ភ្នំពេញៈ គណៈមេធាវីនៃព្រះរាជាណាចក្រកម្ពុជាបានចុះកិច្ចព្រមព្រៀង សហប្រតិបត្តិការជាមួយគណៈមេធាវីនៃទីក្រុង Marseille ប្រទេសបារាំង ដើម្បីបង្កើតទំនាក់ទំនងវិជ្ជាជីវៈក្នុងការជំរុញឱ្យមាននីតិរដ្ឋ ការគោរពសិទ្ធិមនុស្ស និងសិទ្ធិទទួលបានការការពារ។
យោងតាមសេចក្ដីប្រកាសព័ត៌មានរួមកាលពីថ្ងៃទី ១៩ ខែមេសា ស្តីពីកិច្ចព្រមព្រៀងសហប្រតិបត្តិការនៃគណៈមេធាវីទាំង ២ នេះឱ្យដឹងថា កាលពីថ្ងៃទី ១៩ ខែមេសា គណៈមេធាវីនៃព្រះរាជាណាចក្រកម្ពុជាដឹកនាំដោយលោក លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជារួមជាមួយសមាជិក-សមាជិកាក្រុមប្រឹក្សា និងថ្នាក់ដឹកនាំបានទទួលស្វាគមន៍ដំណើរទស្សនកិច្ចការងាររបស់គណៈប្រតិភូ គណៈមេធាវីនៃទីក្រុង Marseille ដឹកនាំ ដោយលោក Jean-Raphal FERNANDEZ រួមជាមួយថ្នាក់ដឹកនាំ និងសមាជិក-សមាជិកាមកកាន់ទីស្នាក់ការគណៈមេធាវីកម្ពុជា។
ក្នុងដំណើរទស្សនកិច្ចនេះ លោក លី ច័ន្ទតុលា ក៏បានបង្ហាញជូនដោយផ្ទាល់ទៅគណៈប្រតិភូនូវហេដ្ឋារចនាសម្ព័ន្ធគណៈមេធាវី រួមមានទាំងមជ្ឈមណ្ឌលបណ្តុះបណ្តាលវិជ្ជាជីវៈមេធាវី បណ្ណាល័យ មណ្ឌលច្បាប់ បន្ទប់សវនាការត្រាប់ បន្ទប់សិក្សារបស់សិស្សមេធាវី បន្ទប់ស្ទូឌីយោ និងបន្ទប់ប្រជុំក្រុមប្រឹក្សាគណៈមេធាវី។
សេចក្ដីប្រកាសបញ្ជាក់ទៀតថា៖ «នៅក្នុងដំណើរទស្សនកិច្ចដ៏មានសារៈសំខាន់នេះ ប្រធានគណៈមេធាវីទាំង ២ ក៏បានជួបពិភាក្សាការងារ សំខាន់ៗមួយចំនួន ក្នុងនោះក៏មានការចុះកិច្ចព្រមព្រៀងសហប្រតិបត្តិការក្នុងឆន្ទៈរួមរបស់គណៈមេធាវីនៃព្រះរាជាណាចក្រកម្ពុជា និងគណៈមេធាវីនៃទីក្រុង Marseille ក្នុងគោលបំណងសំខាន់ៗ ដូចជាការលើកកម្ពស់ទំនាក់ទំនងរវាងគណៈមេធាវីទាំង ២ ការបង្កើតមិនត្រឹមតែទំនាក់ទំនងវិជ្ជាជីវៈប៉ុណ្ណោះទេ ប៉ុន្តែក៏បង្កើតទំនាក់ទំនងមិត្តភាព ដើម្បីជំរុញឱ្យមាននីតិរដ្ឋ ការគោរពសិទ្ធិមនុស្ស និងសិទ្ធិទទួលបានការការពារផងដែរ»។
តាមរយៈខ្លឹមសារ និងស្មារតីនៃកិច្ចព្រមព្រៀងសហប្រតិបត្តិការនេះ គណៈមេធាវីទាំង ២ នឹងផ្តោតទៅលើ ទី ១ ការជំរុញឱ្យមានទំនាក់ទំនងរវាងសមាជិក-សមាជិការបស់ខ្លួនកាន់តែប្រសើរឡើង។ ទី ២ ការជំរុញឱ្យមានកិច្ចប្រជុំ និងការផ្លាស់ប្ដូរបទពិសោធ និងចំណេះដឹងគ្នាទៅវិញទៅមក។ ទី ៣ ការរៀបចំសិក្ខាសាលា និងការបណ្តុះបណ្តាលស្តីពីបញ្ហាច្បាប់ ឬបញ្ហាវិជ្ជាជីវៈ ដែលជាផលប្រយោជន៍រួមក្នុងទិសដៅឈានទៅបង្កើតចរន្តកិច្ចការវិជ្ជាជីវៈថ្មី និងទីផ្សារថ្មីៗទៀត។
ទី ៤ គណៈមេធាវីទាំង ២ នឹងផ្ដោតលើកម្មសិក្សាដោយការអនុវត្តផ្ទាល់ដោយធានា ជំរុញផ្សព្វផ្សាយនូវលទ្ធភាពទៅដល់មេធាវីទើបតែចូល ប្រកបវិជ្ជាជីវៈ ឬកម្មសិក្សាការីឱ្យយល់ដឹងអំពីការអនុវត្តជាក់ស្តែងនៅក្នុងវិជ្ជាជីវៈជាមេធាវី ក្នុងគណៈមេធាវីរបស់ខ្លួន ឬតាមរយៈមធ្យោបាយផ្សេងៗជាអាទិ៍ តាមរយៈការចុះកម្មសិក្សានៅតាមការិយាល័យមេធាវី។
លោកមេធាវី អាន សុវឌ្ឍនា អ្នកនាំពាក្យគណៈមេធាវីបានប្រាប់ ភ្នំពេញ ប៉ុស្ដិ៍ នៅថ្ងៃទី ២០ មេសាថា នៅប្រទេសបារាំងមានការគ្រប់គ្រងវិជ្ជាជីវៈមេធាវីស្រដៀងនឹងកម្ពុជាដែរ ប៉ុន្ដែដោយសារប្រព័ន្ធរដ្ឋបាលនៅក្នុងប្រទេសបារាំងមានសហជីពសហព័ន្ធគណៈមេធាវី ដូច្នេះប្រទេសនេះ មានគណៈមេធាវីតាមទីក្រុង ព្រោះទីក្រុងប្រទេសបារាំងធំៗ ហើយគណៈមេធាវីនៃទីក្រុង Marseille ជាគណៈមេធាវីធំលំដាប់ទី ៣ បន្ទាប់ពីទីក្រុងប៉ារីស និងទីក្រុងលីយ៉ុង។
លោកថ្លែងថា៖ «គណៈមេធាវីនៃទីក្រុង Marseille ជាគណៈមេធាវីធំទី ៣ ដែលមានសមាជិករហូតទៅដល់ ២ ៦០០ នាក់។ ការចុះកិច្ចព្រមព្រៀងសហការជាមួយគណៈមេធាវីយើង គឺដើម្បីពង្រឹងទំនាក់ទំនងរវាងភាគីទាំង ២ ឱ្យកាន់តែជិតស្និទ្ធ និងចូលរួមបង្កើតការបណ្ដុះបណ្ដាល ឬក៏សិក្ខាសាលាទៅលើប្រធានបទច្បាប់ ឬប្រធានបទពាក់ព័ន្ធទៅនឹងការប្រកបវិជ្ជាជីវៈមេធាវី»។
លោកមេធាវី សុវឌ្ឍនា បានលើកឡើងថា លទ្ធផលនៃកិច្ចសហប្រតិបត្ដិការនេះគឺជាគោលនយោបាយមួយនៃគោលនយោបាយទាំង ៨ ចំណុចរបស់លោក លី ច័ន្ទតុលា ដែលគោលនយោបាយនេះផ្ដោតសំខាន់លើការពង្រឹងទំនាក់ទំនងកិច្ចសហប្រតិបត្ដិការជាមួយស្ថាប័នជាតិ និងស្ថាប័នអន្តរជាតិ៕