.jpg)
លោក កឹម សុខា លើកដៃ ពេលចេញពីតុលាការ។ ហ៊ាន រង្សី
ភ្នំពេញៈ ក្រុមសហមេធាវីលោក កឹម សុខា គ្រោងដាក់ពាក្យស្នើទៅបណ្តាប្រទេសដែលត្រូវបានចោទប្រកាន់ថា មានការជាប់ពាក់ព័ន្ធ ឬនៅពីក្រោយសំណុំរឿងលោក កឹម សុខា ប្រធានអតីតគណបក្សសង្គ្រោះជាតិដើម្បីឱ្យតំណាងប្រទេសទាំងនោះ ចូលខ្លួនមកធ្វើជាសាក្សីបំភ្លឺនៅក្នុងតុលាការ ខណៈក្រុមសហមេធាវីលោក កឹម សុខា មើលឃើញថា នីតិវិធីនិងសវនាការមិនដំណើរការទៅមុខលឿន។
លោក អាង ឧត្តម សហមេធាវីលោក កឹម សុខា ប្រាប់ក្រុមអ្នកសារព័ត៌មាន ក្រោយបញ្ចប់សវនាការថា សវនាការនៅថ្ងៃទី ២០ មេសា តំណាងអយ្យការបានចោទសួរលោក កឹម សុខា ពាក់ព័ន្ធនឹងការបោះឆ្នោត ឆ្នាំ ២០១៣ ដដែលជាដដែល និង វិលចុះវិលឡើង ដូចសវនាការលើកមុនៗដែរ មិនមានអ្វីជាការដាក់បន្ទុកនោះទេ។ ទាល់តែចៅក្រមឡើងមកបញ្ជាក់ទើបគាត់បញ្ឈប់។
លោកបន្តថា ក្រៅពីចោទសួរ តំណាងអយ្យការបានធ្វើការអត្ថាធិប្បាយ និងធ្វើសេចក្តីសន្និដ្ឋានច្រើនជាងសំណួរ ដែលធ្វើឱ្យមានការខាតពេលសវនាការ និងធ្វើឱ្យនីតិវិធីកាន់តែអូសបន្លាយកាន់តែយូរថែមទៀត។ ម្យ៉ាង វាក៏ខុសទៅនឹងនីតិវិធីដែរ។ ប៉ុន្តែចៅក្រមវិញក៏មានការចោទសួរ និងឆ្លើយធ្វើឱ្យនីតិវិធីទៅមុខរហូត បើទោះបីមានការដោះបន្ទុកខ្លះ ឬមិនដោះបន្ទុកខ្លះក៏ដោយ។
បើតាមលោក អាង ឧត្តម ដោយមើលឃើញពីបញ្ហានេះ ក្រុមសហមេធាវីរបស់លោកនឹងដាក់ពាក្យស្នើទៅបណ្តាប្រទេសជាច្រើន មានសហគមន៍អឺរ៉ុបជាដើម ដែលជាប់ពាក់ព័ន្ធនឹងសំណុំរឿងសន្ទិដ្ឋភាពរបស់លោក កឹម សុខា នៅចុងខែនេះ ឬដើមខែក្រោយឱ្យមកចូលរួមឆ្លើយនៅក្នុងសវនាការ ដើម្បីជួយឱ្យតុលាការស្វែងរកការពិត។
លោកបញ្ជាក់ថា៖ «ទោះដឹងថា តុលាការមានចេតនាមិនកោះហៅក៏ដោយ។ សំណួរដែលសួរនេះ គឺមិនមានដាក់បន្ទុកយើងផង យើងនឹងហៅឱ្យគេមកឆ្លើយ សាក្សី ជួយតុលាការស្វែងរកការពិតឱ្យអ្នកទាំងអស់ហ្នឹងមកនិយាយការពិតថាមានត្រូវរ៉ូវ មានការឃុបឃិតមានសន្ទិដ្ឋភាពជាមួយពួកហ្នឹងអត់?»។
លោកបញ្ជាក់ទៀតថា ពាក់ព័ន្ធនឹងបញ្ហានេះ ក្រុមសហមេធាវីរបស់លោកស្នើឱ្យតុលាការកោះហៅសាក្សី ឱ្យចូលបំភ្លឺ និងមានអាជ្ញាធរបង្គាប់បញ្ជាយកសាក្សីមកសួរ និងស្តាប់ចម្លើយ ប៉ុន្តែតុលាការមិនធ្វើនោះទេ ដោយអះអាងថា ខុសអនុសញ្ញាទីក្រុងវីយែន ហើយក៏បានរុញមកឱ្យក្រុមសហមេធាវីរបស់លោកជាអ្នកធ្វើ។ ទោះយ៉ាងណា ក្រុមសហមេធាវីរបស់លោកនឹងធ្វើកិច្ចការនេះបើទោះបីតុលាការទទួល ឬមិនទទួលក៏ដោយ។
ពាក់ព័ន្ធនឹងបញ្ហានេះ ភ្នំពេញ ប៉ុស្តិ៍ មិនអាចសុំការអត្ថាធិប្បាយពីលោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញបានទេនៅថ្ងៃទី ២០ ខែមេសាដោយលោកប្រាប់ថា កំពុងរវល់បំពេញការងារនៅខាងក្រៅ មិនអាចឆ្លើយបានទេ ប៉ុន្តែនៅពេលចប់ការងារ លោកនឹងឆ្លើយតាមប្រព័ន្ធតេឡេក្រាមវិញ។ ទោះយ៉ាងណារហូតមកដល់ម៉ោងបោះពុម្ពផ្សាយកាសែតនៅយប់ថ្ងៃទី ២០ មេសាលោក ប្លង់ សុផល មិនទាន់បានឆ្លើយតបមកកាន់ភ្នំពេញប៉ុស្តិ៍នៅឡើយទេ។
លោក ឯម សុវណ្ណារ៉ា អ្នកវិភាគ និងជាសាស្ត្រាចារ្យវិទ្យាសាស្ត្រនយោបាយថ្លែងប្រាប់ភ្នំពេញប៉ុស្តិ៍នៅថ្ងៃទី ២០ ខែ មេសា ថា ភាគី លោក កឹម សុខា ត្រូវទាមទារឱ្យតុលាការបង្ហាញប្រទេស ឬស្ថាប័នណាខ្លះដែលជាប់ពាក់ព័ន្ធយកមកសួរនាំតាំងពីនៅមុនថ្ងៃរំលាយអតីតគណបក្សសង្គ្រោះជាតិមកម្ល៉េះ ប៉ុន្តែការស្នើសុំឱ្យប្រទេសទាំងនោះចូលមកបំភ្លឺ វាហាក់ដូចជាយឺតបន្តិច។
ទោះយ៉ាងណា លោកថា ការហៅប្រទេសដែលជាប់ពាក់ព័ន្ធឱ្យចូលមកធ្វើជាសាក្សីនេះ ក៏ជាចំណុចមួយដែលបញ្ជាក់ពីភាពស្អាតស្អំ និងត្រឹមត្រូវរបស់លោក កឹម សុខា ដែរ។ ដូច្នេះ តុលាការ មិនអាចគេចចេញពីការទាមទារស្វែងរកភាពច្បាស់លាស់នេះបានទេ។ លោកថ្លែងថា៖ «នេះ គឺជាកិច្ចការល្អ ដែលភាគីលោក កឹម សុខា ទាមទារឱ្យមានការបង្ហាញការពិត។ ទោះយ៉ាងណា សំណុំរឿងរបស់លោក កឹម សុខា មិនងាយនឹងឆាប់ចប់ទេ លុះត្រាតែមានឥទ្ធិពលពីខាងណាមួយ ជំរុញឱ្យមានការដោះស្រាយ ទើបឆាប់ចប់បាន»៕
វីដេអូ៖
