ភ្នំពេញៈ បុរសម្នាក់ដែលត្រូវសត្វក្រពើខាំ កំពុងត្រូវបានសង្គ្រោះបន្ទាន់នៅមន្ទីរពេទ្យកាលម៉ែតក្នុងរាជធានីភ្នំពេញ នៅថ្ងៃទី ១៩ មេសា បន្ទាប់ពីរងគ្រោះដោយសារសត្វក្រពើ ៥ ក្បាលក្នុងចំណោមជិត ៥០ ក្បាលព្រួតខាំ ខណៈជនរងគ្រោះដើរលើស្ពាន ហើយរអិលជើងធ្លាក់ចូលអាងក្រពើ កាលពីរំលងអធ្រាត្រឈានចូលថ្ងៃទី ១៧ មេសា ស្ថិតក្នុងភូមិកំពង់តាយ៉ង ឃុំ-ស្រុកពួក ខេត្តសៀមរាប។
លោក អៀ សំឯក នាយនគរបាលប៉ុស្តិ៍ឃុំពួកបានឱ្យដឹង នៅថ្ងៃទី ១៩ ខែមេសាថា បុរសរងគ្រោះឈ្មោះ ស៊ូ សុធា អាយុ ៣៧ ឆ្នាំ ជាមន្ត្រីធ្វើការនៅសាលាស្រុកពួក និងមានទីលំនៅ ក្នុងភូមិកំពង់តាយ៉ង ឃុំពួក ស្រុកពួក ខេត្តសៀមរាប។ ជនរងគ្រោះកំពុងត្រូវបានសង្គ្រោះបន្ទាន់នៅឡើយទេនៅមន្ទីរពេទ្យកាលម៉ែត។
លោកថ្លែងថា៖ «កាលពីយប់ គាត់ត្រូវរបួសភ្លាមត្រូវបានគ្រួសារគាត់ដឹកមកមន្ទីរពេទ្យរាជធានីភ្នំពេញទាំងយប់។ ថ្ងៃនេះ [ថ្ងៃទី ១៩ មេសា] ខ្ញុំឮគ្រួសារគាត់ថា កំពុងនៅបន្ទប់សង្គ្រោះបន្ទាន់ នៅពេទ្យកាលម៉ែតនៅឡើយទេ»។
លោកប្រាប់តាមសាច់ញាតិបុរសរងគ្រោះថា ជាទម្លាប់របស់ជនរងគ្រោះតែងតែទៅមើលសត្វក្រពើពង ហើយនៅវេលាម៉ោងជិត ១ រំលងអធ្រាត្រឈានចូលថ្ងៃទី ១៧ ខែមេសា ជនរងគ្រោះបានចេញពីបន្ទប់ដេកទៅអាងចិញ្ចឹមសត្វក្រពើតែម្នាក់ឯង។ ស្របពេលនោះដែរ មានបុរសម្នាក់ដែលរស់នៅក្បែរផ្ទះរបស់ជនរងគ្រោះចេញងូតទឹក ហើយបានឮសំឡេងស្រែកឱ្យជួយ។ ដោយឮសំឡេងស្រែកបែបនេះ អ្នកជិតខាងម្នាក់នោះបានស្រែកប្រកូកប្រកាសថា សត្វក្រពើខាំមនុស្ស ទើបឮដល់សាច់ញាតិរបស់ជនរងគ្រោះ ក៏នាំគ្នាចុះក្នុងអាងក្រពើជួយសង្គ្រោះជនរងគ្រោះ។
លោកបញ្ជាក់ថា ក្រោយពីកើតហេតុ លោក ទេព ពុំសែន អធិការនគរបាលស្រុកពួកបានដឹកនាំកម្លាំងជំនាញ រួមជាមួយសមត្ថកិច្ចនគរបាលប៉ុស្តិ៍របស់លោកចុះដល់ទីតាំងកើតហេតុ និងពិនិត្យឃើញថា ជនរងគ្រោះត្រូវបានសត្វក្រពើហែកខាំសុះសាច់រួមទាំងក្បាលផង។ ភ្លាមៗនោះក្រុមគ្រួសារបានហៅរថយន្តសង្គ្រោះបន្ទាន់របស់មន្ទីរពេទ្យបង្អែកស្រុកពួកដឹកជនរងគ្រោះទៅសង្គ្រោះនៅមន្ទីរពេទ្យកាលម៉ែតរាជធានី-ភ្នំពេញយ៉ាងបន្ទាន់ផងដែរ។
ជុំវិញហេតុការណ៍នេះ លោក សាន ពៃ មេឃុំពួក ប្រាប់នៅថ្ងៃទី ១៩ មេសាថា នៅក្នុងឃុំពួកទាំងមូលមានប្រជាពលរដ្ឋភាគច្រើនចិញ្ចឹមសត្វក្រពើ។ ពួកគាត់ចិញ្ចឹមសត្វក្រពើនេះ គឺដើម្បីយកពងរបស់វាភ្ញាស់ជាកូន ដែលកូនក្រពើក្នុង ១ ក្បាលៗលក់បានពី ១៥ ដុល្លារ ទៅ ២០ ដុល្លារ។ ដូច្នេះចំណូលរបស់អ្នកចិញ្ចឹមសត្វក្រពើអាចរកចំណូលផ្គត់ផ្គង់ជីវភាពគ្រួសារបានប្រសើរដែរ។ ចំណែកនៅផ្ទះរបស់ជនរងគ្រោះវិញមានចិញ្ចឹមសត្វក្រពើទាំងឈ្មោល ទាំងញី ប្រហែលជិត ៥០ ក្បាលឯណោះ។
លោកថា៖ «ឥឡូវ ២ ទៅ ៣ ឆ្នាំនេះ ពេលស្រុកកើតកូវីដ អត់មានហាងឆេងក្រពើទេ មុនឆ្នាំទៅមិញ កូនសត្វក្រពើ ១ ក្បាលលក់បានពី ១៥ ទៅ ២០ ដុល្លារ។ ខ្ញុំសួរគេទៅ គេថា យកទៅវៀតណាម។ គេម្នាក់ៗរកស៊ីជំនួញសត្វក្រពើចំណេញរបស់គេណាស់»៕
វីដេអូ៖