.jpg)
អ្នកដំណើរនៅក្នុងព្រលានយន្តហោះអន្តរជាតិភ្នំពេញនាពេលកន្លងមក។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន បានឯកភាព និងសម្រេចឱ្យធ្វើការកែសម្រួលនូវការធ្វើចត្តាឡីស័ក ដោយមានការបន្ថយចំនួនថ្ងៃនៃការធ្វើចត្តាឡីស័កសម្រាប់អ្នកដែលមិនបានចាក់ ឬមិនទាន់បានចាក់វ៉ាក់សាំងបង្ការមេរោគកូវីដ ១៩ ពេញលេញ ពី ១៤ ថ្ងៃមកនៅត្រឹម ៧ ថ្ងៃវិញ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ បានថ្លែងក្នុងសេចក្តីប្រកាសព័ត៌មាន នៅថ្ងៃទី ២១ ខែមេសា ថា ការកែសម្រួលរយៈពេលនៃការធ្វើចត្តាឡីស័កនេះ ត្រូវបានលោកនាយករដ្ឋមន្ត្រី ហ៊ុន សែន ចារឯកភាព កាលពីថ្ងៃទី ២០ ខែមេសា លើលិខិតចុះថ្ងៃទី ១៩ ខែមេសា ឆ្នាំ ២០២២ របស់គណៈប្រចាំការនៃគណៈកម្មការជាតិប្រយុទ្ធនឹងជំងឺកូវីដ ១៩ (គ.ប.ក.)។
លោក ម៉ម ប៊ុនហេង បានលើកឡើងថា៖ «គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ សូមជម្រាបជូនសាធារណជនឱ្យបានជ្រាបអំពីការកែសម្រួលលក្ខខណ្ឌធ្វើចត្តាឡីស័កចំពោះអ្នកដំណើរមកពីបរទេសដែលមិនបានចាក់វ៉ាក់សាំង ឬមិនទាន់បានចាក់វ៉ាក់សាំងពេញលេញ ដោយកាត់បន្ថយពីរយៈពេល ១៤ ថ្ងៃ មកនៅត្រឹមរយៈពេល ៧ ថ្ងៃ»។
យោងតាមសេចក្តីប្រកាសព័ត៌មានបានបញ្ជាក់ឱ្យដឹងទៀតថា ចំពោះការកែសម្រួលលក្ខខណ្ឌធ្វើតេស្តចំពោះអ្នកធ្វើចត្តាឡីស័ក គឺអ្នកដំណើរមកពីបរទេសដែលចូលតាមផ្លូវអាកាសត្រូវធ្វើតេស្តរហ័សនៅថ្ងៃទី ៧ ដើម្បីបញ្ចប់ការធ្វើចត្តាឡីស័ក។
ចំពោះអ្នកដំណើរមកពីបរទេសតាមព្រំដែនគោក ត្រូវធ្វើតេស្តរហ័សចំនួន ២ លើក ដែលលើកទី ១ នៅថ្ងៃទី ១ មុនពេលចូលមណ្ឌលចត្តាឡីស័ក និងលើកទី ២ នៅថ្ងៃទី ៧ ដើម្បីបញ្ចប់ការធ្វើចត្តាឡីស័ក។
ជាមួយគ្នានេះដែរលោក ម៉ម ប៊ុនហេង ក៏បានបន្ថែមទៀតថា អាជ្ញាធរមានសមត្ថកិច្ចពាក់ព័ន្ធត្រូវបន្តរក្សាការចាក់វ៉ាក់សាំងកូវីដ ១៩ ដូសទី ១ ឬ ដូសទី ២ (ចំពោះអ្នកដែលបានចាក់ដូសទី ១ រួច ហើយមានលក្ខណសម្បត្តិគ្រប់គ្រាន់សម្រាប់ការចាក់ដូសទី ២ តាមរបប ចាក់វ៉ាក់សាំង) ជូនប្រជាពលរដ្ឋ និងពលករកម្ពុជានៅថ្ងៃដែលត្រូវបានអនុញ្ញាតឱ្យចាកចេញពីមណ្ឌលចត្តាឡីស័កផងដែរ។
ដោយឡែក រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានធ្វើការក្រើនរំឭកទៅដល់ម្ចាស់ ឬនាយករោងចក្រ សហគ្រាសទាំងអស់សហការជាបន្ទាន់ជាមួយអាជ្ញាធរមូលដ្ឋានរាជធានី ខេត្ត និងមន្ទីរការងារ និងបណ្តុះបណ្តាលវិជ្ជាជីវៈរាជធានី ខេត្ត ដើម្បីរៀបចំចាក់វ៉ាក់សាំងដូសជំរុញ គឺដូសទី ៣ និងដូសទី ៤ ដល់កម្មករនិយោជិត នៅតាមរោងចក្រ សហគ្រាស។
លោកបានឱ្យដឹងថា៖ «ម្ចាស់ ឬនាយករោងចក្រ សហគ្រាស ត្រូវគ្រប់គ្រងទិន្នន័យចាក់វ៉ាក់សាំង របស់កម្មករនិយោជិត និងបំពេញព័ត៌មានចាក់វ៉ាក់សាំង ទៅក្នុងរបបស្វ័យប្រកាសអធិការកិច្ចការងារតាមប្រព័ន្ធ ស្វ័យប្រវត្តិកម្ម តាមរយៈគេហទំព័រ https://sicms.mlvt.gov.kh ក្នុងករណីកម្មករនិយោជិតមិនទាន់មានបណ្ណចាក់វ៉ាក់សាំងកូវីដ ១៩ ត្រូវបំពេញឈ្មោះអក្សរកាត់ជាអក្សរឡាតាំង និងកាលបរិច្ឆេទចាក់វ៉ាក់សាំងតាមទម្រង់ដែលបានកំណត់ក្នុងប្រព័ន្ធ»។
គួររំឭកផងដែរថា កាលពីថ្ងៃទី ២០ ខែមេសា កន្លងទៅនេះ លោកនាយករដ្ឋមន្ត្រី ហ៊ុន សែន បានបញ្ជាឱ្យបើកយុទ្ធនាការចាក់វ៉ាក់សាំងដូសជំរុញជាដូសទី ៣ និងទី ៤ ដោយតម្រង់ឆ្ពោះទៅតាមកម្មករកម្មការិនីនៅតាមរោងចក្រ អ្នករកស៊ីលក់ដូរនៅតាមទីផ្សារ និងអ្នកធ្វើការក្រៅប្រព័ន្ធ ដោយសារទីតាំងទាំងនោះជាកន្លែងប្រមូលផ្តុំមនុស្សច្រើន ដើម្បីឱ្យមានភាពស៊ាំសហគមន៍។
ទាក់ទងនឹងការចាក់វ៉ាក់សាំងនេះផងដែរ លោកស្រី ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសរួមជាមួយនឹងលោកស្រី លី អៃឡែន តំណាងអង្គការសុខភាពពិភពលោកប្រចាំប្រទេសកម្ពុជា និងលោកស្រី ហ្វារូហ្វ ហ្វូយូហ្សាត តំណាងអង្គការ UNICEF ប្រចាំប្រទេសកម្ពុជា បានចុះត្រួតពិនិត្យដំណើរការចាក់វ៉ាក់សាំងកូវីដ ១៩ ក្នុងខេត្តរតនគិរីកាលពីថ្ងៃទី ២០ ខែមេសា ដើម្បីសាកសួរ និងពិនិត្យស្ថានភាពជំងឺកូវីដ ១៩ រួមទាំងដំណើរការចាក់វ៉ាក់សាំងផងដែរ។
ក្នុងពេលលោកស្រីចុះត្រួតពិនិត្យដំណើរការចាក់វ៉ាកសាំង លោកស្រី ឱ វណ្ណឌីន បានប្រាប់ឱ្យដឹងថា ការស្រោចស្រពនូវវ៉ាក់សាំងនេះបង្ហាញឱ្យឃើញថា រាជរដ្ឋាភិបាលបានខិតខំធ្វើកិច្ចសហប្រតិបត្តិការ និងបង្កលក្ខណៈសព្វបែបយ៉ាងដល់ដៃគូក្នុងការធ្វើការងារនេះក្នុងភាពជាដៃគូពិតប្រាកដ។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ២០ ខែមេសា លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាននាក់ មាន ចំនួន ៩២,៩៣%៕
