.jpg)
លោក ស ខេង និងរបាយការណ៍ពីសំណូមពរ និងយោបល់ពលរដ្ឋ។ រូបថត Sar Kheng page
ភ្នំពេញៈ គិតក្នុងរយៈពេល ៣ ខែ ឆ្នាំ ២០២២ នេះ ក្រុមការងារហ្វេសប៊ុករបស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានដោះស្រាយបញ្ហានានាជូនប្រជាពលរដ្ឋបានចំនួន ៥៨ គណនី ក្នុងចំណោមសំណូមពរ និងសំណួរ ២៦៩ គណនីដែលបានបញ្ជូនមកក្នុងគណនីក្រុមការងារនេះ។
លោក ស ខេង កាលពីថ្ងៃទី ១៩ ខែមេសាបានសរសេរនៅលើហ្វេសប៊ុករបស់លោកថា ក្នុងត្រីមាសទី ១ ឆ្នាំ ២០២២ នេះ ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋក្នុងទំព័រហ្វេសប៊ុកបានទទួលសំណូមពរ និងសំណួរពីប្រជាពលរដ្ឋស្ថិតក្នុងដែនសមត្ថកិច្ចក្រសួងមហាផ្ទៃចំនួន ២៦៩ គណនី។
លោកបន្តថា ក្នុងនោះក្រុមការងារបានឆ្លើយតបទៅម្ចាស់គណនី និងដោះស្រាយចំនួន ៥៨ គណនី និង ១៣៧ គណនីទៀត កំពុងស្ថិតក្នុងដំណាក់កាលដោះស្រាយ។
លោកឱ្យដឹងថា ទន្ទឹមគ្នានេះក៏មានសំណូមពរ សំណួរ និងបញ្ហាខ្លះទៀត ត្រូវបានរកឃើញថា ខុសពីសមត្ថកិច្ចក្រសួងមហាផ្ទៃ និងបានជូនយោបល់ឱ្យបង្វែរទៅស្ថាប័នមានសមត្ថកិច្ច។
លោក ស ខេង បានបញ្ជាក់ថា៖ «វឌ្ឍនភាពការងារនេះអាចសម្រេចបាន ដោយសារកិច្ចខិតខំប្រឹងប្រែង និងការសហការគ្នាដ៏ល្អរវាងថ្នាក់ដឹកនាំ និងមន្ត្រីស្ថិតក្នុងដែនសមត្ថកិច្ចក្រសួងមហាផ្ទៃទាំងថ្នាក់ជាតិ និងថ្នាក់ក្រោមជាតិ និងក្រុមការងារគេហទំព័រហ្វេសប៊ុករបស់ខ្ញុំ»។
ជាមួយគ្នានេះ លោកបានស្នើឱ្យថ្នាក់ដឹកនាំ និងមន្ត្រីពាក់ព័ន្ធដែលស្ថិតក្រោមសមត្ថកិច្ចក្រសួងមហាផ្ទៃគប្បីខិតខំពន្លឿនការដោះស្រាយ ហើយត្រូវតែធានាឱ្យបានល្អគ្រប់ជ្រុងជ្រោយពិតប្រាកដនៃបញ្ហា និងចប់ចុងចប់ដើមដោយមិនគ្រាន់តែធ្វើជាលិខិតស្នាមបញ្ជាតាមបែបបទរដ្ឋបាលនោះទេ។
បន្ថែមពីនេះលោកបានថ្លែងអំណរគុណបងប្អូនជនរួមជាតិ ដែលបានលើកជាមតិយោបល់ និងសំណូមពរមកកាន់ទំព័រហ្វេសប៊ុក ដើម្បីយើងរួមគ្នាដោះស្រាយបញ្ហានានាក្រៅប្រព័ន្ធតុលាការ ជួយសម្រួលជីវភាពរស់នៅរបស់បងប្អូន និងរួមគ្នាអភិវឌ្ឍសង្គមជាតិ។
លោកបន្តទៀតថា៖ «ជាថ្មីម្តងទៀតខ្ញុំក៏សូមយកឱកាសនេះស្នើសុំការយល់យោគអធ្យាស្រ័យពីបងប្អូនជនរួមជាតិចំពោះករណីមួយចំនួនទៀតដែលក្រុមការងារ និងភាគីពាក់ព័ន្ធនៅមិនទាន់បានដោះស្រាយចប់សព្វគ្រប់ អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី»។
នាយករងអង្គការលីកាដូ លោក អំ សំអាត ថ្លែងថា ការបង្កើតឱ្យមានការទទួលបណ្តឹង ឬសំណូមពរពលរដ្ឋដោយផ្ទាល់តាមហ្វេសប៊ុករបស់លោក ស ខេង បែបនេះជាវិធីជួយសម្រួលដល់ពលរដ្ឋដោយមិនចាំបាច់ចំណាយពេលធ្វើដំណើរ និងថវិកាច្រើនមកដាក់បណ្ដឹងហើយពលរដ្ឋអាចលើកពីបញ្ហាអសកម្ម និងការព្រងើយកន្តើយពីមន្ត្រីមូលដ្ឋានជម្រាបជូនដល់ថ្នាក់ដឹកនាំ។
យ៉ាងណាក្ដីលោកបានស្នើដល់ក្រុមការងារពន្លឿនការដោះស្រាយបញ្ហានានាដោយតម្លាភាព និងគ្មានការរើសអើង។
លោកថា៖ «អ្វីដែលជាការសំណូមពរបន្ថែមយើងឃើញថាបញ្ហាប្រជាពលរដ្ឋមានច្រើន ហើយការដោះស្រាយនៅមានកម្រិតនៅឡើយ អ៊ីចឹងត្រូវធ្វើម៉េចបង្កើនការដោះស្រាយឱ្យបានច្រើនយើងដឹងហើយបញ្ហាខ្លះក្រសួងមហាផ្ទៃអាចដោះស្រាយខ្លួនឯង ហើយបញ្ហាខ្លះបញ្ជូនទៅស្ថាប័នពាក់ព័ន្ធ តែយ៉ាងណាយើងសូមឱ្យការដោះស្រាយនោះប្រកបដោយតម្លាភាព គឺថាមិនមានការរើសអើង ពីព្រោះប្រជាពលរដ្ឋទាំងអស់ទោះបីគាត់មាននិន្នាការនយោបាយណាក៏ដោយ»។
តាមរបាយការណ៍បូកសរុបស្តីពីការទទួលមតិយោបល់ ឬសំណូមពររបស់មហាជនក្នុងហ្វេសប៊ុករបស់លោក ស ខេង បានឱ្យដឹងថា ចំពោះគណនីដែលនៅសល់ពីឆ្នាំ ២០២១ ក្រុមការងារបានបូកសរុបតាមដានដោយឡែករយៈពេល ៣ ខែដូចគ្នាមានចំនួន ៦៥៥ គណនីក្នុងនោះដោះស្រាយបាន ១១១ គណនី និងកំពុងដោះស្រាយចំនួន ៥៤៤ គណនី៕
