ភ្នំពេញៈ គម្រោងការពារទឹកជំនន់ និងកែលម្អប្រព័ន្ធប្រឡាយលូជាជំនួយឥតសំណងរបស់ប្រទេសជប៉ុនក្នុងទំហំទឹកប្រាក់ប្រមាណ ៣៦ លានដុល្លារត្រូវបានដាក់សម្ពោធឱ្យប្រើប្រាស់ដើម្បីដោះស្រាយបញ្ហាទឹកលិចនៅតំបន់ជុំវិញ និងខាងជើងរមណីយដ្ឋានប្រវត្តិសាស្ត្រវត្តភ្នំ ក្នុងខណ្ឌដូនពេញ និងតំបន់សង្កាត់បឹងកក់ទី ១ និងសង្កាត់បឹងកក់ទី ២ ក្នុងខណ្ឌទួលគោក។
ពិធីសម្ពោធសមិទ្ធផលនានា ដែលជាគម្រោងការពារទឹកជំនន់ និងកែលម្អប្រព័ន្ធប្រឡាយលូ ក្នុងរាជធានី-ភ្នំពេញជំហានទី ៤ នេះធ្វើឡើងក្រោមអធិបតីភាព លោក ហ៊ុន សែន នាយករដ្ឋមន្ដ្រីនៃកម្ពុជា និងតំណាងឯកអគ្គរាជទូតជប៉ុនប្រចាំនៅកម្ពុជា។
លោកនាយករដ្ឋមន្ដ្រីថ្លែងថា គម្រោងអភិវឌ្ឍន៍នូវសមិទ្ធផលនានានៅភ្នំពេញនេះ ថ្វីដ្បិតតែអស់ថវិកាច្រើន តែបានផ្តល់នូវប្រយោជន៍យ៉ាងច្រើនសម្រាប់ប្រជាពលរដ្ឋនៅទីក្រុងភ្នំពេញ ជាពិសេសការបញ្ចៀសការជន់លិចរាជធានីភ្នំពេញ និងការកកស្ទះសំរាមជាដើម។
លោកថ្លែងថា៖ «ថ្ងៃនេះយើងពិតជាមានសេចក្ដីរីករាយដោយសារចូលឆ្នាំថ្មីនេះ យើងសម្ពោធដាក់ឱ្យប្រើប្រាស់នូវសមិទ្ធផលថ្មីមួយទៀត ដែលកើតចេញពីកិច្ចសហប្រតិបត្ដិការរវាងកម្ពុជានិងជប៉ុន នោះគឺសមិទ្ធផលក្នុងគម្រោង [ការពារ] ទឹកជំនន់ និងកែលម្អប្រព័ន្ធប្រឡាយលូក្នុងរាជធានីភ្នំពេញជំហានទី ៤»។
លោកនាយករដ្ឋមន្ដ្រីបានថ្លែងអំណរគុណ ចំពោះរដ្ឋាភិបាល និងប្រជាជនជប៉ុន តាមរយៈទីភ្នាក់ងារអភិវឌ្ឍន៍របស់ជប៉ុន (JICA) ដែលបានសិក្សាយ៉ាងច្បាស់លាស់លើការការពារទឹកជំនន់ និងការកែលម្អប្រព័ន្ធប្រឡាយលូនៅកម្ពុជា។
លោកថ្លែងថា៖ «ជប៉ុនជាចំណែកមួយក្នុងការជួយឱ្យកម្ពុជាទទួលបានឯករាជ្យនៅថ្ងៃទី ៩ ខែវិច្ឆិកា ឆ្នាំ ១៩៥៣ ផងដែរ»។
លោកនាយករដ្ឋមន្ត្រី ហ៊ុន សែន ក៏បានអរគុណ ចំពោះរដ្ឋាភិបាលជប៉ុនដែលតែងតែជួយដល់ប្រទេសកម្ពុជា និងអបអរសាទរចំពោះសមិទ្ធផលនានាក្នុងគម្រោងការពារទឹកជំនន់ និងកែលម្អប្រព័ន្ធលូប្រព័ន្ធប្រឡាយក្នុងរាជធានី-ភ្នំពេញ។
មន្ទីរសាធារណការ និងដឹកជញ្ជូនរាជធានីភ្នំពេញបានឱ្យដឹង ថា សមិទ្ធផលនៃគម្រោងការពារ ទឹកជំនន់ និងកែលម្អប្រព័ន្ធប្រឡាយលូ ក្នុងរាជធានីភ្នំពេញ ជាជំនួយឥតសំណងរបស់ប្រទេសជប៉ុននេះ បាននិងកំពុងដោះស្រាយបញ្ហាទឹកលិចនៅតំបន់ជុំវិញ និងខាងជើងរមណីយដ្ឋានប្រវត្តិសាស្ត្រវត្តភ្នំក្នុងខណ្ឌដូនពេញ និងតំបន់ភូមិសាស្ត្រសង្កាត់បឹងកក់ទី ១ សង្កាត់បឹងកក់ទី ២ ក្នុងខណ្ឌទួលគោក ដោយ បានចំណាយថវិកាអស់ប្រមាណ ៣៦ លានដុល្លារអាមេរិក។
សមិទ្ធផលទាំងនេះ រួមមាន ទី ១ ស្ថាបនាដាក់បណ្តាញលូខ្នាតធំប្រវែង ១២,៦ គីឡូម៉ែត្រ។ ទី ២ សាងសង់អាងស្តុកទឹកក្រោមដីក្រោមសួនច្បារមាត់ទន្លេទល់មុខក្រុមប្រឹក្សាអភិវឌ្ឍន៍កម្ពុជា ដែលមានទំហំបណ្តោយ ១៣៥ ម៉ែត្រ ទទឹង ១៣,៥ ម៉ែត្រ។ ជម្រៅ ៤ ម៉ែត្រ មានសមត្ថភាពស្តុកទឹកបាន ៦ ៥០០ ម៉ែត្រគុប និងសង់ស្ថានីយបូមទឹក មានសមត្ថភាពបូមទឹក ១,៤ ម៉ែត្រគុបក្នុង ១ វិនាទី។ ទី ៣ បំពាក់ម៉ាស៊ីនរបារត្រងសំរាមមេកានិកស្វ័យប្រវត្តិចំនួន ៥ កន្លែងនៅមុខអាងស្តុកទឹកក្រោមដី តាមមាត់ទន្លេរួមមានអាងក្រោមដីសួនច្បារទល់មុខក្រុមប្រឹក្សាអភិវឌ្ឍន៍កម្ពុជា សួនច្បារផ្សារចាស់ សួនច្បារព្រះគម្លង់ ១ សួនច្បារព្រះគម្លង់ ២ និងសាលសន្និសីទចតុមុខ។ ទី ៤ ជំនួយរថយន្តបូមទឹកចល័តចំនួន ២ គ្រឿង។
បើតាមមន្ទីរសាធារណការ តាមរយៈនៃការដាក់ឱ្យដំណើរការជាបណ្តោះអាសន្ន កាលពីខែតុលា វិច្ឆិកាឆ្នាំ ២០២១ ឃើញថា ក្នុងករណីភ្លៀងធ្លាក់កម្រិតក្រោម ៤០ មិល្លីម៉ែត្រ ក្នុង ១ ម៉ោង តំបន់ដែលធ្លាប់លិចលង់ធ្ងន់ធ្ងរដូចជាជុំវិញវត្តភ្នំ ផ្លូវលេខ ៤៧ ផ្លូវលេខ ៩០ ផ្លូវលេខ ៩២ ផ្លូវលេខ ៥៩៦ ផ្លូវលេខ ៥៩២ ផ្លូវលេខ ៣១៥ ផ្លូវលេខ ២៨៩ ផ្លូវលេខ ២៨៧ ផ្លូវលេខ ៦០៨ ស្តុបផ្សារមាន់អាំង មុខវិទ្យាល័យឥន្ទ្រទេវី ស្តុបផ្ទះសំណាក់ស្រែលាភជំនន់ទឹកភ្លៀងមិនបណ្ដាលឱ្យលិចលង់ទៀតទេ។ ប៉ុន្តែបើករណីភ្លៀងធ្លាក់ខ្លាំងលើសពី ៤០ មិល្លីម៉ែត្រ ក្នុង ១ ម៉ោង ទឹកដែលធ្លាប់លិចលង់រយៈពេល ៣ ម៉ោង ទៅ ៤ ម៉ោង បានកាត់បន្ថយមកនៅត្រឹម ៣០ នាទី ទៅ ១ ម៉ោងប៉ុណ្ណោះ។
លោក ឃួង ស្រេង អភិបាលនៃគណៈអភិបាលរាជធានីភ្នំពេញថ្លែងក្នុងនាមប្រជាពលរដ្ឋទាំងអស់ក្នុងរាជធានីភ្នំពេញ ដោយអរគុណចំពោះរដ្ឋាភិបាល និងប្រជាជនជប៉ុន តាមរយៈស្ថានទូតជប៉ុន និងទីភ្នាក់ងារ JICA ប្រចាំនៅកម្ពុជា ដែលបានផ្ដល់នូវជំនួយឧបត្ថម្ភជាថវិកា សម្ភារ និងបច្ចេកទេសដល់រដ្ឋបាលរាជធានីភ្នំពេញក្នុងដំណើរការអនុវត្ដគម្រោងការពារទឹកជំនន់ និងកែលម្អប្រព័ន្ធប្រឡាយលូ ដែលសម្រេចបាននូវសមិទ្ធផលជាច្រើនជាបន្តបន្ទាប់។ ក្នុងនោះរាប់ចាប់ពីជំហានទី ១ រហូតដល់ជំហានទី ៤ រួមទាំងគម្រោងសាងសង់ស្ថានីយអាងប្រព្រឹត្តិកម្មទឹកកខ្វក់ជើងឯក ដែលទើបនឹងបើកការដ្ឋានសាងសង់កាលពីថ្ងៃទី ២២ ខែកុម្ភៈ ឆ្នាំ ២០២២។
លោកបានថ្លែងថា៖ «សមិទ្ធផលទាំងនេះមិនត្រឹមតែជាសក្ខីភាពបង្ហាញឱ្យឃើញ ពីការយកចិត្ដទុកដាក់របស់រាជរដ្ឋាភិបាលកម្ពុជាក្នុងការកៀរគរការចូលរួមឧបត្ថម្ភគាំទ្រ និងអភិវឌ្ឍហេដ្ឋារចនាសម្ព័ន្ធ រូបវន្តក្នុងទីក្រុងឱ្យកាន់តែមានភាពល្អប្រសើរប៉ុណ្ណោះទេ ប៉ុន្ដែថែមទាំងបានរួមចំណែកយ៉ាងសំខាន់ក្នុងការរឹតចំណងសាមគ្គីភាព មិត្ដភាព និងកិច្ចសហប្រតិបត្ដិការរវាងកម្ពុជា និងជប៉ុនឱ្យកាន់តែរឹងមាំបន្ថែមទៀត»។
លោក Karimata Atsushi តំណាងឯកអគ្គរដ្ឋទូតជប៉ុនប្រចាំនៅកម្ពុជាបានថ្លែងថា នៅរាជធានីភ្នំពេញ វិស័យនគរូបនីយកម្មបាននិងកំពុងរីកចម្រើនដោយសារប្រទេសកម្ពុជាមានកំណើនសេដ្ឋកិច្ចខ្ពស់។ ប៉ុន្ដែរាជធានីភ្នំពេញមានលក្ខណៈសណ្ឋានដី ដែលមានហានិភ័យទឹកជំនន់ខ្ពស់ដោយសារតែសណ្ឋានដីមានសភាពរាបស្មើ និងដីទាបជាងងាយនឹងដក់ទឹក។
លោកថ្លែងថា៖ «ការរៀបចំ និងកែលម្អប្រព័ន្ធប្រឡាយលូ គឺជាកិច្ចការងារចាំបាច់មិនអាចខ្វះបានសម្រាប់ការអភិវឌ្ឍសេដ្ឋកិច្ចបន្ថែមទៀតនៅរាជធានីភ្នំពេញ និងការកែលម្អបរិយាកាសជីវភាពរស់នៅរបស់ប្រជាជននៅរាជធានីភ្នំពេញ»។
បើតាមទីភ្នាក់ងារ JICA ប្រចាំប្រទេសកម្ពុជា គម្រោងកែលម្អប្រព័ន្ធប្រឡាយលូ ដែលមានទឹកប្រាក់ប្រមាណ ៣៦ លានដុល្លារអាមេរិកនេះ ត្រូវបានបញ្ចប់ក្នុងខែតុលា ឆ្នាំ ២០២១ ដោយគ្របដណ្តប់ផ្នែកខាងជើងនៃតំបន់វត្តភ្នំ និងទួលគោក។
គម្រោងនេះមានសមាសភាព ដូចជា ទី ១ ដំឡើងប្រព័ន្ធលូប្រវែងសរុប ១២,៥ គីឡូម៉ែត្រ ទី ២ សាងសង់អាងស្តុកទឹកក្រោមដី និងស្ថានីយបូមទឹកនៅសួនច្បារសាធារណៈទល់មុខក្រុមប្រឹក្សាអភិវឌ្ឍន៍កម្ពុជា CDC ដែលស្ថិតនៅមាត់ទន្លេ។ ទី៣ ដំឡើងម៉ាស៊ីនមេកានិច (ម៉ាស៊ីនស្ទាក់សំរាមស្វ័យប្រវត្តិ) ចំនួន ៥ នៅច្រកទ្វារស្ថានីយបូមទឹក ទី ៤ លទ្ធកម្មរថយន្តបំពាក់ម៉ាស៊ីនបូមទឹកចំនួន ២ និងទី ៥ ជំនួយក្នុងការចាប់ផ្តើមការងារប្រតិបត្តិការ និងថែទាំ។
JICA ឱ្យដឹងថា៖ «បន្ទាប់ពីគម្រោងនេះបានបញ្ចប់ វានឹងជួយកាត់បន្ថយបញ្ហាជន់លិច នៅតំបន់ប៉ែកខាងជើងវត្តភ្នំ និងទួលគោក។ លើសពីនេះទៅទៀត វាក៏បានរួមចំណែកធ្វើឱ្យកាន់តែប្រសើរឡើងដល់អនាម័យ ចរាចរណ៍ និងសកម្មភាពសេដ្ឋកិច្ចផងដែរ»។
បើតាម JICA គម្រោងនេះត្រូវបានអនុវត្តដោយរដ្ឋបាលរាជធានីភ្នំពេញដើម្បីដោះស្រាយបញ្ហាការជន់លិចដោយទឹកភ្លៀងដែលកំពុងប្រឈមនៅក្នុងទីក្រុង។ JICA បានថ្លែងអំណរគុណភាគីពាក់ព័ន្ធទាំងអស់ ចំពោះការខិតខំប្រឹងប្រែងយ៉ាងសកម្មរហូតដល់បញ្ចប់គម្រោង៕
វីដេអូ៖