The Phnom Penh Post Search

Search form




Logo of Phnom Penh Post newspaper Phnom Penh Post - អភិបាលខេត្ត​កំពង់ចាម​ចុះ​ពិនិត្យ​វឌ្ឍនភាព​នៃ​ការស្ថាបនា​ទំនប់​ទ្វារ​ទឹក​នៅ​ចំណុចប្រសព្វ​ ៣ ​ស្រុក

អភិបាលខេត្ត​កំពង់ចាម​ចុះ​ពិនិត្យ​វឌ្ឍនភាព​នៃ​ការស្ថាបនា​ទំនប់​ទ្វារ​ទឹក​នៅ​ចំណុចប្រសព្វ​ ៣ ​ស្រុក

Content image - Phnom Penh Post
ឯកឧត្តម អ៊ុន ចាន់ដា អញ្ជើញពិនិត្យវឌ្ឍនភាពនៃការស្ថាបនាទំនប់ទ្វារទឹកស្ទឹងឆ្វេង ជាចំណុចប្រសព្វស្រុកចំនួនបីមាន ស្រុកបាធាយ ស្រុកជើងព្រៃ និងស្រុកកងមាស។ ក្រសួងព័ត៌មាន

អភិបាលខេត្ត​កំពង់ចាម​ចុះ​ពិនិត្យ​វឌ្ឍនភាព​នៃ​ការស្ថាបនា​ទំនប់​ទ្វារ​ទឹក​នៅ​ចំណុចប្រសព្វ​ ៣ ​ស្រុក

កំពង់ចាមៈ លោក អ៊ុន ចាន់ដា អភិបាលខេត្ត​កំពង់ចាម​បាន​ដឹកនាំ​អភិបាលរង​ខេត្ត មន្ទីរ អង្គភាព​ជំនាញ អាជ្ញាធរ​មូលដ្ឋាន​ស្រុក​បាធាយ ស្រុក​ជើងព្រៃ និង​ស្រុក​កងមាស​រួម​នឹង​មន្ត្រី​ពាក់ព័ន្ធ​ចុះ​ពិនិត្យ​វឌ្ឍនភាព​នៃ​ការស្ថាបនា​ទំនប់​ទ្វារ​ទឹក ស្ទឹង​ឆ្វេង ដែល​ស្ថិតនៅ​ចំណុចប្រសព្វ​នៃ​ស្រុក​ទាំង​ ៣ នៅ​ព្រឹក​ថ្ងៃទី​ ២២ ខែមេសា ឆ្នាំ ​២០២២ ​នេះ​។

លោក អ៊ុម វិបុល ប្រធាន​មន្ទីរ​ធនធានទឹក និង​ឧតុនិយម​បាន​ប្រាប់​ឱ្យដឹងថា សំណង់​បង្ហៀរ (​ទ្វារ​ ២) លើ​ស្ទឹង​ឆ្វេង សំណង់​បង្អៀរ​ (​ទ្វារ​ ២) ទី​ ១ ប្រវែង ១០០ ម៉ែត្រ និង សំណង់​បង្អៀរ (​ទ្វារ​ ២) ទី​ ២ មាន ប្រវែង​ ២០០ ម៉ែត្រ ទទឹង​មាន​ប្រវែង ៥,៦០ ម៉ែត្រ​។ ដោយ សំណង់​បង្អៀរ (​ទ្វារ​ ២) ទី​ ១ សាងសង់​បាន ៩០% ហើយ ដែល​ចាប់ផ្ដើម​សាងសង់​ក្នុង​ខែ​មិនា ឆ្នាំ​ ២០២២​។ ដោយឡែក សំណង់​បង្អៀរ (​ទ្វារ​ ២) ទី​ ២ កំពុង​ចាប់ផ្ដើម​ដំណើរការ​សាងសង់​។

ឯកឧត្តម អ៊ុន ចាន់ដា អភិបាលខេត្ត បាន​គូសបញ្ជាក់ថា ការសាងសង់​ទំនប់​បង្ហៀរ​នេះ គឺមាន​ផលប្រយោជន៍​ច្រើន​សម្រាប់​ប្រជាពលរដ្ឋ​នៅ​តំបន់​នេះ​ដូចជា នៅពេលដែល​ទឹក​ស្រក​ផុត​ទៅ​ប្រជាពលរដ្ឋ និង​សិស្សានុសិស្ស​នៅ​តំបន់​នេះ អាចធ្វើ​ដំណើរ​ឆ្លងស្ទឹង ឬ​ដឹក​កសិផល​ឆ្លងកាត់ ដោយ​មិនចាំបាច់​ប្រើ​ទូក​ចម្លង ឬ​ធ្វើ​ស្ពាន​ឆ្លង​ឡើយ​។

ម្យ៉ាងទៀត​ទំនប់​បង្ហៀរ​នេះ មាន​ទ្វារ​បិទ​បើក សម្រាប់​ទប់ទឹក និង​បង្ហូរទឹក​ចេញ ដែល​ប្រការនេះ​ធ្វើឱ្យ​ប្រជាពលរដ្ឋ​ដែល​នៅក្នុង​ស្រុក​ជើងព្រៃ ស្រុក​កងមាស និង​ស្រុក​បាធាយ អាចមាន​ទឹក​ប្រើប្រាស់​គ្រប់គ្រាន់ ជាពិសេស​សម្រាប់​ស្រោច​ដំណាំ​នឹង​ធ្វើ​ស្រូវប្រាំង​ជាដើម​។

បងប្អូន​ប្រជាកសិករ​ទទួលផល​ពី​សំណង់​ធារាសាស្ត្រ​នេះ រួមមាន​៖ ស្រុក​បាធាយ មាន​ឃុំ​ច្បារអំពៅ មាន​ផ្ទៃដី ស្រូវវស្សា ៧០ ហិកតា និង​ស្រូវប្រាំង ៥០៧ ហិកតា ស្មើ ៨១៤ ​គ្រួសារ ស្រុក​ជើងព្រៃ មាន ៣ ​ឃុំ គឺ​ផ្តៅ​ជុំ ឃុំ​សូទិព្វ និង​ឃុំ​ព្រៃចារ មាន​ផ្ទៃ​ស្រូវប្រាំង ១៦០៨ ហិកតា ស្មើ ៨៨៥ ​គ្រួសារ និង​ស្រុក​កងមាស ឃុំ​ព្រែកកុយ ស្រូវប្រាំង ១១០ ហិកតា ស្មើ ៤៦០ ​គ្រួសារ​។

រដ្ឋបាលខេត្ត​កំពង់ចាម​បានឱ្យដឹងថា ក្នុង​ឆ្នាំ​ ២០២១ កន្លងទៅ តំបន់​ខាងលើ​មានការ​ចម្រូងចម្រាស់ ខ្វែងគំនិត​គ្នា​ពី​សំណាក់​ប្រជាពលរដ្ឋ​នៅ​សងខាង​ស្ទឹង ដោយ​កាលនោះ​មានមតិ​ខ្លះ​មិនឱ្យ​ទប់​ទំនប់​រក្សា​ទឹក និង​មតិ​ខ្លះទៀត​ចង់​ទប់​ទំនប់​រក្សា​ទឹក​។ រហូតដល់ អភិបាលខេត្ត​កំពង់ចាម​បាន​ដឹកនាំ​មន្ត្រី​ជំនាញ ចុះមក​ពិនិត្យ​សិក្សា​ដោយផ្ទាល់​ទើប​រៀបចំ​ផែនការ​ដើម្បី​សាងសង់​ទំនប់​បង្ហៀរ នេះ​ឡើង​ក្នុង​គោលបំណង​ដោះស្រាយ​ទំនាស់​របស់​ប្រជាពលរដ្ឋ និង​ជួយ​ដោះស្រាយ​ប្រជាពលរដ្ឋ​ចំនួន ៣ ស្រុក ឱ្យមាន​ប្រភពទឹក​ប្រើប្រាស់ និង​ស្រោចស្រព​ដំណាំ​ស្រូវប្រាំង​ជាដើម​៕

អត្ថបទគួរចាប់អារម្មណ៍