ឧត្តរមានជ័យៈ នគរបាលព្រហ្មទណ្ឌខេត្តឧត្តរមានជ័យនឹងបញ្ជូនក្រុមយុវជនសង្ស័យ ៣ នាក់ ទៅសាលាដំបូងខេត្តនៅថ្ងៃទី ២០ មេសាបន្ទាប់ពីស្រាវជ្រាវចាប់ខ្លួនបាន ២ ថ្ងៃ ពាក់ព័ន្ធករណីព្រួតគ្នាចាប់យុវតីអាយុ ១៧ ឆ្នាំម្នាក់រំលោភហើយសម្លាប់កាលពីថ្ងៃទី ១៥ មេសា ប្រព្រឹត្តនៅភូមិ ចំការចេក សង្កាត់ អូរស្មាច់ ក្រុងសំរោង ខេត្តឧត្តរមានជ័យ។
លោកឧត្តមសេនីយ៍ត្រី ជួន សួ ស្នងការរងទទួលផែនការងារនគរបាលព្រហ្មទណ្ឌខេត្ត ឧត្តរមានជ័យប្រាប់ភ្នំពេញប៉ុស្តិ៍នៅថ្ងៃទី ១៩ មេសា ថា ជនសង្ស័យទាំង ៣ នាក់ទី ១- ឈ្មោះ ភាក់ សីហា ភេទ ប្រុស អាយុ ១៨ ឆ្នាំ រស់នៅភូមិអូរពក សង្កាត់កូនគ្រៀល ក្រុង សំរោង ខេត្តឧត្តរមានជ័យ។
ទី ២- ឈ្មោះ ភាជ សុជាតិ ភេទប្រុស អាយុ ១៧ ឆ្នាំ រស់នៅភូមិអភិវឌ្ឍន៍ សង្កាត់អូរស្មាច់ ក្រុងសំរោង និងទី ៣ ឈ្មោះ ត្រយ ចិត្រា ភេទប្រុស អាយុ ១៥ ឆ្នាំ រស់នៅភូមិ អភិវឌ្ឍន៍ សង្កាត់អូរស្មាច់ ក្រុងសំរោង ខេត្តឧត្តរមានជ័យ ។
លោកថ្លែងថា៖ «នៅថ្ងៃនេះ (ថ្ងៃទី ១៩ មេសា) សមត្ថកិច្ចយើងកំពុងរៀបចំសំណុំរឿងរបស់អ្នកទាំង ៣ នាក់ហើយយើងគ្រោងបញ្ជូនពួកគេទៅតុលាការនៅថ្ងៃស្អែក (ថ្ងៃទី ២០ មេសា)។ លោកបានបន្តថា ការស្រាវជ្រាវចាប់ខ្លួនក្រុមជនសង្ស័យខាងលើគឺបន្ទាប់ពីប្រជាពលរដ្ឋម្នាក់បានប្រទះឃើញសាកសពរបស់នារីម្នាក់ដេកស្លាប់ទាំងអាក្រាតកាយនៅក្នុងទឹកអូរស្ថិតក្នុងភូមិចំការចេក សង្កាត់ អូរស្មាច់ ក្រុងសំរោងកាលពីរសៀលថ្ងៃទី ១៦ មេសា។
បន្ទាប់មកនគរបាលព្រហ្មទណ្ឌរបស់លោកបានស្នើសុំគោលការណ៍ពីលោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ និងស្នើសុំគោលការណ៍ពីអយ្យការអមសាលាដំបូងខេត្តឧត្តរមានជ័យ ដើម្បីបើកការស្រាវជ្រាវ។
បើតាមលោក ជួន សួ ក្រោយទទួលបានគោលការណ៍មក កម្លាំងនគរបាលព្រហ្មទណ្ឌរបស់លោកបានបើកការស្រាវជ្រាវដោយទទួលបានព័ត៌មានពីសាក្សីថា កាលពីថ្ងៃទី ១៤ មេសា ឆ្នាំ ២០២២ គេបានឃើញជនសង្ស័យទាំង ៣ នាក់បានជិះម៉ូតូ ២ គ្រឿង នាំនារីរងគ្រោះឈ្មោះ ឡ.គ.ឡ អាយុ ១៧ ឆ្នាំ ដើរលេងនៅក្រុងសំរោង។
លោកបញ្ជាក់ថា បន្ទាប់ពីមានតម្រុយស្គាល់អត្តសញ្ញាណក្រុមជនសង្ស័យមក នៅថ្ងៃទី ១៨ មេសា ក្រោយពីសមត្ថកិច្ចរបស់លោកកោះហៅសាក្សីបំភ្លឺ និងក្តាប់បានព័ត៌មានអស់ហើយកម្លាំងជំនាញព្រហ្មទណ្ឌបានចេញប្រតិបត្តិការឈានទៅចាប់បានជនសង្ស័យ ២ នាក់ ម្នាក់ឈ្មោះ ភាក់ សីហា រស់នៅភូមិអូពក សង្កាត់កូនក្រៀល និងឈ្មោះ ភាជ សុជាតិ នៅក្រុងសំរោង និងបន្តតាមចាប់ជនសង្ស័យម្នាក់ទៀត ឈ្មោះ ត្រយ ចិត្រា រស់នៅភូមិអភិវឌ្ឍន៍ សង្កាត់អូរស្មាច់។
លោកបន្ថែមថា ក្រោយពីចាប់ខ្លួន សមត្ថកិច្ចបាននាំក្រុមជនសង្ស័យទាំង ៣ នាក់ទៅធ្វើត្រាប់ឡើងវិញនៅថ្ងៃទី ១៩ មេសា នៅទីតាំងដែលពួកគេបានធ្វើសកម្មភាពរំលោភ និងសម្លាប់នារីរងគ្រោះ។ ពេលធ្វើត្រាប់នោះក្រុមជនសង្ស័យបាននិយាយថា កាលពីថ្ងៃទី ១៤ មេសា ពួកគេមានគ្នា ៣ នាក់ បាននាំនារីរងគ្រោះទៅដើរលេងនៅក្រុងសំរោង។ លុះយប់ថ្ងៃទី ១៥ មេសា ពួកគេបាននាំគ្នាទៅរាំធុងបាសនៅមុខផ្សារចំការចេក ស្ថិតក្នុងភូមិចំការចេក សង្កាត់អូរស្មាច់ ក្រុងសំរោង។
ក្រោយពីចប់ការរាំធុងបាសនៅម៉ោងជិត ១០ យប់ថ្ងៃដដែល ពួកគេបានឃើញនារីរងគ្រោះដើរទៅផ្ទះម្នាក់ឯងដែលពេលនោះនៅតាមផ្លូវមានសភាពស្ងាត់ផង ក៏នាំគ្នាចាប់នារីរងគ្រោះរំលោភបានសម្រេចម្នាក់ម្តងៗហើយច្របាច់ក និងយកឈើជ្រុងវាយក្បាលនាងពីក្រោយបន្ថែម រហូតស្លាប់រួចនាំគ្នាសែងបោះចោលក្នុងទឹកអូរទៅ។
លោកស្នងការរង ជួន សួ បន្ថែមថា ចំពោះវត្ថុតាងដែលសមត្ថកិច្ចដកហូតបានពីក្រុមជនសង្ស័យមានដំបងឈើជ្រុងចំនួន ១ ដែលជាមធ្យោបាយវាយសម្លាប់នារីរងគ្រោះ៕
វីដេអូ៖