.jpg)
មន្ទីរពេទ្យបង្អែកពោធិ៍ចិនតុង។ ហេង ជីវ័ន
ភ្នំពេញៈ រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានជម្រាបទៅអភិបាលរាជធានី-ខេត្ដឱ្យណែនាំដល់មន្ទីរសុខាភិបាលរាជធានី-ខេត្ដ ត្រូវធ្វើឱ្យមូលដ្ឋានសុខាភិបាលសាធារណៈទាំងអស់រៀបចំបែងចែកការងារផ្តល់សេវា ២៤ ម៉ោងលើ ២៤ ម៉ោង ដល់ប្រជាពលរដ្ឋ ក្រោយក្រសួងសង្កេតឃើញមន្ទីរពេទ្យបង្អែក និងមណ្ឌលសុខភាពមួយចំនួនតូចមានការខ្វះខាតក្នុងការផ្តល់សេវា។
តាមលិខិតរបស់លោក ម៉ម ប៊ុនហេង ជម្រាបទៅអភិបាលរាជធានី-ខេត្ដ នៅថ្ងៃទី ២០ ខែមេសា បានណែនាំក្រើនរំឭកដល់មន្ទីរសុខាភិបាលរាជធានី-ខេត្ត ដើម្បីឱ្យមូលដ្ឋានសុខាភិបាលសាធារណៈទាំងអស់រៀបចំបែងចែកការងារផ្ដល់សេវា ២៤ ម៉ោងលើ ២៤ ម៉ោង ដល់ប្រជាពលរដ្ឋដោយត្រូវមានបញ្ជីឈ្មោះ និងលេខទូរស័ព្ទអ្នកផ្ដល់សេវាបិទផ្សាយនៅកន្លែងផ្ដល់សេវារបស់ខ្លួន។ លោកថ្លែងថា៖ «ក្រសួងបានសង្កេតឃើញថា មានមន្ទីរពេទ្យបង្អែក និងមណ្ឌលសុខភាពមួយចំនួនធំបានយកចិត្តទុកដាក់ក្នុងការផ្តល់សេវាជូនប្រជាពលរដ្ឋបានល្អប្រសើរ ប៉ុន្តែនៅមានមន្ទីរពេទ្យបង្អែក និងមណ្ឌលសុខភាពមួយចំនួនតូច នៅមានការខ្វះខាតក្នុងការផ្តល់សេវា ២៤ ម៉ោង លើ ២៤ ម៉ោងនៅឡើយ»។
លោករដ្ឋមន្ត្រីបានជម្រាបទៅអភិបាលរាជធានីខេត្ដឱ្យធ្វើការណែនាំក្រើនរំឭកដល់មន្ទីរសុខាភិបាលនៃរដ្ឋបាលរាជធានី-ខេត្តឱ្យចាត់វិធានការដល់ការិយាល័យស្រុកប្រតិបត្តិ និងមូលដ្ឋានសុខាភិបាលសាធារណៈទាំងអស់ត្រូវធានាការផ្តល់សេវា ២៤ ម៉ោង លើ ២៤ ម៉ោង ជូនប្រជាពលរដ្ឋដែលទៅទទួលសេវា។
លោកបានបញ្ជាក់ថា ការិយាល័យស្រុកប្រតិបត្តិ និងមូលដ្ឋានសុខាភិបាលសាធារណៈទាំងអស់ ត្រូវធ្វើបច្ចុប្បន្នភាពបញ្ជីឈ្មោះ និងលេខទូរស័ព្ទអ្នកប្រចាំការ ផ្តល់សេវានៅតាមមូលដ្ឋានសុខាភិបាលជាទៀងទាត់ បិទផ្សាយនៅកន្លែងផ្តល់សេវារបស់ខ្លួន និងផ្ញើមកមន្ទីរសុខាភិបាលនៃរដ្ឋបាលរាជធានី-ខេត្ត ដើម្បីតាមដាន ត្រួតពិនិត្យការអនុវត្តជាប់ជាប្រចាំ។
លោក សែជូ សិទ្ធិជោតិ អនុប្រធានមន្ទីរសុខាភិបាលខេត្តព្រះសីហនុប្រាប់ភ្នំពេញប៉ុស្ដិ៍នៅថ្ងៃទី ២១ មេសាថា ក្រោយពីទទួលបានលិខិតណែនាំនេះ មន្ទីរសុខាភិបាលបានចែករំលែកលិខិតនេះភ្លាមៗទៅដល់ក្រុមការងារនៅតាមមណ្ឌលសុខភាពក្នុងមូលដ្ឋានខេត្ដចំនួន ១៥ ហើយនៅសប្ដាហ៍ក្រោយ ក្នុងពេលប្រជុំប្រចាំត្រីមាសនឹងធ្វើការណែនាំបន្ថែមដល់ប្រធានមណ្ឌលសុខភាពទាំងអស់ តាមសេចក្ដីណែនាំក្នុងលិខិតនេះ។
លោកថ្លែងថា៖ «ទោះបីឯកឧត្ដមរដ្ឋមន្ដ្រីមិនចេញលិខិតនេះ កិច្ចការងារនេះ ក៏ជាតួនាទី និងភារកិច្ចរបស់មន្ទីរសុខាភិបាលខេត្ដដែរ»។ លោកបន្តថា កាលពីថ្ងៃទី ៦ មេសាមន្ទីរសុខាភិបាលបានប្រជុំត្រួតពិនិត្យសមិទ្ធផលការងារឆ្នាំ ២០២១ និងលើកទិសដៅឆ្នាំ ២០២២ ក៏បានលើកឡើងពីការអនុវត្ដភារកិច្ច ការងាររបស់មណ្ឌលសុខភាពនៅក្នុងខេត្ដដែរ។ លោកបញ្ជាក់ថា៖«ខ្ញុំបានណែនាំដល់គ្រប់មណ្ឌលសុខភាពទាំងអស់ត្រូវតែរៀបចំ ទី ១ ត្រូវសម្អាតបរិស្ថាននៅជុំវិញមណ្ឌលសុខភាព ដើម្បីអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ ទី ២ ចាត់តាំងការយាមកាម ដោយមានឈ្មោះ មានលេខទូរស័ព្ទច្បាស់លាស់របស់មណ្ឌលសុខភាព និងមន្ទីរពេទ្យបង្អែកនៅក្នុងខេត្ដ»។
កាលពីថ្ងៃទី ១៨ មេសា ប្រធានមណ្ឌលសុខភាព និងក្រុមគ្រូពេទ្យចំនួន ៦ នាក់ បម្រើការនៅមណ្ឌលសុខភាពឃុំកែវផុស ស្រុកស្ទឹងហាវ ខេត្តព្រះសីហនុ ត្រូវបានរដ្ឋមន្ដ្រីក្រសួងសុខាភិបាលឯកភាពឱ្យរដ្ឋបាលខេត្ដសម្រេចដាក់ទណ្ឌកម្មខាងវិន័យថ្នាក់ទី ១ ពីការប្រព្រឹត្តកំហុស និងភាពឆ្គាំឆ្គងក្នុងវិជ្ជាជីវៈករណីស្ត្រីម្នាក់ទៅរកសេវាសម្រាលកូន ប៉ុន្ដែគ្មានគ្រូពេទ្យប្រចាំការ បណ្ដាលឱ្យស្ត្រីម្នាក់នោះសម្រាលកូននៅមុខមណ្ឌលសុខភាពដោយខ្លួនឯង។
ទាក់ទងនឹងបញ្ហានេះ លោក គួច ចំរើន អភិបាលនៃគណៈអភិបាលខេត្តព្រះសីហនុ នាថ្ងៃទី ១៨ ខែមេសា បានដឹកនាំកិច្ចប្រជុំស្តាប់របាយការណ៍ និងបានណែនាំដល់ប្រធានមណ្ឌលសុខភាព និងក្រុមគ្រូពេទ្យ ដែលបម្រើការនៅមណ្ឌលសុខភាពឃុំកែវផុស ត្រូវធ្វើការកែលម្អ ដើម្បីជាការប៉ះប៉ូវនូវកំហុសឆ្គងកន្លងមក។ ករណីមិនមានការកែប្រែនោះ រដ្ឋបាលខេត្តនឹងអនុវត្តវិធានការបន្ត។
ករណីកំហុសគ្រូពេទ្យនេះ លោក សិទ្ធិជោតិ បានបញ្ជាក់ថា ក្រុមគ្រូពេទ្យដែលនៅយាមប្រចាំការ គឺប្ដូរវេនគ្នាចុះឡើងនៅមណ្ឌលសុខភាពឃុំកែវផុសរយៈពេលពេញ ១ សប្ដាហ៍ ដោយមិនមានពេលសម្រាកទេ។ ប៉ុន្ដែនៅថ្ងៃដែលកើតមានរឿងនោះ គឺគ្រូពេទ្យដែលត្រូវម៉ោងប្រចាំការមានកូនឈឺ ចំណែកគ្រូពេទ្យដែលត្រូវមកប្ដូរវេននោះ ដោយសាររវល់ប្រចាំការ ១ សប្ដាហ៍កន្លងមកហើយក៏ឆ្លៀតពេលទៅធ្វើបុណ្យ បង្សុកូលដល់ជីដូនជីតា ដូច្នេះចន្លោះម៉ោងដែលគ្រូពេទ្យប្ដូរវេននេះបណ្ដាលឱ្យយឺតពេលប្រហែលកន្លះម៉ោង ក៏ត្រូវចំពេលដែលពលរដ្ឋមករកសេវាសម្រាលកូននៅមណ្ឌលសុខភាពតែម្ដង៕
វីដេអូ៖
