ភ្នំពេញៈ កម្ពុជា-ឡាវប្តេជ្ញាបន្តកសាងទំនាក់ទំនងរវាងប្រទេសទាំង ២ និងពង្រីកកិច្ចសហប្រតិបត្តិការរវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈឡាវឱ្យកាន់តែមានការរីកចម្រើនបន្ថែមទៀតជាពិសេសបន្តកិច្ចសហការរក្សាសន្តិសុខតាមព្រំដែនផងដែរ។
ការប្តេជ្ញាកសាងទំនាក់ទំនងនេះត្រូវបានធ្វើឡើងក្នុងឱកាសរដ្ឋមន្ត្រីក្រសួងមហាផ្ទៃលោក ស ខេង អនុញ្ញាតឱ្យឯកអគ្គរដ្ឋទូតឡាវប្រចាំកម្ពុជាដែលទើបតែងតាំងថ្មីលោក បូរកែវ ភូមិវង់សាយ ចូលជួបសម្តែងការគួរសម និងពិភាក្សាការងារកាលពីថ្ងៃទី ២០ ខែមេសា ឆ្នាំ ២០២២។
នៅក្នុងជំនួបនោះ លោក ស ខេង បានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អប្រកបដោយវឌ្ឍនភាពឥតឈប់ឈររវាងកម្ពុជា-ឡាវ ក្នុងនោះរវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈឡាវដោយបានយកចិត្តទុកដាក់ពង្រឹង និងពង្រីកកិច្ចសហប្រតិបត្តិការយ៉ាងល្អប្រសើរក្នុងរយៈពេលកន្លងមក។
លោកបានលើកឡើងផងដែរថា៖ «ទោះបីជាកន្លងមកស្ថិតក្នុងស្ថានការណ៍នៃការរីករាលដាលនៃជំងឺកូវីដ ១៩ យ៉ាងណាក៏ដោយ ប៉ុន្តែក្រសួងមហាផ្ទៃកម្ពុជា និងក្រសួងសន្តិសុខសាធារណៈឡាវ បានខិតខំស្វែងរកឱកាស ដើម្បីបង្កើតកិច្ចសហប្រតិបត្តិការរួមគ្នាតាមរយៈការជួបប្រជុំតាមអនឡាញជាដើម និងបានចុះហត្ថលេខាលើកិច្ចសហប្រតិបត្តិការជាមួយគ្នា ដើម្បីរក្សាសន្តិសុខជូនប្រជាពលរដ្ឋនៃប្រទេសទាំង ២ ពិសេសកិច្ចសហការរក្សាសន្តិសុខតាមព្រំដែនផងដែរ»។
លោករដ្ឋមន្ត្រីក្រសួងមហាផ្ទៃបង្ហាញការជឿជាក់ថា ក្នុងអាណត្តិការទូតរបស់លោក បូរកែវ ភូមិវង់សាយ ដែលទើបតែងតាំងជាឯកអគ្គរដ្ឋទូតថ្មីនេះនឹងបន្តជំរុញកិច្ចសហប្រតិបត្តិការរវាងក្រសួងទាំង ២ ឱ្យកាន់តែសកម្មថែមទៀត។
ជាការឆ្លើយតបលោក បូរកែវ ភូមិវង់សាយ បានយកឱកាសនោះថ្លែងអំណរគុណចំពោះរដ្ឋាភិបាលកម្ពុជាដែលបានជួយគាំទ្រលើកិច្ចខិតខំប្រឹងប្រែងប្រយុទ្ធប្រឆាំងនៃជំងឺកូវីដ ១៩ តាមរយៈការផ្តល់ជំនួយផ្សេងៗលើផ្នែកសុខាភិបាលដល់ប្រទេសឡាវនាពេលកន្លងមក។
ជាមួយគ្នានេះ លោកបានបង្ហាញការប្តេជ្ញាចិត្តក្នុងអាណត្តិបេសកកម្មការងារនៅកម្ពុជា ដោយលោកថានឹងខិតខំកសាងទំនាក់ទំនងរវាងប្រទេសទាំង ២ ព្រមទាំងបន្តខិតខំពង្រឹង និងពង្រីកកិច្ចសហប្រតិបត្តិការរវាងក្រសួងមហាផ្ទៃកម្ពុជា និងក្រសួងសន្តិសុខសាធារណឡាវឱ្យកាន់តែរីកចម្រើនព្រមទាំងជោគជ័យបន្ថែមទៀតតទៅថ្ងៃអនាគត។
ស្របជាមួយគ្នានេះលោកឯកអគ្គរដ្ឋទូតថ្មីបានបង្ហាញនូវការឯកភាពចំពោះការលើកឡើងរបស់លោក ស ខេង ថា បើទោះជាជួបប្រទះនូវវិបត្តិកូវីដក្តី ក៏ថ្នាក់ដឹកនាំនៃប្រទេសទាំង ២ នៅតែបន្តខិតខំលើកកម្ពស់នូវកិច្ចសហប្រតិបត្តិការដ៏ល្អជាមួយគ្នា។ ជាក់ស្តែងបាន សបញ្ជាក់ឱ្យឃើញតាមរយៈដំណើរទស្សនកិច្ចរបស់នាយករដ្ឋមន្ត្រីឡាវមកកាន់កម្ពុជា និងកិច្ចប្រជុំថ្នាក់ដឹកនាំក្នុងឱកាសដែលកម្ពុជាទទួលធ្វើជាម្ចាស់ផ្ទះនៃកិច្ចប្រជុំអាស៊ានឆ្នាំ ២០២២ នេះ។
ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា លោក គិន ភា បានមានប្រសាសន៍ថា ទំនាក់ទំនងរវាងប្រទេសកម្ពុជា និងឡាវនៅតែមានស្ថានភាពល្អប្រសើរទាំងក្របខ័ណ្ឌទ្វេភាគី និងពហុភាគី។
លោកថា៖ «យើងឃើញកិច្ចសហប្រតិបត្តិការរវាងប្រទេសទាំង ២ ល្អប្រសើរ យើងមិនមានការខ្វែងគំនិតគ្នា ឬខ្វែងទស្សនៈគ្នាទេ ហើយជាទូទៅបើគិតជាប្រពៃណីនៃទំនាក់ទំនងប្រទេសទាំង ២ គឺជាទំនាក់ទំនងបងប្អូន និងអ្នកជិតខាងល្អហើយតែងតែផ្តល់នូវការគោរពគ្នាទៅវិញទៅមក ហើយគាំទ្រគ្នាទៅវិញទៅមកទាំងក្នុងក្របខ័ណ្ឌទ្វេភាគី ក៏ដូចជាក្របខ័ណ្ឌពហុភាគី»។
ចំពោះសន្តិសុខនៅតាមព្រំដែននៃប្រទេសទាំង ២ វិញលោក គិន ភា បានថ្លែងថា នៅបន្តមានភាពល្អប្រសើរ ទាំងការបង្ក្រាបបទល្មើសផ្សេងៗ រាប់ទាំងបទល្មើសគ្រឿងញៀន ការជួញដូរមនុស្សឆ្លងដែន និងឧក្រិដ្ឋកម្មផ្សេងៗនៅតាមបណ្តោយព្រំដែនជាដើម។
លោកបានបញ្ជាក់ថា៖ «គឺភាគីទាំង ២ សហការគ្នាបានល្អ យើងមានរឿងយល់ច្រឡំនឹងគ្នាតែម្តងទេពាក់ព័ន្ធជាមួយបញ្ហាព្រំដែននៅអូរតាង៉ាវ និងអូរអាឡៃ ហើយយើងឃើញប្រទេសទាំង ២ ក៏បានទទួលយកដំណោះស្រាយមួយដែលទទួលយកបានសងខាង ហើយបន្ទាប់មកមិនឃើញមានបញ្ហាអ្វីនោះទេ៕