ភ្នំពេញៈ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ថ្លែងថាបច្ចុប្បន្ននៅតាមបុរីជិត ១០០ កន្លែងនៅរាជធានីភ្នំពេញ ស្ទើរតែមិនមានសេវាទូរស័ព្ទ និងសេវាអ៊ីនធឺណិត ដោយសារតែពេលសាងសង់ម្ចាស់បុរីមិនបានគិតគូរពីការតភ្ជាប់បណ្តាញនៅក្នុងទីតាំងបុរី ។
លោករដ្ឋមន្ត្រីក្រសួងប្រៃសណីយ៍បានថ្លែងបែបនេះក្នុងពិធីចុះអនុស្សរណៈយោគយល់គ្នារវាងក្រសួងបរិស្ថានជាមួយក្ម្រហ៊ុនសូហ្វវែរឧស្សាហកម្មឌីជីថលសៀមិនស៍ វិទ្យាស្ថានបច្ចេកវិទ្យាកម្ពុជា បណ្ឌិតសភាបច្ចេកវិទ្យាឌីជីថលកម្ពុជា និងសាលាស្ទឹមមីង ខេមបូឌា នៅទីស្តីការក្រសួងបរិស្ថាននាថ្ងៃទី២១ ខែមេសា។
អនុស្សរណៈនៃការយោគយល់នេះស្តីពីការប្រើប្រាស់បច្ចេកវិទ្យាអ៊ីចហ្ស៊ីលីរេតធើរបស់ក្រុមហ៊ុនសៀមិនស៍ ដើម្បីឲ្យសិស្ស និស្សិត មានសមត្ថភាពពូកែទាំងក្នុងនិងក្រៅថ្នាក់រៀននិងដើម្បីពង្រឹងភាពជាដៃគូជាមួយគ្រឹះស្ថានអប់រំនិងក្រុមហ៊ុនឧស្សាហកម្មដើម្បីរៀបចំកម្លាំងពលកម្មដែលមានផ្នត់គំនិតឌីជីថលសម្រាប់ប្រែក្លាយគំនិតឲ្យទៅជាការពិតនិងសម្រាប់បង្កើតដំណោះស្រាយបច្ចេកវិទ្យាសម្រាប់ឧស្សាហកម្ម ៤.០ របស់កម្ពុជា ។
លោករដ្ឋមន្ត្រីបានលើកឡើងថា ក្រសួងកំពុងធ្វើការជាមួយម្ចាស់បុរី ដៃគូពាក់ព័ន្ធ និងប្រតិបត្តិករផ្សេងៗទៀត ដើម្បីជំរុញធ្វើយ៉ាងណាឲ្យបុរីទាំងនោះមានសេវាគ្រប់គ្រាន់ទាំងសេវាទូរស័ព្ទ និងអ៊ីនធឺណិត ប៉ុន្តែយ៉ាងណាក៏ដោយ លោកបានអះអាងថា ការងារនេះមិនងាយស្រួលឡើយព្រោះនឹងជួបប្រទះនូវបញ្ហាជាច្រើន។
លោកបញ្ជាក់ថា៖«បញ្ហានោះគឺបុរីអត់ដីសម្រាប់សាងសង់បង្គោលអង់តែន ម្ចាស់បុរីមិនចង់សហការ កន្លែងខ្លះអត់មានចិញ្ចើមថ្នល់ដើម្បីតភ្ជាប់បណ្តាញចូលទៅក្នុងបុរី។ទាំងអស់នេះសុទ្ធតែជារឿងដែលយើងត្រូវដោះស្រាយ។ដូច្នេះអាទិភាពរបស់ក្រសួងប្រៃសណីយ៍និងទូរគមនាគមន៍ ធ្វើយ៉ាងម៉េច ក្នុងពេល១ឆ្នាំ ២ឆ្នាំនេះ ធ្វើឲ្យសេវាទូរគមនាគមន៍បានល្អប្រើសើរ» ។
លោក នៅ ស៊ីវុត្ថា អ្នករស់នៅក្នុងបុរីពិភពថ្មីកួរស្រូវ២ដែលនៅមិនឆ្ងាយពីទីក្រុងភ្នំពេញ ថ្លែងនៅថ្ងៃទី ២១ ខែមេសាថា នៅក្នុងបុរីដែលលោករស់នៅបច្ចុប្បន្ននេះគឺមិនមានសេវាទូរស័ព្ទនិងអ៊ីនធឺណិតគ្រប់ប្រព័ន្ធទូរស័ព្ទទាំងអស់សម្រាប់ប្រើប្រាស់ដែលធ្វើឱ្យពិបាកក្នុងការទាក់ទង ទៅបងប្អូន ឬ ធ្វើកិច្ចការងារចាំបាច់ ។
លោកថ្លែងថា៖«អ្នកមានទូរស័ព្ទរស់នៅក្នុងបុរីដូចកាន់ដំថ្ម អត់អាចទាក់ទងបាន ព្រោះអត់សេវា។ ដោយមើលឃើញពីការលំបាកនេះ អ្នកខ្លះគេទិញប្រព័ន្ធចាប់សេវាដាក់នៅលើដំបូលផ្ទះ ប៉ុន្តែពេលខ្លះក៏ដើរស្រួល ពេលខ្លះក៏ដើរមិនស្រួល ។និយាយទៅរស់ពិបាកជាងស្លាប់ទៅទៀត »។
លោកបានស្នើឱ្យក្រសួងស្ថាប័នពាក់ព័ន្ធជាពិសេសក្រសួងប្រៃសណីយ៍ និងទូរគមនាគមន៍ ជួយពន្លឿងការដោះស្រាយលើបញ្ហានេះឱ្យបានលឿនដើម្បីឱ្យប្រជាពលរដ្ឋអាចប្រើប្រាស់ដើម្បីឆ្លើយតបទៅនឹងគោលនយោបាយឌីជីថលរបស់រាជរដ្ឋាភិបាលដែលបានដាក់ចេញកន្លងមកនេះ ។
លោក ជា វ៉ាន់ដេត បានគូសបញ្ជាក់ថា ក្រសួងនឹងបន្តធ្វើការយ៉ាងជិតស្និទ្ធជាមួយគ្រប់តួអង្គទាំងអស់ ជាពិសេសសហគមន៍ធុរកិច្ចឌីជីថល សហគ្រាសធនតូចនិងមធ្យម ក្រុមហ៊ុនធុរកិច្ចឌីជីថល និងដៃគូពាក់ព័ន្ធទាំងអស់ ដើម្បីដាក់ចេញនូវវិធានការនិងសកម្មភាពជាក់លាក់ សម្រួល និងគាំទ្រដល់ការចាប់យកនិងការធ្វើបដិវត្តន៍កម្មឌីជីថលនៅកម្ពុជាសំដៅចាប់យកនូវកាលានុវត្តនៃការវិវត្តឆាប់រហ័ស នៃបច្ចេកវិទ្យា និងបដិវត្តន៍ឧស្សាហកម្មជំនាន់ទី៤ ៕