.jpg)
ទេសភាពព្រៃឈើ និងភ្នំ មើលពីលើអាកាសនៅតំបន់អារ៉ែងក្នុងខេត្តកោះកុងឆ្នាំ ២០២២។ រូប ក្រសួងបរិស្ថាន
ភ្នំពេញៈ ក្រសួងបរិស្ថានបង្ហាញពីរបៀប និងបច្ចេកទេសលក្ខណៈវិទ្យាសាស្ដ្រ ដែលក្រុមការងារបានរៀបចំរបាយការណ៍នៃការវាយតម្លៃលើស្ថានភាពគម្របព្រៃឈើកម្ពុជា ដែលកំពុងបន្តធ្វើលើការវាយតម្លៃធនធានគម្របព្រៃឈើក្នុងឆ្នាំ ២០២០ ដោយគ្រោងបញ្ចប់នៅឆ្នាំ ២០២២ នេះ។
តាមរយៈវីដេអូមួយមានរយៈពេលជាង ១០ នាទីមានចំណងជើងថា «ការរៀបចំផលិតផែនទីធនធានគម្របព្រៃឈើកម្ពុជា» ក្រសួងបរិស្ថានបានបង្ហាញពីសកម្មភាព និងបច្ចេកទេសផ្សេងៗដែលក្រុមការងារបច្ចេកទេសរបស់ក្រសួង ធ្វើការរៀបចំរបាយការណ៍នៃការវាយតម្លៃលើស្ថានភាពនៃគម្របព្រៃឈើ។
លោក ជួប ប៉ារីស៍ អនុរដ្ឋលេខាធិការ ក្រសួងបរិស្ថានបានលើកឡើងតាមរយៈវីដេអូនេះថា ការវាយតម្លៃគម្របព្រៃឈើនៅកម្ពុជានេះ គឺមានសារៈសំខាន់ណាស់ ដែលយើងត្រូវដឹងជាក់ស្ដែង ពិតប្រាកដថា ព្រៃឈើយើងមានប៉ុន្មាន ក្នុងនោះមានព្រៃស្រោងប៉ុន្មាន ព្រៃរបោះប៉ុន្មាន ព្រៃពាក់កណ្ដាលស្រោងប៉ុន្មាន ព្រៃឫស្សីប៉ុន្មាន វាលស្មៅប៉ុន្មាន ទីប្រជុំជនប៉ុន្មាន និងផ្លូវទឹកប៉ុន្មានហិកតាជាដើមគឺឱ្យដឹងឱ្យច្បាស់។
ការវាយតម្លៃពីធនធានគម្របព្រៃឈើតាមរយៈបច្ចេកទេសគឺត្រូវធ្វើក្នុងរយៈពេល ២ ឆ្នាំម្ដងឱ្យស្របទៅនឹង National Communication ស្របទៅនឹងរបាយការណ៍ប្រែប្រួលអាកាសធាតុ។ លោកថ្លែងថា៖ «យើងដឹងហើយថា យើងគឺជាសមាជិកម្នាក់ នៅក្នុងអង្គការសហប្រជាជាតិ ហើយយើងក៏ជាសមាជិក អនុសញ្ញាក្របខ័ណ្ឌ សហប្រជាជាតិស្ដីពីការប្រែប្រួលអាកាសធាតុ អ៊ីចឹង យើងធ្វើយ៉ាងណាឱ្យតួលេខស្របគ្នា»។
លោកស្រី ហួត ណាបូរី ប្រធានការិយាល័យនៃនាយកដ្ឋានសេវាកម្មព័ត៌មាន ភូមិសាស្ដ្រនៃអគ្គនាយកដ្ឋានចំណេះដឹង និងព័ត៌មានបរិស្ថាន ក្រសួងបរិស្ថាន ឱ្យដឹងតាមរយៈវីដេអូនេះដែរថា ការបកស្រាយធនធានគម្របព្រៃឈើ គឺបានចែកចេញជា ៤ ដំណាក់កាលធំៗ ទី ១ ការទាញយករូបភាពផ្កាយរណប ទី ២ ការវិភាគ និងការបកស្រាយរូបភាពផ្កាយរណប ដោយប្រើទៅតាមប្រព័ន្ធព័ត៌មានភូមិសាស្ដ្រ ទី ៣ ការផ្ទៀងផ្ទាត់ទៅលើកម្រិតជឿជាក់នៃលទ្ធផលដែលក្រុមការងារផលិតបាន និងទី ៤ គឺធ្វើការគណនាទៅលើស្ថិតិនៃការផលិតធនធានគម្របព្រៃឈើរបស់កម្ពុជា។ លោកស្រីបញ្ជាក់ថា ក្រុមការងារបច្ចេកទេសបានប្រើប្រាស់រូបភាពផ្កាយរណបជាច្រើនប្រភេទ ដែលរូបភាពទាំងនោះមានកម្រិតបាំងពពក ១០ ភាគរយ។
ក្រុមការងារក៏ទាញយករូបភាពតាមកម្មវិធី Google Earth Engine ដែលជាកម្មវិធីមួយលើសេវាកម្មដំណើរការភូមិសាស្ដ្រ (geospatial processing service) ដែលក្រុមការងារទាញយករូបភាពមក ដោយកម្រិតពពកបាំងតិចជាង ១០ ភាគរយ ហើយទើបក្រុមការងារយករូបភាពទាំងនោះ មកធ្វើជាប្រព្រឹត្ដិកម្មរូបភាព។
លោកស្រីបញ្ជាក់ថា៖ «យើងបានរូបភាពនោះហើយ ទើបយើងធ្វើការបែងចែកព្រំប្រទល់ដោយស្វ័យប្រវត្ដិ (segmentation)។ ជំហានបន្ទាប់ពីការធ្វើការបែងចែកព្រំប្រទល់ដោយស្វ័យប្រវត្ដិនេះ គឺយើងត្រូវធ្វើការវិភាគនៅក្នុងកម្មវិធី Principle Components Analysis ឬហៅកាត់ថា PCA នៅក្នុងកម្មវិធី AGeS ដើម្បីស្វែងរកទីតាំងដែលមានការប្រែប្រួលធនធានគម្របដីព្រៃឈើ ថាតើទីតាំងណា មានការថយចុះ ឬក៏កើនឡើង ឬក៏មានការបាត់បង់»។
លោកស្រីបន្ថែមថា បន្ទាប់ពីធ្វើជំហាន PCA ហើយ ក្រុមការងារក៏ធ្វើការចាត់ថ្នាក់រូបភាពផ្កាយរណបជា ២ ជំហាន ទី ១ ហៅថា ការចាត់ថ្នាក់ដោយស្វ័យប្រវត្តិ ដែលមានចំណាត់ថ្នាក់ ២ ប្រភេទធំៗ ដែលហៅថា ចំណាត់ថ្នាក់ប្រភេទដីមានព្រៃឈើ និងចំណាត់ថ្នាក់ដីពុំមានគម្របព្រៃឈើ។ បន្ទាប់ពីទទួលបានលទ្ធផលនៃចំណាត់ថ្នាក់បឋមនេះហើយ ក្រុមការងារនឹងធ្វើចំណាត់ថ្នាក់លម្អិត ចំនួន ២២ ថ្នាក់ ដែលចំណាត់ថ្នាក់លម្អិតនេះត្រូវការប្រើប្រាស់បទពិសោធរបស់អ្នកចាត់ថ្នាក់ គឺប្រើភ្នែកដើម្បីធ្វើការកំណត់ចំណាត់ថ្នាក់នីមួយៗ ថាតើការប្រែប្រួលនោះ ប្រែប្រួលជាអ្វី។
លោកស្រី ហួត ណាបូរី បញ្ជាក់ថា៖ «ដូច្នេះដើម្បីបញ្ជាក់ពីសុក្រឹតភាពនៃចំណាត់ថ្នាក់ទាំង ២២ ចំណាត់ថ្នាក់នេះ យើងត្រូវទាមទារធ្វើការផ្ទៀងផ្ទាត់ជំហាននីមួយៗ ហើយនឹងធ្វើការកែតម្រូវទៅលើចំណាត់ថ្នាក់មួយចំនួន ដែលយើងពិនិត្យឃើញថា មានភាពមិនប្រក្រតី គឺយើងធ្វើការកែតម្រូវជាមុនសិន មុននឹងយើងធ្វើការប៉ាន់ស្មានចំណុច ដើម្បីធ្វើការចុះផ្ទៀងផ្ទាត់នៅទីវាល»។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យ ក្រសួងបរិស្ថានថ្លែងកាលពីថ្ងៃទី ២០ មេសាថា ការចេញផ្សាយវីដេអូនេះគឺជាការរៀបចំរបាយការណ៍នៃការវាយតម្លៃលើស្ថានភាពនៃគម្របព្រៃឈើកម្ពុជា ដែលជាការបង្ហាញនៃបច្ចេកទេស និងលក្ខណៈវិទ្យាសាស្ដ្រ ដែលក្រសួងបរិស្ថានបានរៀបចំ ក្នុងការវាយតម្លៃ។ លោកបញ្ជាក់ថា៖ «វាមានន័យថា លទ្ធផលដែលចេញមកនេះ គឺវាឆ្លុះបញ្ចាំងពីស្ថានភាពពិតជាក់ស្ដែងក្នុងការវាយតម្លៃ មិនមែនមានន័យថា យើងប្រើប្រាស់តែប្រភព ១ ឬក៏រូបភាពតែ ១ យកមកទេ គឺមានការបញ្ជាក់ផ្សេងៗ គឺជារបៀបនៃការធ្វើកិច្ចការងាររបស់មន្ដ្រីបច្ចេកទេសនៃក្រសួងបរិស្ថានប្រកបដោយការទទួលខុសត្រូវខ្ពស់»។
តាមរយៈលទ្ធផលការសិក្សាវាយតម្លៃធនធានគម្របព្រៃឈើកម្ពុជាឆ្នាំ ២០១៨ ដែលក្រសួង-បរិស្ថានផ្សព្វផ្សាយនៅថ្ងៃទី ២៣ ខែកញ្ញា ឆ្នាំ ២០២១ បង្ហាញថា ផ្ទៃដីព្រៃឈើកម្ពុជាមានប្រមាណ ៨ ៥១០ ៨០៧ ហិកតា ស្មើនឹង ៤៦,៨៦% បើធៀបនឹងផ្ទៃដីសរុបទូទាំងប្រទេស ខណៈក្រុមការងារក្រសួងកំពុងបន្តធ្វើការវាយតម្លៃធនធានគម្របព្រៃឈើក្នុងឆ្នាំ ២០២០ ដោយគ្រោងបញ្ចប់នៅឆ្នាំ ២០២២នេះ។
បើតាមរបាយការណ៍ដែលក្រសួងបរិស្ថានផ្សព្វផ្សាយ ប្រទេសកម្ពុជាបានធ្វើការវាយតម្លៃធនធានគម្របដីព្រៃឈើថ្នាក់ជាតិបានចំនួន ៨ ដង ចាប់តាំងពីមុនឆ្នាំ ១៩៧៣ រហូតដល់ឆ្នាំ ២០១៨ និងកំពុងបន្តធ្វើការវាយតម្លៃធនធានគម្របព្រៃឈើក្នុងឆ្នាំ ២០២០ និងបានធ្វើការវាយតម្លៃ ការប្រែប្រួលធនធានដី គម្របព្រៃឈើ នៃប្រព័ន្ធតំបន់ការពារធម្មជាតិ ឆ្នាំ ២០០៦-២០១៦ ដោយប្រើបច្ចេកវិទ្យា ប្រព័ន្ធព័ត៌មាន ភូមិសាស្ត្រ និងរូបភាពផ្កាយរណប (GIS/Remote Sensing)៕
