.jpg)
ឧត្តរមានជ័យៈ អ្នកបើកត្រាក់ទ័រឈូសដីអាយុ៣០ឆ្នាំម្នាក់បានស្លាប់ពេលបញ្ចូនដល់មន្ទីរពេទ្យ ក្រោយពីបើកត្រាក់ទ័រកិនលើមីនតោនផ្ទុះកាលពីថ្ងៃសុក្រទី២២ ខែមេសាស្ថិតក្នុងភូមិស្វាយចេក ឃុំថ្លាត ស្រុកអន្លង់វែង ខេត្តឧត្តរមានជ័យ។ នេះបើយោងតាមលោកអុល រុននាយប៉ុស្តិ៍ថ្លាត។
លោកអុល រុនបានឱ្យដឹងថា ជនរងគ្រោះដែលមានឈ្មោះឈៀក លីបានបើកត្រាក់ទ័រទៅឈូសឆាយដីចម្ការស្ថិតក្នុងភូមិស្វាយចេកនោះកាលពីព្រឹកថ្ងៃសុក្រ។ នៅវេលាម៉ោងប្រមាណជា១១និង៥០នាទី ត្រាក់ទ័របានបើកកិនលើមីនតោន១គ្រាប់ ដែលបណ្តាលឱ្យផ្ទុះនៅចម្ងាយពីភូមិប្រមាណជា៣គីឡូម៉ែត្រ។
លោកបានបញ្ជាក់ថា៖«គាត់កំពុងតែឈូសដី កូនឈើតូចៗហ្នឹង ក៏ផ្ទុះតែម្តង។ ត្រូវរបួសយ៉ាងធ្ងន់ធ្ងរ គឺត្រូវដៃផ្នែកខាងឆ្វេងខ្ទេចតែម្តង។ ដាច់ដៃខាងឆ្វេង។ បងប្អូនសាច់ញាតិគាត់បានជួយយកទៅមន្ទីរពេទ្យស្រុកដែរ តែស្លាប់ដោយសារតែរបួសនៅទីនោះ។ ប្រហែលជាប៉ើងត្រូវនឹងកាត់តាវ៉ូអាត្រាក់ទ័រហ្នឹង»។ លោកបន្តថា តំបន់នោះគឺជាតំបន់មីន ដែលបន្សល់ទុកពីសង្គ្រាម ហើយករណីផ្ទុះដល់ស្លាប់នេះទើបតែលើកទីមួយទេក្នុងឃុំថ្លាតនោះ។
លោកហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់បានបង្ហោះនៅលើហ្វេសប៊ុករបស់លោកថា
ត្រាក់ទ័រត្រូវបានបំផ្លាញ ហើយនេះជាមរតកនៃសង្គ្រាម។ លោកបានចូលរួមមរណៈទុក្ខនិងសោកស្តាយជាមួយគ្រួសារជនរងគ្រោះផងដែរ៕
