.jpg)
ការប្រគល់រថយន្តសង្គ្រោះបន្ទាន់នៅសៀមរាបពីថ្ងៃ ២១ មេសា។ រូប មន្ទីរព័ត៌មានខេត្ត
សៀមរាបៈ កូរ៉េខាងត្បូងបានផ្តល់រថយន្តសង្គ្រោះបន្ទាន់ ៨ គ្រឿង និងរថយន្តពន្លត់អគ្គិភ័យ ៥ គ្រឿងជូនដល់រដ្ឋបាលខេត្តសៀមរាបសម្រាប់បម្រើប្រយោជន៍សាធារណៈ ខណៈខេត្តនេះមានមណ្ឌលសុខភាពប្រមាណ ១០០ ប៉ុន្តែនៅខ្វះរថយន្តសង្គ្រោះបន្ទាន់នៅឡើយ។
មន្ទីរព័ត៌មានខេត្តសៀមរាបបានឱ្យដឹងថា ពិធីប្រគល់ទទួល រថយន្តទាំងនោះធ្វើឡើងក្រោមអធិបតីភាពលោក ពិន ប្រាកដ អភិបាលរងខេត្តសៀមរាប និងលោក Park Woo-hee តំណាងរដ្ឋបាលខេត្តឃ្យុងជីរបស់កូរ៉េខាងត្បូងកាលពីថ្ងៃទី ២១ ខែមេសា ឆ្នាំ ២០២២។
ក្នុងពិធីនោះភាគីកម្ពុជាក៏បានផ្តល់នូវលិខិតថ្លែងអំណរគុណជូនដល់តំណាងរដ្ឋបាលខេត្តឃ្យុងជី និងអង្គការមូលនិធិកិច្ចការសង្គម Go&Do ផងដែរ។
លោក ពិន ប្រាកដ អភិបាលរងខេត្តទទួលបន្ទុកវិស័យសុខាភិបាលបានថ្លែងថា ការផ្តល់រថយន្តទាំងនេះ វាពិតជាមានសារៈសំខាន់ណាស់ក្នុងការបម្រើប្រយោជន៍សាធារណៈក្នុងខេត្តសៀមរាប ជាពិសេសលើការជួយសង្គ្រោះអ្នកជំងឺនិងការអន្តរាគមន៍លើគ្រោះអគ្គិភ័យ។
លោកថា៖ «ក្នុងនាមរដ្ឋបាលខេត្តសៀមរាប សូមអំពាវនាវដល់សប្បុរសជន និងរដ្ឋបាលខេត្តឃ្យុងជី បន្តជួយផ្ដល់នូវរថយន្តសង្គ្រោះបន្ទាន់ និងរថយន្តពន្លត់អគ្គិភ័យបន្ថែមទៀត ដើម្បីធ្វើឱ្យការបម្រើផលប្រយោជន៍សាធារណៈក្នុងខេត្តកាន់តែមានប្រសិទ្ធភាព និងមានភាពងាយស្រួល» ។
លោក ពិន ប្រាកដ បានឱ្យដឹងថា នៅទូទាំងខេត្តសៀមរាបមានមណ្ឌលសុខភាពចំនួន ៩៣ ប៉ុន្តែមណ្ឌលសុខភាពខ្លះ មិនទាន់មានរថយន្តសង្គ្រោះបន្ទាន់នៅឡើយ។
លោក Park Woo-hee តំណាងរដ្ឋបាលខេត្តឃ្យុងជី បានសម្ដែងនូវការសប្បាយរីករាយ នៅពេលលោកបានឃើញរថយន្តជំនួយរបស់ខេត្តឃ្យុងជីនេះត្រូវបានរដ្ឋបាលខេត្តសៀមរាប យកមកប្រើប្រាស់ចំគោលដៅយ៉ាងមានប្រសិទ្ធភាព។
បន្ថែមពីនេះលោកបានសន្យាថា នឹងពាំនាំសំណូមពររបស់រដ្ឋបាលខេត្តសៀមរាបដាក់ជូនថ្នាក់ដឹកនាំខេត្តឃ្យុងជី ដើម្បីពិចារណាផ្តល់ជំនួយបន្តទៀត ។
ប្រធានមន្ទីរសុខាភិបាលខេត្តសៀមរាប លោក ក្រូស សារ៉ាត់ ប្រាប់ភ្នំពេញប៉ុស្តិ៍ថា លោកមិនទាន់ទទួលបានព័ត៌មាននេះនៅឡើយទេ។
ចំណែកស្នងការនគរបាលខេត្តសៀមរាបលោក តេង ច័ន្ទណាត បានប្រាប់ភ្នំពេញប៉ុស្តិ៍ថា លោកមិនទាន់ទទួលគោលការណ៍ឱ្យចាត់ចែងរថយន្តពន្លត់អគ្គិភ័យបន្ដនៅឡើយទេ។
ក៏ប៉ុន្តែលោកថា ចំពោះសមត្ថកិច្ចខេត្ត មានតែអបអរចំពោះការទទួលបានជំនួយផ្សេងៗពីបណ្តាប្រទេសជាដៃគូ ដែលជួយតាមរយៈអង្គការ ឬតាមរយៈរដ្ឋបាលខេត្តនានា។
លោកថា៖ «ជាធម្មតាទាក់ទងអគ្គិភ័យយើងត្រូវការទាំងមនុស្ស និងសម្ភារផ្សេងៗទៀត ដូចជារថយន្តផងដែរ»។
លោកបានឱ្យដឹងថា បច្ចុប្បន្ននេះមានរថយន្តពន្លត់អគ្គិភ័យប្រចាំការនៅខេត្តសៀមរាបប្រមាណ ១៥ គ្រឿង នៅគ្រប់ក្រុង-ស្រុក សម្រាប់ចេញជួយអន្តរាគមន៍ករណីឆាបឆេះទាន់ពេលវេលា។
គួររំឭកថា កាលពីឆ្នាំ ២០១៩ រដ្ឋបាលខេត្តឃ្យុងជី ធ្លាប់បានផ្តល់ជូនខេត្តសៀមរាបនូវរថយន្តសង្គ្រោះបន្ទាន់ ៤ គ្រឿង រថយន្តពន្លត់អគ្គិភ័យ ២ គ្រឿង។ នៅឆ្នាំ ២០២០ ខេត្តឃ្យុងជីបានប្រគល់រថយន្តពន្លត់អគ្គិភ័យ ១ គ្រឿង និងនៅឆ្នាំ ២០២១ ខេត្តឃ្យុងជី បានប្រគល់រថយន្តសង្គ្រោះបន្ទាន់ ៤ គ្រឿង និងរថយន្តពន្លត់អគ្គិភ័យចំនួន ២ គ្រឿង៕
