.jpg)
លោក វ៉ី សំណាង អភិបាលខេត្តកំពង់ស្ពឺបានជួបសំណេះសំណាលជាមួយប្រជាការពារភូមិចំនួន ២ ៤៨៦ នាក់នៅក្នុងស្រុកភ្នំស្រួច និងស្រុកឱរ៉ាល់កាលពីថ្ងៃទី ២១ ខែមេសានេះ។ រដ្ឋបាល ខេត្តកំពង់ស្ពឺ
កំពង់ស្ពឺៈ លោក វ៉ី សំណាង អភិបាលខេត្តកំពង់ស្ពឺបានជួបសំណេះសំណាលជាមួយប្រជាការពារភូមិចំនួន ២ ៤៨៦ នាក់នៅក្នុងស្រុកភ្នំស្រួច និងស្រុកឱរ៉ាល់កាលពីថ្ងៃទី ២១ ខែមេសានេះ ហើយបានលើកឡើងពីតួនាទីយ៉ាងសំខាន់របស់ពួកគាត់នៅក្នុងការចូលរួមសហការជាមួយអាជ្ញាធរមូលដ្ឋាន។
ក្នុងឱកាសសំណេះសំណាលនោះលោកអភិបាលបានលើកឡើងថា កម្លាំងប្រជាការពារ គឺជាកម្លាំងស្នូលដ៏សំខាន់ សម្រាប់អាជ្ញាធរក្នុងមូលដ្ឋាន ក្នុងការដើរតួនាទីយ៉ាងសំខាន់ក្នុងការចូលរួមសហការគ្រប់សកម្មភាពរបស់អាជ្ញាធរមិនថា កិច្ចការងារសន្តិសុខ មនុស្សធម៌ ឬការងាររដ្ឋបាលផ្សេងៗ។ ក្នុងនោះមានដូចជាការជួយសម្រួលចរាចរណ៍កកស្ទះ រៀបចំសណ្តាប់ធ្នាប់ក្នុងមូលដ្ឋានជាដើម គឺតែងតែមានវត្តមានរបស់ពួកគាត់នៅជាមួយសកម្មភាពទាំងនេះជានិច្ច។
លោកបានក៏បានសម្ដែងនូវការកោតសរសើរ និងវាយតម្លៃខ្ពស់ ចំពោះបងប្អូនជាប្រជាការពារទាំងអស់ ដែលបានលះបង់ពេលវេលា កម្លាំងកាយ កម្លាំងចិត្ត និងប្រាជ្ញាស្មារតី ចូលរួមសហការជាមួយអាជ្ញាធរដែនដី ដែលធ្វើឱ្យភូមិឃុំ មានសន្តិសុខ សណ្តាប់ធ្នាប់ល្អ ជាភូមិឃុំប្រកបដោយសុវត្ថិភាព។ ពិសេសគឺចូលរួមការពារសមិទ្ធផលនានា ដែលជាសម្បត្តិរួមរបស់យើងឱ្យបានគង់វង្សយូរអង្វែង ដើម្បីជាប្រយោជន៍របស់យើងទាំងអស់គ្នា និងកូនចៅជំនាន់ក្រោយ។
លោកបានបន្តថា ដោយមានការគាំទ្ររាជរដ្ឋាភិបាល តាមរយៈការអនុវត្តន៍ គោលនយោបាយ ភូមិឃុំមានសុវត្ថិភាព រក្សាបាន សន្តិសុខ សណ្តាប់ធ្នាប់សាធារណៈបានល្អ បង្ក្រាបបានបទល្មើសគ្រប់ប្រភេទ ធ្វើឱ្យប្រជាពលរដ្ឋរស់នៅដោយសុខដុមរមនា ដោយមានការអភិវឌ្ឍរីកចម្រើនលើគ្រប់វិស័យ និងធ្វើឱ្យភាពក្រីក្រក្នុងមូលដ្ឋានបានថយចុះមួយកម្រិតផងដែរ៕
