.jpg)
ប្រជាពលរដ្ឋដឹកជញ្ជូននៅតាមច្រកព្រំដែនកម្ពុជា-ថៃ ក្នុងខេត្តប៉ោយប៉ែត កាលពីខែវិច្ឆិកា ឆ្នាំ ២០១៩។ ហេង ជីវ័ន
ភ្នំពេញៈ ក្រសួងសាធារណការ និងដឹកជញ្ជូនសហការជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) កំពុងរៀបចំគោលនយោបាយធ្វើឱ្យប្រសើរឡើងនូវការដឹកជញ្ជូននៅតាមព្រំដែន ដើម្បីសម្រួលដល់ការដឹកទំនិញ និងបញ្ចៀសការកកស្ទះចរាចរណ៍នៅតាមព្រំដែន។
រដ្ឋលេខាធិការក្រសួងសាធារណការ និងដឹកជញ្ជូន លោកស្រី កុយ សុដានី កាលពីថ្ងៃទី ១៨ មេសា ដឹកនាំកិច្ចប្រជុំប្រចាំខែលើកទី ៩ តាមរយៈប្រព័ន្ធវីដេអូពីចម្ងាយស្តីពីគម្រោងកែលម្អប្រព័ន្ធភ័ស្តុភារកម្មនៅកម្ពុជា ដំណាក់កាលទី ២ ដោយមានការអញ្ជើញចូលរួមពីក្រុមការងារគម្រោង និងជំនាញការនៃទីភ្នាក់ងារសហប្រតិបត្តិការអន្តរជាតិជប៉ុន (JICA) ដើម្បីពិនិត្យវឌ្ឍនភាពនៃការអនុវត្តគម្រោង និងទិសដៅសកម្មភាពនៃការរៀបចំគោលនយោបាយ វិស័យភ័ស្តុភារកម្ម និងការធ្វើឱ្យប្រសើរឡើងការដឹកជញ្ជូនឆ្លងកាត់ព្រំដែន។
អង្គប្រជុំបានពិភាក្សាលើរបាយការណ៍វឌ្ឍនភាព និងសកម្មភាពការងាររបស់ក្រុមការងារភ័ស្តុភារកម្មបៃតង ក្រុមការងារមជ្ឈមណ្ឌលភ័ស្តុភារកម្មតំបន់។ ក្រុមការងារខ្សែចង្វាក់ត្រជាក់ ក្រុមការងារទំនើបកម្មយានយន្តដឹកជញ្ជូនទំនិញ។ ក្រុមការងារតាមដាន និងវាយតម្លៃ និងក្រុមការងារការធ្វើឱ្យប្រសើរឡើងច្រកទ្វារព្រំដែនបាវិត និងការរៀបចំបើកច្រកទ្វារព្រំដែនស្ទឹងបត់បានណងអៀននិងការដឹកជញ្ជូនតាមព្រំដែនផងដែរ។
ថ្លែងក្នុងអង្គប្រជុំនាឱកាសនោះ លោកស្រី កុយ សុដានី បញ្ជាក់ពីកិច្ចខិតខំប្រឹងប្រែង និងវឌ្ឍនភាពរបស់ក្រុមប្រតិបត្តិការងារគណៈកម្មការគ្រប់គ្រងគម្រោង (PMU) ដែលបានសម្រេចលទ្ធផលការងារ ជាវិជ្ជមានក្នុងការរៀបចំតាក់តែងគោលនយោបាយពាក់ព័ន្ធនឹងការដឹកជញ្ជូន និងភ័ស្ភុភារកម្ម។ ការធ្វើឱ្យប្រសើរឡើងច្រកទ្វារព្រំដែនបាវិត និងការរៀបចំបើកច្រកទ្វារព្រំដែនស្ទឹងបត់បានណងអៀន សំដៅធ្វើយ៉ាងណាជំរុញឱ្យការអនុវត្តគម្រោងប្រព្រឹត្តទៅដោយរលូន បញ្ចប់តាមផែនការគ្រោងទុក និងបង្កលក្ខណៈងាយស្រួលដល់ការដឹកជញ្ជូនទំនិញឆ្លងកាត់ព្រំដែនបានឆាប់រហ័សគ្មានការកកស្ទះ។
អនុរដ្ឋលេខាធិការក្រសួងសាធារណការ និងដឹកជញ្ជូន លោក វ៉ាស៊ឹម សុរិយា ប្រាប់ភ្នំពេញប៉ុស្តិ៍ថា គម្រោងខាងលើនេះ JICA បានផ្តល់ជាជំនួយបច្ចេកទេសរយៈពេល ២ ឆ្នាំ ក្នុងការពង្រឹងការងារធ្វើឱ្យប្រសើរឡើងនូវភ័ស្តុភារកម្មនៅកម្ពុជា។ ក្នុងនោះជំនួយបច្ចេកទេសមាន ៤ ផ្នែកធំៗ ទី ១ ការតាមដានបន្ថែមទៀតការអនុវត្តផែនការមេ។ ទី ២ ការរៀបចំគោលនយោបាយ ទី ៣ ការរៀបចំគោលការណ៍ណែនាំសម្រាប់ត្រួតពិនិត្យការអនុវត្តផែនការមេ និងផែនការភ័ស្តុភារកម្ម និងទី ៤ ការធ្វើឱ្យប្រសើរឡើងនូវច្រកទ្វារព្រំដែនកម្ពុជា-វៀតណាម (ច្រកបាវិត-ម៉ុកបៃ) និងច្រកទ្វារព្រំដែនកម្ពុជា-ថៃ (ព្រំដែនស្ទឹងបត់បានណងអៀន)។
លោកបញ្ជាក់ថា JICA ក៏កំពុងរៀបចំកែសម្រួលជាគោលការណ៍ ដើម្បីសិក្សាឡើងវិញ និងពិនិត្យលទ្ធភាពនៃការវិនិយោគ និងការដឹកជញ្ជូននៅតំបន់ខ្លះ ដូចជាភ្នំពេញ ប៉ោយប៉ែត ក្រុងព្រះសីហនុ និងបាវិតជាដើម ហើយគោលនយោបាយខ្លះកំពុងរៀបចំ និងបកប្រែជាបណ្តើរហើយ។ ចំណុចមួយទៀតពាក់ព័ន្ធការធ្វើឱ្យប្រសើរឡើងនូវច្រកទ្វារព្រំដែន ឬជំរុញការដឹកជញ្ជូនឆ្លងកាត់ព្រំដែន គឺមានកិច្ចព្រមព្រៀងជាមួយប្រទេសជិតខាងជិត ២០ ឆ្នាំហើយ ដែលអាចឱ្យមានការដឹកជញ្ជូនទំនិញឆ្លងកាត់ព្រំដែន ឬដឹកអ្នកដំណើរក៏ដោយ អាចចេញចូលជាមួយប្រទេសជិតខាងបានដូចជា វៀតណាម ថៃ និងឡាវ។
លោកថ្លែងថា៖ «ប៉ុន្តែ វាមានអសកម្មខ្លះដោយសារមានការកកស្ទះនៅចំណុចច្រកទ្វារ។ ច្រកទ្វារយើងតូច ហើយច្រកទ្វារយើងខ្លះគ្មានកន្លែងចតឡាន គ្មាន កន្លែងត្រួតពិនិត្យទំនិញ។ ច្រកទ្វារយើងខ្លះទៀតនៅមិនទាន់មានសម្របសម្រួលគ្នាក្នុងការកាត់បន្ថយនីតិវីធី ឬក្រដាសស្នាម ដើម្បីជម្រះបញ្ជីការឆ្លងកាត់ព្រំដែននៅតំបន់ព្រំដែន»។
លោកថា ច្រកទ្វារព្រំដែនកម្ពុជា-វៀតណាមប្រមាណ ៥ ឆ្នាំមកហើយ ដែលឃើញមានការកកស្ទះចរាចរណ៍។ ដូច្នេះហើយបានជាក្រសួងសាធារណការបានស្នើសុំគោលការណ៍ពីរាជរដ្ឋាភិបាល ដើម្បីពង្រីកផ្លូវនោះ។
លោកថា៖ «មានទាំងថវិកាជាតិផង ថវិកាជំនួយរបស់ ADB ផងយើងពង្រីកផ្លូវប្រហែលជា ៦ ទៅ ៧ គីឡូម៉ែត្រពីអគារព្រំដែនយើងចូលក្រុងបាវិត។ ឥឡូវនេះយើងពង្រីកបានពី ៤ ទៅ ៦ គន្លង អ៊ីចឹងជួយសម្រាលដល់ការកកស្ទះបានខ្លះហើយចន្លោះប៉ុស្តិ៍បាវិត-ម៉ុកបៃ។ យើងក៏បានប្រើប្រាស់ថវិកាជាតិពង្រីកផ្លូវប្រវែង ១៥០ ម៉ែត្រទៅជា ៦ គន្លងដែរ»។
បើតាមលោក វ៉ាស៊ឹម សុរិយា គម្រោងសាងសង់ហេដ្ឋារចនាសម្ព័ន្ធនានារួមទាំងអគាររដ្ឋបាល អគារថ្មីនៃច្រកព្រំដែនស្ទឹងបត់បានណងអៀន សម្រេចបាន ៤០ ភាគរយ គ្រោងនឹងបញ្ចប់នៅដើមឆ្នាំ ២០២៣។ ភាគីសាងសង់អគារដូចគ្នានោះនឹងបញ្ចប់នៅខែកញ្ញា ឆ្នាំ ២០២២។ លោកថា គម្រោងនេះនឹងជួយសម្រួលដល់ការដឹកជញ្ជូនទំនិញឆ្លងកាត់ច្រកព្រំដែនបានលឿន និងអាចកាត់បន្ថយការកកស្ទះចរាចរណ៍៕
