ព្រៃវែងៈ អន្តរក្រសួង គាំទ្រចំពោះការសិក្សាពីការកំណត់ និងរៀបចំបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្ត្រអតីត នគរភ្នំ-ឈើកាច់-បាភ្នំ ដែលជាទីតាំងដ៏សំខាន់ នៅក្នុងប្រវត្តិសាស្ត្រនៃនគរគោកធ្លក ឬនគរភ្នំដើមកំណើតទឹកដីនៃព្រះរាជាណាចក្រកម្ពុជា ស្ថិតនៅក្នុងឃុំជើងភ្នំ និងឃុំឈើកាច់ ស្រុកបាភ្នំ។
លោក សាយ សំអាល់ រដ្ឋមន្ត្រីក្រសួងបរិស្ថានបានដឹកនាំកិច្ចប្រជុំអន្តរក្រសួង ស្តីពីការសិក្សា កំណត់ និងរៀបចំបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្ត្រនគរភ្នំ-ឈើកាច់បាភ្នំ ស្ថិតនៅក្នុងឃុំជើងភ្នំ និងឃុំឈើកាច់ ស្រុកបាភ្នំ កាលពីថ្ងៃទី ២០ ខែមេសា ឆ្នាំ ២០២២ នៅទីស្ដីការក្រសួងបរិស្ថាន។
កិច្ចប្រជុំនេះមានការចូលរួមពីតំណាងក្រសួងវប្បធម៌ និងវិចិត្រសិល្បៈ ក្រសួងមហាផ្ទៃ ក្រសួងការពារជាតិ ក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី នគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ ក្រសួងរ៉ែ និងថាមពល ក្រសួងទេសចរណ៍ និងតំណាងរដ្ឋបាលខេត្តព្រៃវែង។
តាមរបាយការណ៍កិច្ចប្រជុំឱ្យដឹងថា៖ «មតិរួមរបស់អន្តរក្រសួងបានគាំទ្រចំពោះការសិក្សា កំណត់ និងរៀបចំបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្ត្រ នគរភ្នំ-ឈើកាច់បាភ្នំ ដែលជាទីតាំងដ៏សំខាន់នៅក្នុងប្រវត្តិសាស្ត្រនៃនគរគោកធ្លក ឬនគរភ្នំដើមកំណើតទឹកដីនៃព្រះរាជាណាចក្រកម្ពុជា»។
បើតាមរបាយការណ៍ អង្គប្រជុំបានឯកភាពជូនក្រុមការងារអន្តរក្រសួង ស្ថាប័នពាក់ព័ន្ធចុះពិនិត្យ សិក្សាចុងក្រោយលើទីតាំងជាក់ស្ដែង និងកំណត់តំបន់គ្រប់គ្រង ព្រមទាំងដោះស្រាយផលប៉ះពាល់នានា មុននឹងក្រសួងបរិស្ថាន និងក្រសួងវប្បធម៌ ស្នើសុំការសម្រេចពីប្រមុខរាជរដ្ឋាភិបាលលើការបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្ត្រ នគរភ្នំ-ឈើកាច់បាភ្នំ។
លោក អ៊ុក សេរីវុធ ប្រធានមន្ទីរវប្បធម៌ និងវិចិត្រសិល្បៈខេត្ដព្រៃវែងថ្លែងប្រាប់ភ្នំពេញប៉ុស្ដិ៍ពីថ្ងៃទី ២១ មេសាថា ភ្នំឈើកាច់ ស្ថិតក្នុងភូមិមាត់ព្រៃ ឃុំឈើកាច់ ស្រុកបាភ្នំ។ ភ្នំនេះ មានចម្ងាយ ៧៨ គីឡូម៉ែត្រ ពីទីក្រុងភ្នំពេញ និងមានចម្ងាយ ៤៥ គីឡូម៉ែត្រ ពីក្រុងព្រៃវែង។
រមណីយដ្ឋានបាភ្នំមានប្រជុំភ្នំចំនួន ៤ នៅផ្ដុំគ្នា គឺភ្នំសំពៅ ភ្នំស្អាង ភ្នំធំ និងភ្នំបញ្ជរ។ បាភ្នំ ជារាជធានីចាស់ឈ្មោះថា នគរភ្នំ គឺស្ថិតនៅក្បែរភ្នំទាំងឡាយក្នុងស្រុកបាភ្នំ ដែលបច្ចុប្បន្ននៅបន្សល់ស្លាកស្នាមខ្លះៗប៉ុណ្ណោះ ដូចជា ប្រាសាទបុរាណមួយឈ្មោះថា ប្រាសាទច័ន្ទ ស្ថិតនៅចំពីមុខវត្តវិហារគុក ក្បែរជើងភ្នំសំពៅ ក្នុងឃុំជើងភ្នំ។
លោកថ្លែងថា៖ «ភ្នំឈើកាច់ជាទីតាំងប្រវត្តិសាស្ត្រមួយនៃនគរគោកធ្លក និងមានប្រវត្តិរឿងជាប្រពៃណីខែ្មរជាច្រើន។ ក្នុងប្រវត្តិរឿងទុំទាវ ភ្នំឈើកាច់ជាកន្លែងដែលនេនទុំបានសាងផ្នួសនៅទីនេះផងដែរ»។
លោកឱ្យដឹងថា រមណីយដ្ឋាននគរភ្នំជាប់ពាក់ព័ន្ធទៅនឹងប្រវត្តិសាស្ត្រខ្មែរសម័យនគរភ្នំ ស្ថិតនៅទឹកដីស្រុកបាភ្នំ។ ភ្នំឈើកាច់នេះ គឺជាអតីតរាជធានីខ្មែរដំបូងគេបង្អស់មានឈ្មោះថា «នគរភ្នំ ឬហ៊្វូណន» ដែលកសាងឡើងនៅក្នុងរជ្ជកាលព្រះបាទហ៊ុន ទៀន នៅក្នុងសតវត្សរ៍ទី ១។
លោក ទេព ទេបវង្សា ប្រធានមន្ទីរទេសចរណ៍ខេត្ដព្រៃវែងថ្លែងថា ខេត្តព្រៃវែង មានរមណីយដ្ឋានប្រវត្តិសាស្ត្រ តែ ១ កន្លែងនេះទេ គឺរមណីយដ្ឋានប្រវត្តិសាស្ត្រនគរភ្នំ និងមាន រមណីយដ្ឋានធម្មជាតិចំនួន ៣ កន្លែង គឺរមណីយដ្ឋានទួលព័ន្ធតាឡីបឹងស្នេហ៍ (ស្រុកបាភ្នំ) រមណីយដ្ឋានស្ទឹងចារ (ស្រុកកំចាយមារ) និងរមណីយដ្ឋានដីដុះ (ស្រុកពាមជរ)។ ក្រៅពីនេះខេត្តព្រៃវែងមានរមណីយដ្ឋានវប្បធម៌ចំនួន ៣ កន្លែង គឺរមណីយដ្ឋានទួលបារាយអណ្ដែត ទួលអស់លោកប្រធាតុ (ក្រុងព្រៃវែង) និងរមណីយដ្ឋានប្រាសាទព្រៃដើមស្រុក (ស្រុកស៊ីធរកណ្ដាល)។
លោកបញ្ជាក់ថា៖ «រមណីយដ្ឋានប្រវត្ថិសាស្ដ្រនគរភ្នំ គឺជាកន្លែងទេសចរណ៍មួយដ៏ទាក់ទាញសម្រាប់ខេត្ដព្រៃវែងដោយសារលើភ្នំនេះ មានទេសភាពប្រាសាទបុរាណ និងព្រៃឈើធ្វើឱ្យអាកាសធាតុមានខ្យល់ត្រជាក់ដែលនាំឱ្យទេសចរតែងតែទៅកម្សាន្ត»។
លោកឱ្យដឹងថា ក្នុងពេលចូលឆ្នាំខ្មែរកន្លងទៅថ្មីៗនេះ មានទេសចរជាតិទៅដើរលេងកម្សាន្តជាង ៣៥ ម៉ឺននាក់៕