.jpg)
ក្រុមកម្មកររោងចក្រ CAMTERAM APPAREL ប្រមូលផ្ដុំតវ៉ា។ ហេង ជីវ័ន
ភ្នំពេញៈ កម្មកររោងចក្រ CANTERAN APPAREL ប្រមាណ ៣០០ នាក់បានប្រមូលផ្តុំគ្នាធ្វើបាតុកម្មដោយបិទផ្លូវវេងស្រេងនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ នៅព្រឹកថ្ងៃទី ១៩ ខែមេសា។ ការបិទផ្លូវតវ៉ានេះធ្វើឡើង បន្ទាប់ពីដឹងថា ក្រុមហ៊ុនបានដឹកម៉ាស៊ីនចេញដោយគ្មានជូនដំណឹង ជាហេតុធ្វើឱ្យកម្មករព្រួយបារម្ភថា ម្ចាស់ក្រុមហ៊ុនអាចនឹងរត់ចោលដោយមិនទូទាត់ថ្លៃសំណង។
អ្នកស្រី ញឹម ចាន់ធឿន កម្មកររោងចក្រកាត់ដេរសម្លៀកបំពាក់ CANTERAN APPAREL ថ្លែងនៅថ្ងៃទី ១៩ ខែមេសាថា ការបិទផ្លូវតវ៉ានេះធ្វើឡើងដោយសារតែមានការព្រួយបារម្ភខ្លាចម្ចាស់ក្រុមហ៊ុនរត់ចោលដោយមិនទូទាត់ថ្លៃសំណងអតីតភាពការងារ ព្រោះរោងចក្រជិតដល់ពេលបិទទ្វារ។ នារីជាកម្មកររូបនេះប្រាប់ថា នៅដើមខែមេសាក្រុមហ៊ុនបានធ្វើកិច្ចសន្យាជាមួយកម្មករថា មិនដឹកជញ្ជូនម៉ាស៊ីនចេញពីក្រុមហ៊ុននោះទេ ប៉ុន្តែក្រុមហ៊ុនបែរជាបំពានកិច្ចសន្យាដោយបានដឹកជញ្ជូនម៉ាស៊ីនចេញជាបន្តបន្ទាប់ រហូតដល់ថ្ងៃទី ១៩ ខែមេសា នេះ ក្រុមហ៊ុនបានដឹកម៉ាស៊ីនភ្លើងធំចេញពីក្រុមហ៊ុនថែមទៀតផង។
អ្នកស្រីថ្លែងថា៖ «រោងចក្រហ្នឹងជិតដល់អាណត្តិគេបិទ អ៊ីចឹងគេដឹកម៉ាស៊ីនចេញទៅម្តងបន្តិចៗមើលទៅគាត់ចង់រត់គេចដោយមិនគុណលុយឱ្យយើង។ ពួកខ្ញុំមិនថាអីទេ ចង់បិទក៏បិទទៅ ប៉ុន្តែត្រូវជូនដំណឹងមុន ហើយត្រូវទូទាត់ថ្លៃអតីតភាពការងារឱ្យពួកខ្ញុំផង ព្រោះពួកខ្ញុំធ្វើការយូរៗឆ្នាំហើយ កុំដឹករបស់របរទៅអស់ អត់ចង់គិតលុយឱ្យគេអ៊ីចឹង» ។
អ្នកស្រី រឹម នី ជាកម្មករក្រុមហ៊ុន CANTERAN APPAREL ម្នាក់ទៀតបានឱ្យដឹងថា កម្មករមានទំនុកចិត្តថាក្រុមហ៊ុននឹងមិនដឹកម៉ាស៊ីនចេញពីទីតាំងរោងចក្រ ហើយបានឈប់សម្រាកទៅលេងស្រុកកំណើតនៅអំឡុងពេលចូលឆ្នាំព្រោះសំអាងលើកិច្ចសន្យាដែលបានធ្វើទុកហើយកាលពីថ្ងៃទី ៦ ខែមេសា។ ប៉ុន្តែនៅពេលត្រឡប់ចូលធ្វើការវិញបានដឹងថា ក្រុមហ៊ុនបានដឹកម៉ាស៊ីនដេរតូចធំចេញពីទីតាំងរោងចក្រអស់ ទើបនាំគ្នាធ្វើការតវ៉ាតែម្តង។ អ្នកស្រីប្រាប់ទៀតថា ខណៈពេលកំពុងធ្វើការបិទផ្លូវតវ៉ា ក៏មានអភិបាលរងខណ្ឌពោធិ៍សែនជ័យម្នាក់បានចុះសម្របសម្រួល ទើបក្រុមកម្មកររំសាយការបិទផ្លូវ។ ប៉ុន្តែយ៉ាងណាក៏ដោយ អ្នកស្រីថា ការសម្របសម្រួលនៅមិនទាន់ត្រូវគ្នានៅឡើយ។
លោក ប៉ាង លីដា អភិបាលរងខណ្ឌពោធិ៍សែនជ័យថ្លែងនៅថ្ងៃទី ១៩ ខែមេសាថា ការធ្វើកិច្ចសន្យារវាងក្រុមហ៊ុន និងកម្មករគឺធ្វើឡើងដោយមិនមានការដឹងឮពីអាជ្ញាធរឡើយ ហេតុនេះ លោកបានណែនាំឱ្យមានការជួបជុំនៅសាលាខណ្ឌពោធិ៍សែនជ័យ ដើម្បីជជែកដោះស្រាយឱ្យបានច្បាស់លាស់នៅថ្ងៃទី ២០ ខែមេសា នេះ។ លោកបន្តថា ការចុះទៅសម្របសម្រួលពេលកម្មករកំពុងធ្វើការបិទផ្លូវតវ៉ានេះគឺដើម្បីឱ្យភាគីទាំងសងខាងគោរពតាមកិច្ចសន្យាដែលខ្លួនបានធ្វើ និងផ្អាកការបិទផ្លូវដើម្បីកុំឱ្យមានការកកស្ទះចរាចរណ៍ខ្លាំង។
លោកថ្លែងថា៖ «ខ្ញុំបានប្រាប់ថាទី ១ ឱ្យខាងក្រុមហ៊ុនអនុវត្តកិច្ចសន្យាដែលបានព្រមព្រៀងគ្នាហើយទី ២ ដែលខ្ញុំអូសមកដល់ស្អែកហ្នឹង [ថ្ងៃទី ២០ មេសា] គឺដោយសារអ្នកដែលផ្តិតមេដៃធ្វើកិច្ចសន្យាខាងក្រុមហ៊ុនហ្នឹងអត់បានចូលរួម អ៊ីចឹងខ្ញុំសុំឱ្យថ្ងៃទី ២០ មេសា ហ្នឹងភាគីសងខាងចូលរួមជជែកគ្នាយ៉ាងម៉េចអីយ៉ាងម៉េចដោយមានអាជ្ញាធរដឹងឮ ព្រោះកន្លងមកពួកគាត់ធ្វើតែគ្នាឯងអត់មានពីណាដឹងឮ»។
ភ្នំពេញប៉ុស្តិ៍មិនអាចស្វែងរកទំនាក់ទំនងសុំការបំភ្លឺពីតំណាងក្រុមហ៊ុន CANTERAN APPAREL បានទេនៅថ្ងៃទី ១៩ ខែមេសា។ ប៉ុន្តែយ៉ាងណាក៏ដោយលោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ជុំវិញរឿងនេះក្រសួងក៏កំពុងធ្វើការដោះស្រាយ ដើម្បីធ្វើយ៉ាងណារកថវិកាមកទូទាត់ជូនកម្មករតាមច្បាប់៕
វីដេអូ៖
