សៀមរាបៈ អាជ្ញាធរជាតិអប្សរាសម្រេចអនុញ្ញាតឱ្យរដ្ឋបាលស្រុកបន្ទាយស្រី សាងសង់ផ្លូវបេតុង ២ ខ្សែស្ថិតនៅតំបន់ការពារទី ១ នៃឧទ្យានអង្គរ ប៉ុន្តែត្រូវគោរពលក្ខខណ្ឌមួយចំនួនជាដាច់ខាត ដោយហាមការពង្រីកទំហំផ្លូវចាស់ ឬកាប់ដើមឈើដែលដុះសងខាងផ្លូវជាដាច់ខាត។ ករណីអនុវត្តផ្ទុយពីបច្ចេកទេសនឹងត្រូវផ្អាកការសាងសង់ ហើយចាត់វិធានការតាមនីតិវិធី។
លិខិតអនុញ្ញាតរបស់អាជ្ញាធរជាតិអប្សរា ចុះថ្ងៃទី ១២ មេសា ឆ្នាំ ២០២២ បានជម្រាបជូនអភិបាលស្រុកបន្ទាយស្រី លោក ឃឹម ហ្វីណង់ អំពីដីធ្លីទាំងអស់ដែលស្ថិតក្នុងតំបន់ ១ និងតំបន់ ២ ក្នុងតំបន់រមណីយដ្ឋានសៀមរាប-អង្គរ គឺជាសម្បត្តិបេតិកភណ្ឌពិភពលោក និងជាដីទ្រព្យសម្បត្តិសាធារណៈរបស់រដ្ឋ ដែលអាជ្ញាធរជាតិអប្សរា មានភារកិច្ច កាតព្វកិច្ចថែរក្សា ការពារ គ្រប់គ្រង និងអភិវឌ្ឍប្រកបដោយចីរភាព។
ក្នុងលិខិតបញ្ជាក់ថា ចំណែកទីតាំងដែលបានស្នើសុំសាងសង់ផ្លូវចំនួន ៣ ខ្សែ នៅភូមិតាតៃ ភូមិថ្នល់បណ្តោយ និងភូមិថ្នល់ទទឹង ឃុំព្រះដាក់ ស្រុកបន្ទាយស្រី គឺស្ថិតក្នុងតំបន់ការពារទី ១ នៃឧទ្យានអង្គរ ជាពិសេសកាត់លើហេដ្ឋារចនាសម្ព័ន្ធបុរាណ (បារាយណ៍-យសោធរ)។ ដូច្នេះ ចំពោះខ្សែផ្លូវ ចាប់ពីចំណុច A1-A2 (ប្រវែង ១ ៥០០ ម) និងខ្សែផ្លូវចាប់ពីចំណុច B1-B2(ប្រវែង ៩៨០ ម) ស្ថិតក្នុងភូមិតាតៃ អាជ្ញាធរជាតិអប្សរា មិនអាចអនុញ្ញាតជូនលោកធ្វើការសាងសង់បានទេ ព្រោះផ្លូវទាំង ២ ខ្សែនេះគឺមានសក្តានុពលបុរាណវិទ្យាខ្ពស់។
អាជ្ញាធរជាតិអប្សរាបន្តថា៖ «ដោយឡែកចំពោះខ្សែផ្លូវចាប់ពីចំណុច B5 ដល់ C1 ដែលស្ថិតនៅភូមិថ្នល់បណ្តោយ និងភូមិថ្នល់ទទឹង អាជ្ញាធរជាតិអប្សរាអាចអនុញ្ញាតជូនលោកធ្វើការសាងសង់ជាផ្លូវបេតុង ដោយអនុលោមទៅតាមអនុសាសន៍ អាយ.ស៊ី..អង្គរ កាលពីថ្ងៃទី ២៤ ខែមីនា ឆ្នាំ ២០២២»។
អាជ្ញាធរជាតិអប្សរាបញ្ជាក់ផងដែរថា ប៉ុន្តែការអនុញ្ញាតនេះស្ថិតក្នុងលក្ខខណ្ឌមួយចំនួនជាដាច់ខាត ដូចជា ត្រូវរក្សាសភាពដើមនៃផ្លូវនេះ ដោយហាមជីកកកាយ និងឈូសឆាយ។ ត្រូវក្រាលស្រទាប់ដីការពារ ក្រាលស្រទាប់ដីក្រួសក្រហម ក្រាលស្រទាប់ប្លាស្ទិក និងក្រាលស្រទាប់បេតុង។ ហាមជីកកកាយដី ឬឈូសឆាយពង្រីកទំហំផ្លូវបន្ថែមឱ្យលើសពីទំហំផ្លូវចាស់ដែលមានស្រាប់ និងមិនត្រូវកាប់ដើមឈើដុះនៅសងខាងផ្លូវជាដាច់ខាត។ ត្រូវមានប្រព័ន្ធរំដោះទឹកដើម្បីបញ្ចៀសការលិចផ្លូវ ត្រូវដាំដើមឈើបន្ថែម ដើម្បីលើកសោភណភាពមូលដ្ឋាន និងរមណីយដ្ឋានអង្គរទាំងមូល និងមិនអនុញ្ញាតឱ្យយកលិខិតនេះ ទៅអនុវត្តសាងសង់ផ្លូវណាផ្សេងក្រៅពីផ្លូវស្នើសុំនេះទេ។
អភិបាលស្រុកបន្ទាយស្រី លោក ឃឹម ហ្វីណង់ បានសម្តែងក្តីរីករាយ បន្ទាប់ពីអាជ្ញាធរជាតិអប្សរាអនុញ្ញាតឱ្យសាងសង់ផ្លូវនេះ។ លោកបានបង្ហោះសារលើទំព័រហ្វេសប៊ុករបស់លោកថា៖ «ទីបំផុត ផ្លូវបេតុង ២ ខ្សែលើខ្នងទំនប់ចាស់ឆ្លងកាត់ភូមិថ្នល់បណ្តោយ និងភូមិថ្នល់ទទឹងនៃឃុំព្រះដាក់ត្រូវបានអាជ្ញាធរជាតិអប្សរា អនុញ្ញាតឱ្យសាងសង់ បន្ទាប់ពីបានទទូចស្នើសុំ និងតស៊ូមតិអស់ជាច្រើនលើកច្រើនសាក្នុងអំឡុងពេលជាង ២ ឆ្នាំកន្លងមក»។
លោកបញ្ជាក់ថា នេះគឺជាដំណឹងដ៏គួរឱ្យរំភើបរីករាយ សម្រាប់រូបលោកផ្ទាល់ ក៏ដូចជា សម្រាប់បងប្អូនអ្នកភូមិរាប់ពាន់នាក់ទៀត ដែលនឹងបានទទួលផលប្រយោជន៍ដោយផ្ទាល់ពីផ្លូវបេតុង ដែលមានប្រវែងសរុបជាង ៣ គីឡូម៉ែត្រនេះ។
លោកសរសេរថា៖ «បើទោះជាត្រូវគោរពតាមគោលការណ៍នៃលក្ខខណ្ឌតម្រូវដើម្បីចៀសវាងការប៉ះពាល់ដល់តំបន់មានសក្តានុពលបុរាណដ្ឋានក៏ដោយ ផ្លូវបេតុងទាំង ២ ខ្សែនេះនឹងនាំមកនូវគុណភាពជីវិតថ្មី សម្រាប់អ្នកភូមិ ក៏ដូចជានឹងជួយជំរុញឱ្យមានចរន្តសេដ្ឋកិច្ចនៅក្នុងមូលដ្ឋាន តាមរយៈការលើកកម្ពស់សោភណភាពនៅក្នុងភូមិបុរាណ ដែលនឹងបង្កើតនូវសក្តានុពលជាច្រើនសម្រាប់វិស័យទេសចរណ៍ ព្រមទាំងលើកស្ទួយជីវភាពប្រចាំថ្ងៃរបស់បងប្អូនប្រជាពលរដ្ឋផងដែរ»។
លោកបន្ថែមថា រដ្ឋបាលស្រុកបន្ទាយស្រី នឹងខិតខំប្រឹងប្រែងគ្រប់រូបភាព ដើម្បីអប់រំឱ្យអ្នកភូមិ បន្តអភិរក្សថែរក្សាអត្តសញ្ញាណដើមរបស់ខ្លួន និងប្តេជ្ញាមិនឱ្យការអភិវឌ្ឍហេដ្ឋារចនាសម្ព័ន្ធទាំងនេះប៉ះពាល់ទៅដល់ទេសភាពដែលមានស្រាប់នៅតាមដងផ្លូវឡើយ ជាពិសេសការពារមិនឱ្យបាត់បង់ដើមឈើទាំងអស់ដែលមានស្រេចនៅទីនោះ។
លោកសម្តែងក្តីសង្ឃឹមថា រុក្ខជាតិបៃតងនៅតាមដងផ្លូវ ដែលធ្លាប់តែមានពណ៌ស្រអាប់មិនគួរឱ្យទាក់ទាញ នឹងវិលត្រឡប់ទៅរកសភាពដើមនៃធម្មជាតិស្រស់បំព្រងរបស់ខ្លួនវិញ។ ទីធ្លាមុខផ្ទះដែលជាកន្លែងតែងមានដីហុយខ្លាំង និងពិបាកសូម្បីតែដកដង្ហើមនោះ ក៏នឹងប្រែក្លាយទៅជាទីប្រមូលផ្តុំជួបជុំគ្នា មានកូនក្មេងរត់លេង និងមានអ្នកភូមិលក់ដូររបស់របរហូបចុកជាហូរហែ ដូចនៅភូមិព្រះដាក់ផងដែរ។
លោក ឃឹម ហ្វីណង់ បញ្ជាក់ថា ផ្លូវបេតុងទាំង ២ ខ្សែនេះនឹងត្រូវចាប់ផ្តើមសាងសង់ក្នុងពេលឆាប់ៗនេះ ហើយនឹងបញ្ចប់ក្នុងឆ្នាំ ២០២២ នេះដោយគ្រោងប្រើប្រាស់កញ្ចប់ថវិកាអភិវឌ្ឍន៍មកពីមូលនិធិឃុំ មូលនិធិស្រុក និងមូលនិធិបឹងទន្លេសាបបូកបញ្ចូលគ្នា។
តាមរយៈសេចក្តីជូនដំណឹងនេះ អាជ្ញាធរជាតិអប្សរាបានក្រើនរំឭកឱ្យរដ្ឋបាលស្រុកបន្ទាយស្រី ទំនាក់ទំនង និងជូនដំណឹងមកអាជ្ញាធរជាតិអប្សរា តាមរយៈទូរស័ព្ទលេខ ០៦៣ ៧៦៥ ៤០៥ ឱ្យបាន ៣ ថ្ងៃ មុននឹងចាប់ផ្តើមការសាងសង់ផ្លូវនេះ ដើម្បីសហការ និងចៀសវាងនូវផលប៉ះពាល់អវិជ្ជមាននានា។ ករណីអនុវត្តផ្ទុយពីបច្ចេកទេស និងបទប្បញ្ញត្តិខាងលើនេះ អាជ្ញាធរជាតិអប្សរានឹងធ្វើការផ្អាកការសាងសង់ផ្លូវនេះ ហើយចាត់វិធានការតាមផ្នែករដ្ឋបាល និងនីតិវិធីតុលាការជាធរមាន។
អាជ្ញាធរជាតិអប្សរាបន្តថា ការអនុញ្ញាតនេះមានសុពលភាពរយៈពេល ១ ឆ្នាំ ចាប់ពីថ្ងៃចុះហត្ថលេខានេះតទៅ បើលើសពីនេះត្រូវដាក់ពាក្យសុំសាជាថ្មី ដើម្បីបន្តសុពលភាពសាងសង់ជាមួយអាជ្ញាធរជាតិអប្សរាបន្តទៀត៕