ភ្នំពេញៈ មន្ត្រីនគរបាល ២ នាក់ស្លាប់ នៅក្នុងប្រតិបត្តិការបង្ក្រាបគ្រឿងញៀន នៅក្នុងភូមិចន្ទ្រាថ្មី ឃុំទួលព្រេជ ស្រុកអង្គស្នួល ខេត្តកណ្តាល កាលពីរសៀលថ្ងៃទី ២១ មេសា ក្រោយពីមានការបាញ់តដៃគ្នារវាងនគរបាល និងក្រុមជនល្មើស។
លោក គង់ ស៊ីដន ស្នងការរងទទួលផែនប្រឆាំងគ្រឿងញៀននៃស្នងការដ្ឋាននគរបាលខេត្តកណ្ដាល បានឱ្យដឹងនៅថ្ងៃទី ២១ មេសាថា ជនរងគ្រោះឈ្មោះ ជុច សុភា ជានាយនគរបាលប៉ុស្តិ៍ទួលព្រេជ និងឈ្មោះ រីម សុផាន់ណា ជាមន្ត្រីផ្នែកគ្រឿងញៀន ស្រុកអង្គស្នួលនៃស្នងការដ្ឋាននគរបាលខេត្តកណ្តាល។ ចំពោះជនសង្ស័យម្នាក់ដែលបានបាញ់មន្ត្រីនគរបាលស្លាប់ត្រូវបានកម្លាំងសមត្ថកិច្ចចាប់បានម្នាក់ជាជនដៃដល់ឈ្មោះ ធីម ឌឿន ហៅ ពែក ភេទប្រុស អាយុ ២១ ឆ្នាំ ក្នុងចំណោមបក្ខពួកប្រហែល ១០ នាក់ទៀតបានរត់គេចខ្លួន។
លោកបន្តថា៖ «ករណីនេះកម្លាំងសមត្ថកិច្ចរបស់ខ្ញុំកំពុងតែធ្វើការបន្តទៀត ហើយខ្ញុំក៏មិនទាន់អាចបញ្ជាក់លម្អិតជុំវិញហេតុការណ៍នេះភ្លាមៗទេ។ ខ្ញុំកំពុងបន្តការងារទៀត»។
ទោះយ៉ាងណាបើតាមមន្ត្រីនគរបាលស្រុកអង្គស្នួល ១ រូបស្នើសុំមិនឱ្យបញ្ចេញឈ្មោះបានប្រាប់នៅថ្ងៃទី ២១ មេសា ថា ការបង្ក្រាបក្រុមជនជួញដូរគ្រឿងញៀនខាងលើនេះគឺសមត្ថកិច្ចស្រុកអង្គស្នួលសហការជាមួយនគរបាលប៉ុស្តិ៍ទួលព្រេជ បានស្រាវជ្រាវ និងតាមដានសកម្មភាពរបស់ជនសង្ស័យដែលជាមុខសញ្ញាចាស់នេះជាយូរមកហើយ។ លុះដល់វេលាម៉ោងជាង ១២ រសៀល ថ្ងៃទី ២១ មេសា សមត្ថកិច្ចបានចេញប្រតិបត្តិការបង្ក្រាបក្រុមជនសង្ស័យគ្រឿងញៀននៅចំណុចភូមិចន្ទ្រាថ្មី ឃុំទួលព្រេជ ស្រុកអង្គស្នួល ខណៈកំពុងប្រតិបត្តិការនោះស្រាប់តែក្រុមជនសង្ស័យបានបាញ់សំដៅមកលើកម្លាំងសមត្ថកិច្ចបណ្តាលឱ្យត្រូវលោក ជុច សុភា ជានាយនគរបាលប៉ុស្តិ៍ទួលព្រេជស្លាប់ភ្លាមៗនៅកន្លែងកើតហេតុ។ ចំណែកម្នាក់ទៀតឈ្មោះ រីម សុផាន់ណា ជាមន្ត្រីផ្នែកគ្រឿងញៀនស្រុកអង្គស្នួលត្រូវបានក្រុមជនសង្ស័យបាញ់ឱ្យត្រូវរបួសធ្ងន់ហើយត្រូវសមត្ថកិច្ចដឹកទៅសង្គ្រោះបន្ទាន់នៅមន្ទីរពេទ្យព្រះកុសុមៈតែបានដាច់ខ្យល់ស្លាប់ក្រោយបញ្ជូនដល់មន្ទីរពេទ្យ។ ក្នុងប្រតិបត្តិការនោះដែរកម្លាំងសមត្ថកិច្ចបានបាញ់ការពារខ្លួនហើយត្រូវចំដៃរបស់ជនសង្ស័យម្នាក់ឈ្មោះ ធីម ឌឿន ហៅ ពែក ភេទប្រុស អាយុ ២១ ឆ្នាំ (ចាប់ខ្លួន) រស់នៅភូមិត្រពាំងត្បែង ឃុំសំរោងលើ រងរបួសដៃធ្ងន់ និងបក្ខពួកប្រហែល ១០ នាក់ទៀតបានរត់គេចខ្លួនពីកន្លែងកើតហេតុ។ ចំពោះវត្ថុតាងដែលសមត្ថកិច្ចរឹបអូសបានមានកាំភ្លើងខ្លីម៉ាករូឡូ ១ ដើម។
លោកស្រី ជួង ខែម ជាមន្ត្រីឃុំទួលព្រេជ ប្រាប់នៅថ្ងៃទី ២១ មេសាថា ប្រជាពលរដ្ឋនៅក្នុងឃុំទួលព្រេជពិសេសអាជ្ញាធរស្រុកអង្គស្នួលទាំងមូលមានការសោកស្តាយជាពន់ពេកចំពោះមរណភាពរបស់លោក ជុច សុភា ជានាយនគរបាលប៉ុស្តិ៍ទួលព្រេជ។ លោកមានវីរភាពខ្ពស់ណាស់ក្នុងការការពារថែរក្សាសន្តិសុខក្នុងឃុំទាំងមូល។ ចំពោះហេតុការណ៍ដែលបានកើតឡើងលើរូបលោកនៅរសៀលថ្ងៃទី ២១ មេសា ពេលដែលគាត់ចុះបង្ក្រាបក្រុមជនជួញដូរគ្រឿងញៀននៅក្នុងភូមិទួលព្រេជហើយក្រុមជនសង្ស័យពួននៅក្នុងផ្ទះ។ គាត់ត្រូវបានក្រុមជនសង្ស័យបាញ់ត្រូវពី ៣ ទៅ ៤ គ្រាប់ ហើយបានស្លាប់ភ្លាមៗនៅកន្លែងកើតហេតុ។ «កន្លងមកមានដែររឿងគ្រឿងញៀននេះ តែមិនដល់បាញ់សម្លាប់បែបនេះទេ។ ខ្ញុំរួមនឹងមន្ត្រីមានការសោកស្តាយណាស់»៕
វីដេអូ៖