.jpg)
យុទ្ធនាការប្រមូលសំរាមនៅតាមឆ្នេរខេត្តព្រះសីហនុកាលពីថ្ងៃទី២០ មេសា ។ រូបថត រដ្ឋបាលខេត្ត
សៀមរាបៈ រដ្ឋបាលខេត្តមួយចំនួនបានសហការជាមួយភាគីពាក់ព័ន្ធ និងប្រជាពលរដ្ឋក្នុងខេត្ដធ្វើយុទ្ធនាការបោសសម្អាតអនាម័យ និងបរិស្ថាននៅតាមទីប្រជុំជនទីក្រុង និងតាមឆ្នេរសមុទ្រដើម្បីលើកកម្ពស់ការថែរក្សាអនាម័យ បរិស្ថានស្អាត និងជំរុញការស្រឡាញ់បរិស្ថានស្អាតកាន់ទៅដល់មហាជន។
កាលពីថ្ងៃទី២១ ខែមេសា រដ្ឋបាលខេត្តសៀមរាបសហការជាមួយរដ្ឋបាលក្រុងសៀមរាបនិងសហភាពសហព័ន្ធយុវជនកម្ពុជាខេត្តបានរៀបចំបើកយុទ្ធនាការបោសសម្អាតអនាម័យ និងបរិស្ថាន តាមដងផ្លូវសំខាន់ៗ ក្នុងក្រុងសៀមរាប ដើម្បីលើកកម្ពស់សោភណភាពក្រុងសៀមរាប។
ការធ្វើយុទ្ធនាការនេះដឹកនាំដោយលោក អ៊ឹង គឹមលាង អភិបាលរងខេត្តសៀមរាបនិងមានការចូលរួមពីថ្នាក់ដឹកនាំ មន្ត្រីរាជការនៃមន្ទីរ អង្គភាពនានាក្នុងខេត្ត រដ្ឋបាលក្រុង ក្រុមយុវជននៃសហភាពសហព័ន្ធយុវជនកម្ពុជាខេត្ត លោកគ្រូអ្នកគ្រូ សិស្សានុសិស្ស និងប្រជាពលរដ្ឋក្នុងក្រុងសៀមរាបជាច្រើនរូបទៀត។
លោកស្រី លឹម ផល្លីកា អភិបាលក្រុងសៀមរាបស្តីទី លើកឡើងថា ថ្ងៃនេះរដ្ឋបាលខេត្តសៀមរាប ការធ្វើយុទ្ធនាការបោសសម្អាតអនាម័យ និងបរិស្ថាន តាមដងផ្លូវសំខាន់ៗក្នុងក្រុងសៀមរាប ដើម្បីរួមគ្នាជំរុញការស្រឡាញ់បរិស្ថានស្អាត និងដើម្បីលើកកម្ពស់សោភណភាពក្រុងឱ្យមានសម្រស់ស្រស់ស្អាតជាទីក្រុងគ្មានសំរាម និងជាទីក្រុងប្រកបដោយភាពទាក់ទាញ។
លោកស្រីថ្លែងថា៖«ការធ្វើយុទ្ធនាការនេះដើម្បីឱ្យបរិស្ថានស្អាត ស័ក្ដិសមជាកូនចៅរបស់ដូនតាខ្មែរសម័យអង្គរ និងពង្រីកនូវគំនិតស្រឡាញ់បរិស្ថានដែលជាអត្តសញ្ញារបស់សៀមរាបផ្ទះខ្ញុំឱ្យកាន់តែធំទូលាយទៅដល់មហាជនគ្រប់ស្រទាប់ឱ្យស្រឡាញ់បរិស្ថានគ្រប់ៗគ្នាដោយចាប់ផ្តើមគ្មានសំរាមរាយប៉ាយនៅមុខផ្ទះរៀងៗខ្លួន»។
លោក អ៊ឹង គឹមលាង អភិបាលរងខេត្តសៀមរាបលើកឡើងថា បន្ទាប់ពីរាជរដ្ឋាភិបាលបានផ្ដល់ជូននូវការកសាងហេដ្ឋារចនាសម្ព័ន្ធផ្លូវចំនួន៣៨ខ្សែ ប្រព័ន្ធលូបង្ហូរទឹក កែលម្អដងស្ទឹងសៀមរាប កែលម្អស្ថាបនាឱ្យមានផ្លូវសម្រាប់ថ្មើរជើង ផ្លូវជិះកង់ និងជម្រាលសម្រាប់ជនមានពិការភាពផងនោះបានធ្វើឱ្យក្រុងសៀមរាបទាំងមូលកាន់តែមានសោភណភាពស្រស់បំព្រង ស័ក្ដិសមជាក្រុងទេសចរណ៍វប្បធម៌ ប្រវត្តិសាស្ត្រ និងធម្មជាតិ។
ការអភិវឌ្ឍថ្មីនេះបានបង្កើតបាននូវភាពទាក់ទាញចំណាប់អារម្មណ៍កាន់តែខ្លាំងឡើងពីសំណាក់ប្រជាពលរដ្ឋទាំងនៅក្នុងខេត្ត និងក្រៅខេត្តឱ្យចង់មកទស្សនាខេត្តសៀមរាបកាន់តែច្រើនឡើង ខណៈរយៈពេល ៣ថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២២កន្លងទៅនេះ ខេត្តសៀមរាបស្ថិតក្នុងចំណាត់ថ្នាក់លេខ៣ក្នុងចំណោមរាជធានី ខេត្តទាំង២៥ ដែលមានអ្នកទេសចរចូលមកទស្សនាកម្សាន្តច្រើនជាងគេ។
លោកអំពាវនាវដល់ប្រជាពលរដ្ឋ ជាពិសេសអាជីវករនិងម្ចាស់អាជីវកម្មដ្ឋាននានាដែលកំពុងប្រកបអាជីវកម្មតាម ដងផ្លូវសំខាន់ៗក្នុងក្រុងសៀមរាប ភោជនីយដ្ឋាន សណ្ឋាគារ ផ្ទះសំណាក់និងលំនៅឋានឯកជន ឱ្យចូលរួមសម្អាតអនាម័យបរិស្ថានជាប្រចាំ ដោយការបោសសម្អាត និងវេចខ្ចប់សំណល់ សំរាមដាក់ទៅតាមធុងសំរាម តាមគោលដៅ និងរួសរាន់បញ្ចេញសំរាមទៅតាមម៉ោងកំណត់ដែលអាជ្ញាធរបានកំណត់។
ដោយឡែកកាលពីថ្ងៃទី២០ ខែមេសានេះ លោក គួច ចំរើន អភិបាលខេត្តព្រះសីហនុ បានដឹកនាំធ្វើយុទ្ធនាការផ្សព្វផ្សាយទីក្រុងស្អាតឆ្នេរស្អាតដើម្បីលើកកម្ពស់សណ្តាប់ធ្នាប់បរិស្ថាននិងអនាម័យសាធារណៈនៅទីតាំងឆ្នេរអូរឈើទាល២ ក្រុងព្រះសីហនុដោយមានការចូលរួមពីលោកលោកស្រីជាអភិបាលរងខេត្តអភិបាលរងក្រុងស្រុកប្រធានមន្ទីរអង្គភាពមន្ត្រីរាជការ កងកម្លាំងប្រដាប់អាវុធ សមាគមភ្នាក់ងារដឹកជញ្ជូនទេសចរណ៍ជលយានខេត្ត សហគមទេសចរណ៍កោះរ៉ុង សមាគមសណ្ឋាគារ និងភោជនីយដ្ឋានសរុបអ្នកចូលរួមប្រមាណ ៥០០នាក់ផងដែរ។
លោកថ្លែងថារាជរដ្ឋាភិបាលបានដាក់ចេញនូវយុទ្ធនាការទស្សនាស្រុកយើងក្រោមស្មារតីស្រឡាញ់ជាតិ សំដៅជំរុញចលនាទេសចរផ្ទៃក្នុងតាមរយៈការបង្កលក្ខណៈងាយស្រួលឱ្យប្រជាពលរដ្ឋអាចធ្វើដំណើរបានទូទាំងប្រទេសប្រកបដោយសុវត្ថិភាព ធានាបានសន្តិសុខ សុវត្ថិភាព និងសណ្តាប់ធ្នាប់សាធារណៈតាមឆ្នេរសមុទ្រត្រៀមបង្ការទប់ស្កាត់គ្រោះធម្មជាតិ និងគ្រោះមហន្តរាយផ្សេង។
លោកបន្តថាខេត្តព្រះសីហនុទទួលបានបរិស្ថានស្អាតមានភ្ញៀវទេសចរមកលេងកម្សាន្តច្រើនហើយយើងក៏បានយកភាពស្រស់ស្អាត ក្រោយការរៀបចំរបស់យើងទៅជាបេក្ខភាពប្រឡងប្រណាំងទីក្រុងស្អាតនៃក្រុងព្រះសីហនុ។ យើងនឹងទទួលបានចំណាត់ថ្នាក់ល្អជាបន្តបន្ទាប់ទៀត»។
លោកថា៖«យើងបើកយុទ្ធនាការដើម្បីបញ្ចប់នូវសំណល់ដែលនៅសេសសល់ពីភ្ញៀវដែលមកកម្សាន្តក្នុងឱកាសបុណ្យចូលឆ្នាំខ្មែរកន្លងទៅធ្វើឱ្យទីក្រុងរបស់យើងមានភាពស្អាតជាប្រចាំដើម្បីឱ្យបេក្ខភាពទីក្រុងស្អាតរបស់យើងទទួលបានការវាយតម្លៃសមស្របក្នុងការផ្តល់ចំណាត់ថ្នាក់ទីក្រុងស្អាត»។
កាលពីថ្ងៃទី២០ ខែមេសានោះ មន្ទីរបរិស្ថានខេត្តមណ្ឌលគិរីក៏បានធ្វើយុទ្ធនាការសម្អាតបរិស្ថានក្នុងបរិវេណក្រុងសែនមនោរម្យផងដែរ។ យុទ្ធនាការនេះដឹកនាំដោយលោក ឌិន ប៊ុនធឿន អនុប្រធានបរិស្ថានខេត្តមណ្ឌលគិរី ប្រធានមន្ទីរបរិស្ថានខេត្តមណ្ឌលគិរី ព្រមទាំងមានការចូលរួមពីមន្ដ្រី មន្ទីរបរិស្ថាន និងមន្ត្រីឧទ្យានុរក្សជាច្រើនរូបទៀត។
តាមរយៈយុទ្ធនាការនេះ លោក ឌិន ប៊ុនធឿន បានជំរុញឱ្យក្រុមហ៊ុនប្រមូលសំរាមត្រូវមានភាពម្ចាស់ការលើខ្លួនឯង ព្រោះលោកមើលឃើញថា តាំងពីមុនពិធីបុណ្យចូលឆ្នាំប្រពៃណីជាតិរហូតមកទល់ពេលនេះមិនទាន់ឃើញក្រុមហ៊ុនប្រមូលសំរាមវិលត្រឡប់មកប្រមូលសំរាមក្នុងក្រុងសែនមនោរម្យវិញទេ ដូច្នេះទើបមន្ទីរបរិស្ថានបានប្រើប្រាស់ធនធានផ្ទាល់ដើម្បីប្រមូលសំរាមក្នុងក្រុងសែនមនោរម្យ។
លោកសំណូមពរដល់ស្ថាប័នសាធារណៈ និងឯកជន អាជ្ញាធរគ្រប់លំដាប់ថ្នាក់ ប្រជាពលរដ្ឋចូលរួមធ្វើអនាម័យ និងថែរក្សាបរិស្ថានជាប្រចាំនៅតាមមូលដ្ឋានរបស់ខ្លួន និងស្នើឱ្យអាជ្ញាធរមូលដ្ឋាន ជាមួយអ្នកពាក់ព័ន្ធធ្វើការអប់រំផ្សព្វផ្សាយដល់ប្រជាពលរដ្ឋពីការគ្រប់គ្រងទុកដាក់សំរាម និងសំណល់រឹងឱ្យបានត្រឹមត្រូវផងដែរ។
លោក ប៊ុនធឿន ថ្លែងថា៖«ខ្ញុំសង្ឃឹមថាការធ្វើយុទ្ធនាការសម្អាតនេះនឹងក្លាយជាចរន្តចលករដែលជំរុញឱ្យមានការផ្តើមធ្វើសកម្មភាពមេត្រីភាពបរិស្ថានចេញពីបុគ្គលម្នាក់ៗក្នុងការចេះទទួលខុសត្រូវក្នុងការទុកដាក់សំរាម សំណល់រឹង និងមិនបោះចោលពាសវាលពាសកាលនៅតាមទីសាធារណៈជាហេតុធ្វើឱ្យប៉ះពាល់ដល់សោភណភាពទីក្រុងដែលពោរពេញដោយសម្រស់ធម្មជាតិមួយនេះ ជាពិសេសគឺសេចក្តីថ្លៃថ្នូររបស់ខ្លួនយើងផ្ទាល់»៕
