The Phnom Penh Post Search

Search form




Logo of Phnom Penh Post newspaper Phnom Penh Post - ស្នងការរង​នគរបាល​ខេត្តកណ្តាល​ម្នាក់​ត្រូវបាន​តុលាការ​កោះហៅ​ឱ្យចូល​បំភ្លឺ ករណី​បំភាន់ និង​ប្រើ​អំពើហិង្សា

ស្នងការរង​នគរបាល​ខេត្តកណ្តាល​ម្នាក់​ត្រូវបាន​តុលាការ​កោះហៅ​ឱ្យចូល​បំភ្លឺ ករណី​បំភាន់ និង​ប្រើ​អំពើហិង្សា

Content image - Phnom Penh Post
លោក ​អុល ប៊ុណ្ណា ស្នងការរង​ខេត្តកណ្តាល​ត្រូវបាន​កោះហៅ​បំភ្លឺ​ករណី​បំភាន់ និង​ហិង្សា​។ ​រូប​fb

ស្នងការរង​នគរបាល​ខេត្តកណ្តាល​ម្នាក់​ត្រូវបាន​តុលាការ​កោះហៅ​ឱ្យចូល​បំភ្លឺ ករណី​បំភាន់ និង​ប្រើ​អំពើហិង្សា

កណ្តាលៈ ព្រះរាជអាជ្ញារង​នៃ​អយ្យការ​អម​សាលាដំបូង​ខេត្ត​កណ្តាល លោក​សេង រិទ្ធី ចេញដីកា​កោះហៅ​ស្នងការរង​នគរបាល​ខេត្ត​កណ្តាល​ម្នាក់ ឈ្មោះ​ អុល ប៊ុណ្ណា ឱ្យ​ចូលមក​បំភ្លឺ​នៅ​ថ្ងៃទី​ ២៦ ខែមេសា ពី​ដំណើររឿង​បំភាន់​មន្ត្រី​សុរិយោដី និង​ប្រើ​អំពើហិង្សា​ទៅលើ​អ្នកកាន់កាប់​អចលនវត្ថុ​ដោយ​សុចរិត​។ លោក​ស្នងការរង បដិសេធ​រឿងនេះ ហើយ​បញ្ជាក់ថា នឹង​ចូលខ្លួន​តាម​ការកោះហៅ​របស់​តុលាការ​។

ដីកាកោះ​របស់​លោក ​សេង រិទ្ធី ចុះ​ថ្ងៃទី​ ៨ ខែមេសា ដែល​ភ្នំពេញ​-​ប៉ុស្តិ៍​ទទួលបាន នៅ​ថ្ងៃទី​ ២១ ខែមេសា បង្ហាញថា អយ្យការ​អម​សាលាដំបូង​ខេត្តកណ្តាល​អញ្ជើញ​ឈ្មោះ អុល ប៊ុណ្ណា សញ្ជាតិ​ខ្មែរ​ជា​ជនសង្ស័យ មាន​ទីលំនៅ​ភូមិ​ព្រែកត្រែង សង្កាត់​សិត្បូ ក្រុង​តាខ្មៅ ខេត្តកណ្តាល​ឱ្យចូល​មកកាន់​អយ្យការ​អមសាលាដំបូង​ខេត្តកណ្តាល នៅ​ថ្ងៃទី​ ២៦ ខែមេសា ឆ្នាំ​ ២០២២ វេលា​ម៉ោង​ ៨ និង​ ៣០ ​នាទី​ព្រឹក​។

ដីកា​ដដែល​ឱ្យដឹងថា ការ​កោះហៅ​នេះ ដើម្បី​សាកសួរ​ជនសង្ស័យ​ពី​ដំណើររឿង​បំភាន់​មន្ត្រី​សុរិយោដី និង​ប្រើ​អំពើហិង្សា​ទៅលើ​អ្នកកាន់កាប់​អចលនវត្ថុ​ដោយ​សុចរិត​តាម​ពាក្យបណ្តឹង​របស់​ឈ្មោះ ប៊ុន ចាន់សុទ្ធា កាលពី​ថ្ងៃទី​ ១៨ ខែមីនា ឆ្នាំ​ ២០២២​។ ដីកា​នោះ​បញ្ជាក់​​ថា​៖ «​សាមីខ្លួន​ត្រូវ​អញ្ជើញ​តាម​ដីកា​នេះ​ឱ្យទាន់​ពេលវេលា និង​យក​លិខិត​ផ្សេងៗ ដែល​ទាក់ទង​នឹង​រឿង​ខាងលើ​មកជា​មួយ​ផង​ប្រសិនបើ​មាន​»​។

លោក​ឧត្តមសេនីយ៍​ត្រី អុល ប៊ុណ្ណា ស្នងការរង​នៃ​ស្នងការដ្ឋាន​នគរបាល​ខេត្តកណ្តាល ថ្លែង​នៅ​ថ្ងៃទី​ ២១ ខែមេសា​ថា លោក​មិនមាន​ពាក់ព័ន្ធ​នឹង​ករណី​បំភាន់​រឿង​ដីធ្លី ឬ​ប្រើ​អំពើហិង្សា​លើ​ម្ចាស់​អចលនទ្រព្យ​ណាមួយ​ទេ ហើយ​មកដល់​ព្រឹក​ថ្ងៃទី​ ២១ ខែមេសា លោក​មិនទាន់​បានទទួល​ដីកា​កោះហៅ ដោយ​អយ្យការ​អម​សាលាដំបូង​ខេត្តកណ្តាល​នៅឡើយ​ទេ​។ ទោះយ៉ាងណា លោក​ស្នងការរង​អះអាងថា លោក​នឹង​ចូលខ្លួន​ទៅ​បំភ្លឺ​តាម​ដីកាកោះ​ហៅ​របស់​តុលាការ បើសិន​ជា​មានការ​ប្តឹង​ចំឈ្មោះ​លោក​។

លោក​ថ្លែងថា​៖ «​ខ្ញុំ​អត់​ដឹង​ដែរ យើង​អត់​មាន​ពាក់ព័ន្ធ​នឹង​ក្លែង​អី​ទេ ឈ្មោះ​ខ្ញុំ អត់​មាន​ពាក់ព័ន្ធ​រឿង​ដីធ្លី​នោះទេ​។ យើង​អត់​មានអី​ទាំងអស់ ហើយ​មកដល់​ម៉ោង​នេះ សូម្បី​ដីកា​ក៏​អត់​ទាន់​ទទួល​បានដែរ ហើយ​យើង​អត់​ដឹងថា គេ​ប្តឹង​ទេ​។ ក្នុង​រឿង​មួយៗ​ខ្ញុំ​ជា​កងកម្លាំង អត់បាន​ទៅ​ពាក់ព័ន្ធ​រឿង​ហ្នឹង​ទេ ប៉ុន្តែ​បើ​គេ​ប្តឹង​ឈ្មោះ​ខ្ញុំ​នោះ ខ្ញុំ​នឹង​ចូលរួម​ឆ្លើយ​តាម​តុលា​ការកោះហៅ​»​។

យ៉ាងណា​ក៏ដោយ តាម​ប្រកាស​របស់​លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួងមហាផ្ទៃ​កាលពី​ថ្ងៃទី​ ១១ ខែមករា ឆ្នាំ​ ២០២១ ធ្លាប់បាន​ព្រមាន​ចំពោះ​លោក​ឧត្តមសេនីយ៍ត្រី អុល ប៊ុណ្ណា ស្នងការរង​នៃ​ស្នងការដ្ឋាន​នគរបាល​ខេត្តកណ្តាល​ម្តង​រួចមកហើយ ដោយ​មូលហេតុ «​ល្មើស​វិន័យ​របស់​កងកម្លាំង​នគរបាលជាតិ​»​។ កាលនោះ​លោក ស ខេង បានសម្រេច​ឱ្យ​កែ​កំហុសឆ្គង​ឱ្យបាន​ត្រឹមត្រូវ បើពុំ​នោះទេ​នឹងត្រូវ​ចាត់វិធានការ​តាម​វិន័យ​របស់​កងកម្លាំង​នគរបាល​ជាតិ​។

លោក​ ស៊ឹង សែនករុណា អ្នក​នាំពាក្យ​សមាគម​ការពារ​សិទ្ធិមនុស្ស អាដហុក ថ្លែង​នៅ​ថ្ងៃទី​ ២១ មេសា ថា តួនាទី​ជា​ស្នងការរង​នគរបាល គួរតែ​ដឹង​ច្បាស់​អំពី​ច្បាប់ទម្លាប់​ជាង​ពលរដ្ឋ​ធម្មតា​។ ហេតុនេះ បើសិនជា​បាន​ប្រព្រឹត្ត​បទល្មើស ហើយ​តុលា​ការរកឃើញ​បទល្មើស បុគ្គល​នោះ​ត្រូវ​ទទួលទោស​ធ្ងន់ធ្ងរ​ជាង​ពលរដ្ឋ​សាមញ្ញ ពាក់ព័ន្ធ​ទៅនឹង​ស្ថាន​ទម្ងន់ទោស​។

លោក​ ករុណា ​បាន​ថ្លែងថា​៖ «​ក្នុង​រឿងនេះ គប្បី​មានការ​ចាត់​វិធានការ​ឱ្យបាន​ច្បាស់លាស់ ដើម្បី​ការពារ​នូវ​មុខមាត់​នូវ​សមត្ថកិច្ច​ផ្សេងទៀត ដែល​គេ​បាន​បំពេញ​តួនាទី និង​គោរព​តួនាទី​បាន​ត្រឹមត្រូវ​កុំឱ្យ​រង​ការរិះគន់​»​។

មន្ត្រី​សិទ្ធិមនុស្ស​រូបនេះ​បញ្ជាក់​ថា ជាធម្មតា កាលណា​មានការ​ប្តឹងទៅ​តុលាការ គឺ​អ្នកប្តឹង​គួរតែមាន​ភ័ស្តុតាង ឬ​សាក្សី​ពី​អង្គហេតុ​នោះ​បញ្ជាក់​ច្បាស់លាស់​។ បើសិនជា​មាន​ការបញ្ជាក់ មាន​អង្គហេតុ ភ័ស្តុតាង​គ្រប់គ្រាន់​អំពី​អំពើ​ប្រព្រឹត្ត​នោះ​ហើយ ទោះបី​មាន​ការបដិសេធ​យ៉ាងណា ក៏​គេច​មិន​ផុត​អំពី​ផ្លូវច្បាប់​នោះដែរ​៕

វីដេអូ៖

អត្ថបទគួរចាប់អារម្មណ៍