.jpg)
កម្មករសំណង់ធ្វើការងារលើសំណង់អគារខ្ពស់នៅជិតផ្លូវសម្តេច ហ៊ុន សែន នៅខណ្ឌមានជ័យ ពីឆ្នាំ ២០២១។ ហុង មិនា
ភ្នំពេញៈ ប្រមុខរាជរដ្ឋាភិបាលកម្ពុជា លោក ហ៊ុន សែន ចេញសារាចរណែនាំ ស្តីពីការរៀបចំខួបអនុស្សាវរីយ៍លើកទី ១៣៦ នៃទិវាពលកម្មអន្តរជាតិ ដែលនឹងប្រារព្ធឡើងនាថ្ងៃទី ១ ខែឧសភា ឆ្នាំ ២០២២ ក្រោមប្រធានបទ «សន្តិភាព សុខភាព និងសន្តិសុខការពារ»។
តាមរយៈសារាចរណែនាំ ដែល ភ្នំពេញ ប៉ុស្តិ៍ ទទួលបាននាថ្ងៃទី ១៩ មេសា លោកនាយករដ្ឋមន្ត្រី ហ៊ុន សែន លើកឡើងថា ព្រះរាជាណាចក្រកម្ពុជាតែងតែប្រារព្ធទិវាពលកម្មអន្តរជាតិ ១ ឧសភា ដែល ជាព្រឹត្តិការណ៍ប្រវត្តិសាស្ត្រនៃចលនាកម្មករអន្តរជាតិជារៀងរាល់ឆ្នាំតាំងពីឆ្នាំ ១៩៧៩ មកម្ល៉េះ។
លោកបញ្ជាក់ថា៖ «ខួបអនុស្សាវរីយ៍លើកទី ១៣៦ នៃទិវាពលកម្មអន្តរជាតិថ្ងៃទី ១ ខែឧសភា ឆ្នាំ ២០២២ នេះប្រារព្ធឡើង ក្រោមប្រធានបទ សន្តិភាព សុខភាព និង សន្តិសុខការពារ ហើយដោយយោងតាមបរិបទដែលប្រជាជាតិយើងទាំងមូលកំពុងចូលរួមបង្ការ ទប់ស្កាត់ និងប្រយុទ្ធប្រឆាំងការរីករាលដាលនៃជំងឺកូវីដ ១៩ បំប្លែង ថ្មីអូមីក្រុង រាជរដ្ឋាភិបាលក៏បានធ្វើការណែនាំពីការរៀបចំពិធីនេះផងដែរ»។
លោក ហ៊ុន សែន ឱ្យដឹងថា លោកបានប្រគល់ភារកិច្ចជូនក្រុមការងាររាជរដ្ឋាភិបាលចុះមូលដ្ឋានរាជធានី-ខេត្ត និងអភិបាលរាជធានី-ខេត្តទាំងអស់ ដោយសហការជាមួយអង្គការវិជ្ជាជីវៈ ព្រមទាំងនិយោជកត្រូវរៀបចំពិធីសំណេះសំណាលជាមួយកម្មករនិយោជិត សហជីព និងតំណាងមន្ត្រីរាជការ គ្រូបង្រៀនក្នុងការរំឭក ខួបអនុស្សាវរីយ៍លើកទី ១៣៦ ទិវា ពលកម្មអន្តរជាតិ ១ ឧសភានេះ។
លោកលើកឡើងថា៖ «ការរៀបចំ ពិធីសំណេះសំណាលនេះគឺត្រូវធ្វើក្នុងទ្រង់ទ្រាយតូច និងតាមស្ថានភាពជាក់ស្តែង ហើយនិយោជកត្រូវស្វ័យរៀបចំក្នុងកម្រិតរោងចក្រ សហគ្រាស តាមស្ថានភាពជាក់ស្តែង»។
ជាមួយគ្នានេះ រាជរដ្ឋាភិបាលក៏បានណែនាំឱ្យក្រសួងព័ត៌មានត្រូវណែនាំប្រព័ន្ធឃោសនារបស់រដ្ឋ និងឯកជន បណ្តាញសារព័ត៌មានសង្គមនានាឱ្យផ្សព្វផ្សាយសារាចរណែនាំ និងសារលិខិតរបស់នាយករដ្ឋមន្ត្រីក្នុងទិវាពលកម្មអន្តរជាតិ ១ ឧសភានេះដែរ។
ក្នុងទិវាពលកម្មអន្តរជាតិនេះនៅតាមក្រសួង ស្ថាប័នពាក់ព័ន្ធ រដ្ឋបាលរាជធានី-ខេត្តទាំងអស់ និងរោងចក្រ សហគ្រាស ត្រូវជ្រើសរើសទីតាំងសមស្របណាមួយ ដូចជា ដងវិថីសំខាន់ៗ និងទីតាំងរោងចក្រ សហគ្រាស ការដ្ឋាន និងកសិដ្ឋាន ដើម្បីធ្វើការចងបដាពាក្យស្លោកសំខាន់ៗតាមខ្លឹមសារនៃទិវានេះ។
ខ្លឹមសារនៃពាក្យស្លោកទាំងនោះ មានដូចជា៖ ជយោ! ព្រះរាជាណាចក្រកម្ពុជា អបអរសាទរខួបអនុស្សាវរីយ៍លើកទី ១៣៦ នៃទិវាពលកម្មអន្តរជាតិ ១ ឧសភា សន្តិភាព សុខភាព និងសន្តិសុខការងារ ស្ម័គ្រចិត្តចាក់វ៉ាក់សាំងកូវីដ ១៩ ទាំងដូសមូលដ្ឋាន និងដូសជំរុញដើម្បីសុខភាព និងការងារ គោរពច្បាប់ស្តីពីការងារ និងច្បាប់ស្តីពីសហជីព ដើម្បីធានា សិទ្ធិ និងផលប្រយោជន៍រួមរបស់កម្មករនិយោជិត និងនិយោជក...ជាដើម។
តាមរយៈសារាចរណែនាំនេះប្រមុខរាជរដ្ឋាភិបាលឱ្យក្រសួងការងារ និងបណ្តុះបណ្តាល វិជ្ជាជីវៈ ត្រូវរៀបចំឯកសារ និងតាមដានបូកសរុបការរៀបចំពិធីនេះ ដើម្បីរាយការណ៍ជូនរាជរដ្ឋាភិបាល។
សារាចរបញ្ជាក់ថា៖ «រាជរដ្ឋាភិបាលសូមអំពាវនាវដល់មន្ត្រីរាជការគ្រប់លំដាប់ថ្នាក់ និយោជក កម្មករនិយោជិតកម្ពុជា និងបរទេស ទាំងអស់ចូលរួមរំឭកខួបអបអរសាទរទិវាពលកម្មអន្តរជាតិ ១ ឧសភា នៅក្នុងបរិយាកាសសោមនស្ស រីករាយ សាមគ្គីភាព និងភាតរភាព ដើម្បីឱ្យស័ក្តិសមជាបុណ្យការងាររបស់ជាតិយើង និងអនុវត្តឱ្យបានខ្ជាប់ខ្ជួននូវវិធានការ ៣ ការពារ និង ៣ កុំ»។
លោក ហ្វា សាលី ប្រធានសម្ព័ន្ធសហជីពជាតិបានប្រាប់ភ្នំពេញប៉ុស្តិ៍ នៅថ្ងៃទី ១៩មេសាថា ទិវាពលកម្មអន្តរជាតិ ១ ឧសភា នៅតែមានសារៈសំខាន់ខ្លាំង សម្រាប់ប្រជាពលរដ្ឋ ជាពិសេសកម្មករនិយោជិតខ្មែរ ដែលអាចរំឭក និងទាមទារ ឬតវ៉ាបញ្ចេញនូវមតិ និងកង្វល់របស់ពួកគេផងដែរ។
លោកបានបន្តថា ប្រធានសហជីព កម្មករ-កម្មការិនី អាចចូលរួមបញ្ចេញមតិ ឬសំណូមពរតាមស្ថាប័ន ឬសហជីពរៀងៗខ្លួនទៅកាន់រាជរដ្ឋាភិបាលនូវទុក្ខកង្វល់ ក៏ដូចជាការទាមទាររបស់ពួកគាត់ឱ្យរាជរដ្ឋាភិបាល ឬក្រសួងពាក់ព័ន្ធឱ្យធ្វើការពិចារណាលើលក្ខខណ្ឌការងារ ឬចំណុចផ្សេងៗទៀតជាដើម។
លោក ហ្វា សាលី ថ្លែងថា៖ «យើងក៏នឹងមានការស្នើឱ្យរាជរដ្ឋាភិបាលពិនិត្យពិចារណាឡើងវិញ ជាពិសេសក្រសួងការងារ មេត្តាជំរុញ លើកទឹកចិត្ត ឬដាក់បទបញ្ជាឱ្យថៅកែ ឬម្ចាស់ភោជនីយដ្ឋាន ឬសេវាកម្មផ្សេងៗ ត្រូវទិញបណ្ណបេឡាជាតិរបបសន្តិសុខសង្គម សម្រាប់បុគ្គលិក ឬកម្មកររបស់ខ្លួន»៕
