.jpg)
សកម្មភាពក្រុមគ្រូពេទ្យចាក់វ៉ាក់សាំងកូវីដ ១៩ ដល់ប្រជាពលរដ្ឋនាពេលកន្លងមក។ ហ៊ាន រង្សី
ភ្នំពេញៈ ប្រមុខរាជរដ្ឋាភិបាលកម្ពុជាបានបញ្ជាឱ្យបើកយុទ្ធនាការចាក់វ៉ាក់សាំងដូសជំរុញជាដូសទី៣ និងទី៤ ដោយតម្រង់ឆ្ពោះទៅតាមកម្មករ-កម្មការិនីនៅតាមរោងចក្រ អ្នករកស៊ីលក់ដូរនៅតាមទីផ្សារ និងអ្នកធ្វើការក្រៅប្រព័ន្ធ ដោយសារទីតាំងទាំងនោះជាកន្លែងប្រមូលផ្តុំមនុស្សច្រើន ដើម្បីឱ្យមានភាពស៊ាំសហគមន៍។
លោកនាយករដ្ឋមន្ត្រី ហ៊ុន សែន បានថ្លែងនាព្រឹកថ្ងៃទី ២០ ខែមេសា ដោយលោកបានបន្តអំពាវនាវចំពោះប្រជាពលរដ្ឋបន្តទៅទទួលយកវ៉ាក់សាំងដូសជំរុញជាដូសទី ៣ ឬដូសទី ៤ ពីព្រោះមកដល់ពេលនេះអ្នកចាក់ដូសទី ៣ ទើបបានជាង ៨ លាននាក់ក្នុងចំណោមមនុស្សដែលត្រូវចាក់ជាង ១៤ លាននាក់ ហើយដូសទី ៤ បានជាង ១ លាននាក់ប៉ុណ្ណោះ។
លោកមានប្រសាសន៍ថា៖ «អាជ្ញាធរត្រូវខិតខំរៀបចំនូវយុទ្ធនាការនេះដោយប្រមូលផ្តុំតម្រង់រករោងចក្រ ដោយសហការជាមួយនឹងម្ចាស់រោងចក្រឱ្យកម្មករសម្រាកចាក់វ៉ាក់សាំង ដោយសារនៅតាមរោងចក្រជាកន្លែងដែលងាយរងនូវការឆ្លង ហើយបើកើតឡើងវាធ្វើឱ្យមានការលំបាក»។
លោក ហ៊ុន សែន ក៏បានស្នើឱ្យរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង ត្រូវរៀបចំធ្វើការសហការជាមួយនឹងបណ្តារោងចក្រដើម្បីធ្វើកិច្ចការងារនេះឱ្យបានល្អក្នុងការចាក់សម្រុកជូនដល់កម្មករ-កម្មការិនីដើម្បីការការពារខ្លួនឱ្យបានល្អដើម្បីចៀសផុតពីហានិភ័យនៃការឆ្លង។
ភាពស៊ាំសហគមន៍គឺបានមកពីការចូលរួមយ៉ាងធំធេងរបស់ប្រជាពលរដ្ឋ ប៉ុន្តែដោយសារតែប្រជាពលរដ្ឋខ្វះការយល់ដឹង និងឃើញថាពុំមានអ្នកស្លាប់ និងមានអ្នកឆ្លងបន្ត ទើបធ្វើឱ្យពួកគាត់គិតថា ចាក់តែ ២ ដូសគឺគ្រប់គ្រាន់ហើយ ប៉ុន្តែលោក ហ៊ុន សែន បានបញ្ជាក់ថា ចាក់វ៉ាក់សាំង ២ ដូស នេះ អស់ប្រសិទ្ធភាពហើយ ដែលត្រូវចាក់ដូសទី ៣ ដើម្បីឱ្យមានប្រដាប់ការពារខ្លួន បើមិនដូច្នេះទេ ការឆ្លងអាចនឹងកើតមានបន្តទៀត។
លោក ហ៊ុន សែន បានថ្លែងថា៖ «យើងនៅមានមនុស្សយ៉ាងតិច ៦ លាននាក់ទៀតដែលត្រូវទទួលដូសទី ៣ ដែលអ្នកខ្លះដល់ពេលចាក់ និងខ្លះមិនទាន់ដល់ពេល ប៉ុន្តែភាគច្រើនដល់ពេលត្រូវចាក់ហើយ ហើយខ្លះក៏ហួសថ្ងៃចាក់ដែរ»។
លោកនាយករដ្ឋមន្ត្រីថ្លែងថាប្រទេសកម្ពុជាក្លាយជាប្រទេសទី ១០ របស់អាស៊ានដែលមានមនុស្សឆ្លងមេរោគកូវីដ ១៩ តិចជាងគេ ហើយលោកក៏បានស្នើឱ្យក្រសួង ស្ថាប័ន និងអាជ្ញាធរពាក់ព័ន្ធត្រូវបន្តតាមដាន កុំមានការធ្វេសប្រហែស និងត្រូវគ្រប់គ្រងឱ្យជាប់ ហើយក្នុងករណីចាំបាច់គឺត្រូវតែមានវិធានការជាបន្ទាន់ភ្លាម។ ការទប់ស្កាត់ជំងឺកូវីដ ១៩ មិនមែនស្ថិតនៅលើប្រទេសដែលមានវិស័យសុខាភិបាលទន់ខ្សោយនោះទេ ប៉ុន្តែគឺវាស្ថិតនៅលើវិធានការការពារ និងការចូលរួមពីប្រជាពលរដ្ឋ។
លោកថា៖ «មានការកង្វល់ចំពោះយើងថា យើងគឺជាប្រទេសមួយដែលមានប្រព័ន្ធសុខាភិបាលទន់ខ្សោយ បញ្ហានៅទីនេះបានបង្ហាញច្បាស់ មិនមែនបញ្ហាស្ថិតនៅត្រង់ទន់ខ្សោយ ឬរឹងមាំទេ ស្ថិតនៅត្រង់វិធានការ និងការចូលរួមរបស់ប្រជាជន»។
គួរបញ្ជាក់ផងដែរថា គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសជូនដំណឹងពីការរៀបចំនូវយុទ្ធនាការចាក់វ៉ាក់សាំងកូវីដ ១៩ ដូសជំរុញជាដូសទី ៣ និងដូសទី ៤ ដែលក្នុងនោះក្រុមគ្រូពេទ្យនៃក្រសួងការពារជាតិ ក្រុមគ្រូពេទ្យយុវជនស្ម័គ្រចិត្ត និងក្រុមគ្រូពេទ្យ ដែលរៀបចំដោយរដ្ឋបាលរាជធានី-ខេត្តនឹងចុះចាក់វ៉ាក់សាំងកូវីដ ១៩ តាមទីតាំងដែលបានកំណត់ផងដែរនៅគ្រប់ ២៥ រាជធានីខេត្តទូទាំងប្រទេស៕
