ភ្នំពេញៈ រដ្ឋមន្ត្រីក្រសួងមហាផ្ទៃ លោក ស ខេង បានបើកកិច្ចប្រជុំស្ដីពីស្ថានភាពនៃការងារគ្រប់គ្រងមន្ត្រីពន្ធនាគារ និងស្តាប់សំណូមពររបស់អគ្គនាយកដ្ឋានពន្ធនាគារ ដែលសំណូមពរនោះស្នើសុំផ្ទេរមន្ត្រីពន្ធនាគារជាង ៣ ពាន់នាក់ ក្នុងក្របខ័ណ្ឌស៊ីវិលទៅក្របខ័ណ្ឌនគរបាលជាតិ។
ថ្លែងក្នុងការដឹកនាំកិច្ចប្រជុំ នាថ្ងៃទី ២០ ខែមេសា លោក ស ខេង ដែលជាឧបនាយករដ្ឋមន្ត្រីបានបញ្ជាក់ថា៖ «កិច្ចប្រជុំនេះគឺ ដើម្បីរួមគ្នាពិនិត្យ ពិភាក្សា និងដោះស្រាយបញ្ហាមួយចំនួន ដែលជាសំណូមពររបស់អគ្គនាយកដ្ឋានពន្ធនាគារ»។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ប្រាប់ភ្នំពេញ-ប៉ុស្តិ៍ថា ការកោះប្រជុំនេះ ដោយសាររដ្ឋមន្ត្រីក្រសួងមហាផ្ទៃចង់ស្តាប់អំពីហេតុផលឱ្យបានច្បាស់លាស់ពីភាគីពាក់ព័ន្ធនៃការស្នើមន្ត្រីបន្ថែម និងការស្នើសុំផ្ទេរក្របខ័ណ្ឌ ដើម្បីធ្វើការណែនាំ និងចង្អុលបង្ហាញថា ត្រូវធ្វើយ៉ាងម៉េច។ អ្វីដែលជាការសំណូមពររបស់មន្ត្រីពន្ធនាគារនោះ គឺការផ្ទេរពីក្របខ័ណ្ឌស៊ីវិល ទៅក្របខ័ណ្ឌមន្ត្រីរាជការនគរបាលជាតិវិញ។
លោកថ្លែងថា៖ «សំណូមពរសំខាន់ក្នុងកិច្ចប្រជុំនោះ គឺសុំក្របខ័ណ្ឌមន្ត្រីពន្ធនាគារបន្ថែម និងស្នើសុំក្របខ័ណ្ឌមន្ត្រីពន្ធនាគារផ្ទេរពីក្របខ័ណ្ឌស៊ីវិលមកខាងក្របខ័ណ្ឌប៉ូលិសវិញ។ នេះជាសំណូមពរធំ ដែលអគ្គនាយកដ្ឋានពន្ធនាគារ បានស្នើទៅថ្នាក់ដឹកនាំក្រសួង»។
លោកថា មូលហេតុស្នើសុំក្របខ័ណ្ឌមន្ត្រីបន្ថែម ដោយសារមានមន្ត្រីចូលនិវត្តន៍ មន្ត្រីខ្លះទទួលមរណភាព ឬបាត់បង់សមត្ថភាពការងារ ហើយចំនួនជនជាប់ឃុំ ក៏ដូចជាប្រសិទ្ធភាពការងារបានរងផលប៉ះពាល់ ដោយសារចំនួនមន្ត្រីពន្ធនាគារមិនសមាមាត្រទៅនឹងទំហំអ្នកជាប់ឃុំជាក់ស្តែង។
លោក នុត សវនា ឱ្យដឹងថា មូលហេតុមន្ត្រីពន្ធនាគារស្នើសុំផ្ទេរពីក្របខ័ណ្ឌស៊ីវិលទៅក្របខ័ណ្ឌប៉ូលិស ដោយសារការគ្រប់គ្រងបុគ្គលិកបច្ចុប្បន្ន ទាំងភ័ស្តុភារ និងបុគ្គលិកពន្ធនាគារ ស្ថិតក្រោមកញ្ចប់ថវិការបស់ស៊ីវិល ហើយបែបបទនីតិវិធីរបស់ស៊ីវិលដែរ។
លោកថ្លែងថា៖ «ទោះបីជាយើងជាមន្ត្រីកងប្រដាប់អាវុធ ប៉ុន្តែកន្លងមកដល់ពេលបច្ចុប្បន្ននេះ គឺឋានន្តរស័ក្ដិ ឬក៏ការរៀបចំក្របខ័ណ្ឌ គឺធ្វើទៅតាម [បែបបទ] ក្របខ័ណ្ឌមន្ត្រីស៊ីវិល ហើយតាមពិតយើងត្រូវនៅក្រោមនគរបាលជាតិ»។
លោកថា ការស្នើសុំផ្ទេរក្របខ័ណ្ឌនេះដើម្បីការពារផលប្រយោជន៍របស់មន្ត្រីពន្ធនាគារនៅពេលចូលនិវត្តន៍។ នេះជាសំណូមពរធំដែលត្រូវដោះស្រាយឱ្យចេញ ដើម្បីការពារផលប្រយោជន៍របស់មន្ត្រី ព្រោះប្រាក់សោធននិវត្តន៍របស់មន្ត្រីរាជការស៊ីវិល គឺមានកម្រិតទាបជាងមន្ត្រីនគរបាល។ មន្ត្រីពន្ធនាគារធ្វើការច្រើន ហើយពេលខ្លះលើសម៉ោងផង ហើយប្រឈមបញ្ហាច្រើនក្នុងជីវភាពការងារ។ បើសិនជាគាត់ចូលនិវត្តន៍ គឺប្រាក់សោធននិវត្តន៍តិចជាងខាងប៉ូលិស អ៊ីចឹងវាអយុត្តិធម៌ចំពោះការលះបង់របស់ពួកគាត់។
លោកឱ្យដឹងដែរថា កន្លងមករដ្ឋមន្ត្រីក្រសួងមហាផ្ទៃ ក៏បានគាំទ្រឱ្យមានការផ្ទេរក្របខ័ណ្ឌនេះដែរ ខណៈមន្ត្រីពន្ធនាគារ ដែលស្នើសុំផ្ទេរក្របខ័ណ្ឌនោះមានជាង ៣ ពាន់នាក់ទូទាំងប្រទេស។
នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ លោក អំ សំអាត ថ្លែងថា ការស្នើសុំផ្ទេរក្របខ័ណ្ឌពីមន្ត្រីពន្ធនាគារនោះ គឺជាការងារផ្ទៃក្នុង ហើយជាការសម្រេចចិត្តរបស់ថ្នាក់ដឹកនាំ។ ប៉ុន្តែសម្រាប់ការស្នើសុំបន្ថែមក្របខ័ណ្ឌមន្ត្រីពន្ធនាគារ គឺជារឿងល្អមួយ ដែលលោកថា មន្ត្រីពន្ធនាគារសព្វថ្ងៃនៅមិនទាន់ឆ្លើយតបជាមួយកំណើនអ្នកជាប់ឃុំនៅឡើយទេ។
លោកថ្លែងថា៖ «បច្ចុប្បន្ននេះមន្ត្រីពន្ធនាគារមិនសមាមាត្រទៅនឹងអ្នកជាប់ឃុំទេ ដោយសារអ្នកជាប់ឃុំកើនឡើង។ អ៊ីចឹងមន្ត្រីមានការងារច្រើនផង និងប៉ះពាល់ដល់អ្នកជាប់ឃុំផង ដោយសារការឆ្លើយតបមិនទាន់ ហើយលើសពីនេះមានមន្ត្រីមួយចំនួនដល់អាយុចូលនិវត្តន៍ ដែលនេះជាការធ្វើឱ្យខ្វះមន្ត្រីអនុរក្សពន្ធនាគារ ដែលជាការបារម្ភបញ្ហាសុវត្ថិភាពនៅតាមពន្ធនាគារ»។
លោកថារឿងសំខាន់មួយទៀតក្នុងការឆ្លើយតបនឹងកំណើនអ្នកជាប់ឃុំនោះ រដ្ឋាភិបាលគួរមានយន្តការ មួយក្នុងការកាត់បន្ថយភាពចង្អៀត នៅក្នុងពន្ធនគារ ដូចជាការដោះស្រាយក្រៅប្រព័ន្ធតុលាការ។ ការឱ្យនៅក្រៅឃុំបណ្តោះអាសន្នចំពោះទោសស្រាល ដោយលោកចាត់ទុកថាជាការកាត់បន្ថយបន្ទុក សម្រាប់មន្ត្រីពន្ធនាគារផងដែរ៕