក្នុងវិស័យទេសចរណ៍ជិត ២ ពាន់នាក់ ដែលត្រូវបានព្យួរកិច្ចសន្យាការងារ ដោយសារវិបត្តិជំងឺកូវីដ ១៩ ស្របតាមស្មារតីនៃកញ្ចប់វិធានការរបស់រាជរដ្ឋាភិបាល។
យោងតាមសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈចុះថ្ងៃទី ១៨ ខែមេសា បានឱ្យដឹងថា ការផ្តល់ជូនសាច់ប្រាក់ឧបត្ថម្ភលើកទី ៨០ នេះ មានកម្មករនិយោជិតចំនួន ១ ៩២៩ នាក់នៃសហគ្រាសទាំង ១៤ នៃវិស័យទេសចរណ៍ដែលបានទទួលការអនុញ្ញាតព្យួរកិច្ចសន្យាការងារស្របតាមស្មារតីជុំទី ៣ នៃកញ្ចប់វិធានការរបស់រាជរដ្ឋាភិបាល។
សេចក្តីជូនដំណឹងបន្តថា ធនាគារឯកទេសវីង នឹងផ្ញើសារអំពីការបើកប្រាក់ឧបត្ថម្ភរបស់រាជរដ្ឋាភិបាលទៅលេខទូរស័ព្ទ ដែលកម្មករបានផ្ដល់មកឱ្យក្រសួងតាមរយៈរដ្ឋបាលសហគ្រាសនាពេលកន្លងមក។
បើតាមក្រសួងការងារ ប្រាក់ឧបត្ថម្ភនេះនឹងត្រូវបើកផ្ដល់ជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងារក្នុងនោះកម្មករម្នាក់នឹងទទួលប្រាក់ឧបត្ថម្ភចំនួន ១២ ម៉ឺនរៀល (៣០ ដុល្លារអាមេរិក) សម្រាប់ការព្យួរកិច្ចសន្យាការងាររយៈពេល ១១ ថ្ងៃ ដល់ ២០ ថ្ងៃ និងទទួលបាន ១៦ ម៉ឺនរៀល (៤០ ដុល្លារអាមេរិក) សម្រាប់ការព្យួរកិច្ចសន្យាការងាររយៈពេលចាប់ពី ២១ ថ្ងៃ ដល់ ១ ខែ។
ក្រសួងរំឭកថា ធនាគារឯកទេសវីងនឹងបង្វិលប្រាក់ឧបត្ថម្ភនេះជូនរាជរដ្ឋាភិបាលវិញ ប្រសិនបើបងប្អូនខកខានមិនបានទៅបើកប្រាក់ឧបត្ថម្ភនេះក្នុងរយៈពេល ១០ ថ្ងៃ បន្ទាប់ពីទទួលបានសារតាមទូរស័ព្ទពីធនាគារឯកទេសវីង។
ក្រសួងការងារ បញ្ជាក់ថា «ដើម្បីបើកប្រាក់ឧបត្ថម្ភនេះបងប្អូនត្រូវយកអត្តសញ្ញាណប័ណ្ណសញ្ជាតិខ្មែរ និងទូរស័ព្ទដែលទទួលបានសារនោះទៅកាន់ភ្នាក់ងារវីងដែលនៅជិតបំផុត ហើយមិនតម្រូវឱ្យបង់ថ្លៃសេវាទៅភ្នាក់ងារវីងឡើយពេលបើកប្រាក់ឧបត្ថម្ភនេះ»។
ប្រធានសហព័ន្ធវិស័យទេសចរណ៍ និងសេវាកម្មកម្ពុជា លោក ម៉ម រិទ្ធី បានថ្លែងថា ការបន្តបើកប្រាក់ឧបត្ថម្ភជូនដល់កម្មករនិយោជិតក្នុងវិស័យទេសចរណ៍ដែលកំពុងរងផលប៉ះពាល់នាពេលនេះ គឺជារឿងដ៏ប្រសើរមួយ ដែលបង្ហាញពីការយកចិត្តទុកដាក់ដល់ពលរដ្ឋ។
យ៉ាងណាមិញលោកលើកទឹកចិត្តដល់រដ្ឋាភិបាលបន្តផ្តល់ប្រាក់ឧបត្ថម្ភដល់អ្នកធ្វើការក្នុងវិស័យផ្សេងៗទៀត ឬវិស័យកាត់ដេរបន្តទៀតក្នុងករណីរដ្ឋាភិបាលមានលទ្ធភាពគ្រប់គ្រាន់។
លោកថា៖ «អបអរសាទរដែលរដ្ឋាភិបាលធ្វើការសម្រេចចិត្តបន្តជួយដល់កម្មករវិស័យទេសចរណ៍ ព្រោះគាត់អត់ទាន់មានការងារធ្វើទេ ដោយសារសណ្ឋាគារខ្លះនៅបន្តបិទទ្វារច្រើន ហើយនៅក្នុងវិស័យកាត់ដេរទោះបីងើបឡើងវិញមែន ប៉ុន្តែនៅមានអ្នកផ្សេងទៀតមិនទាន់មានការងារធ្វើ ព្រោះរោងចក្រខ្លះនៅបិទ មិនទាន់បើកទាំងអស់ទេ អ៊ីចឹងបានន័យថាវិស័យកាត់ដេរបើកមួយចំនួន អ៊ីចឹង ខ្ញុំគិតថា បើរដ្ឋាភិបាលមានលទ្ធភាពគួរបន្តផ្តល់ប្រាក់ជូនគាត់ដែលអត់ការងារ...»។
សម្រាប់ លោក ម៉ម រិទ្ធី ដែលធ្វើការងារពាក់ព័ន្ធវិស័យទេសចរណ៍បានថ្លែងថា វិស័យនេះនឹងបន្តរងផលប៉ះពាល់រយៈពេលវែងទៅមុខទៀត បើសិនបើវីរុសកូវីដ ១៩ បន្តបំប្លែងខ្លួនថ្មីជាបន្តបន្ទាប់នោះ។
លោកថា៖ «ឥឡូវយើងមិនទាន់ដឹងថា ជំងឺកូវីដ ១៩ មានកម្រិតបំប្លែងថ្មី ឬមិនបំប្លែងថ្មី ឬឆ្លងកម្រិតណាយើងនៅមិនទាន់ដឹងទេ ព្រោះនៅប្រទេសគេកំពុងរកឃើញវីរុសបំប្លែងថ្មីជាបន្តបន្ទាប់ អ៊ីចឹងហើយនៅប្រទេសយើងវិស័យទេសចរណ៍នេះនៅវែងឆ្ងាយណាស់អាច ៥ ឆ្នាំទៀត អាចស្តារទៅរួចវាអាស្រ័យលើកូវីដ ១៩»។
ពាក់ព័ន្ធនឹងការបន្តបើកប្រាក់ឧបត្ថម្ភក្នុងអំឡុងកូវីដ ១៩ នេះដែរ រាជរដ្ឋាភិបាលបានបន្តអនុវត្តជាធម្មតាឡើងវិញនូវកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ សម្រាប់ជុំទី ៨ លើកទី ៣ និងកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆាំ្ន ចាប់ពីថ្ងៃទី ១៩ ខែមេសា តទៅ។
ការចាប់ផ្ដើមបន្តកម្មវិធីនេះឡើងវិញ បន្ទាប់ពីរាជរដ្ឋាភិបាលបានផ្អាកជាបណ្តោះអាសន្នរយៈពេល ៦ ថ្ងៃ កាលពីថ្ងៃទី ១៣-១៨ ខែមេសា ឆ្នាំ ២០២២ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ៕
