ប៉ៃលិនៈ មន្ត្រីកាកបាទក្រហមកម្ពុជាបានចុះអប់រំផ្សព្វផ្សាយស្តីពីវិធាន ការពារខ្លួនពីជំងឺកូវីដ១៩ ការរក្សាសុខភាពផ្លូវចិត្តឱ្យបានល្អ ក្នុងពេលមានការរាតត្បាតពីជំងឺកូវីដ១៩ និងវិធីសាស្ត្រកាត់បន្ថយភាពតានតឹង និងការថប់អារម្មណ៍ ជូនដល់ថ្នាក់ដឹកនាំ និងមន្ត្រីពន្ធនាគារ ព្រមទាំងអ្នកជាប់ឃុំ ក្នុងពន្ធនាគារខេត្តប៉ៃលិនកាលពីថ្ងៃទី២០ ខែមេសានេះ។
យោងតាមក្រសួងព័ត៌មានបានឱ្យដឹងថា ការចុះអប់រំផ្សព្វផ្សាយនេះដឹកនាំដោយលោក ឌឹន គឹម នាយកប្រតិបត្តិសាខាកាកបាទក្រហមកម្ពុជាខេត្តប៉ៃលិន និងលោក ហង់ ចាន់សូណា ប្រធានការិយាល័យសុខភាពគ្រាអាសន្ន នៃ ទីស្នាក់ការកណ្ដាលកាកបាទក្រហមកម្ពុជា។
លោក ហង់ ចាន់សូណា បានបញ្ជាក់ថា គោលបំណងនៃការចុះអប់រំផ្សព្វផ្សាយនៅក្នុងពន្ធនាគារខេត្តប៉ៃលិននាពេលនេះ គឺដើម្បីបន្តបញ្ជ្រាបការយល់ដឹងដល់ថ្នាក់ដឹកនាំពន្ធនាគារ មន្ត្រីអនុរក្សពន្ធនាគារ និងអ្នកជាប់ឃុំក្នុងពន្ធនាគារទាំងអស់ ពីវិធានការពារខ្លួនពីជំងឺកូវីដ១៩ ការរក្សាសុខភាពផ្លូវចិត្តឱ្យបានល្អ ក្នុងពេលមានការរាតត្បាតពីជំងឺកូវីដ១៩ និងវិធីសាស្ត្រកាត់បន្ថយភាពតានតឹង និងការថប់អារម្មណ៍ ដែលបណ្ដាលមកពីការរាតត្បាតនៃជំងឺកូវីដ១៩។
លោកបានបញ្ជាក់ថា៖«ដោយសារការរាតត្បាតនៃជំងឺកូវីដ១៩ មានប្រជាពលរដ្ឋមួយចំនួនបានទទួលរងនូវបញ្ហាសុខភាពផ្លូវចិត្ត ភាពតានតឹង និងការថប់អារម្មណ៍ ដែលបណ្តាលមកពីវិបត្តិក្នុងមុខរបររកទទួលទាន បញ្ហាជីវភាពគ្រួសារ និងបញ្ហាជាច្រើនទៀត។ ទាំងនេះតម្រូវឱ្យមានការពន្យល់ណែនាំ លើកទឹកចិត្ត ដើម្បីបន្ធូរបន្ថយភាពតានតឹងក្នុងផ្លូវចិត្តរបស់ពួកគាត់»។
លោកបានបន្តថា មានរោគសញ្ញាច្រើនដែលបង្ហាញថាប្រជាពលរដ្ឋខ្លះកំពុងតែមានបញ្ហាសុខភាពផ្លូវចិត្ត ភាពតានតឹង ថប់អារម្មណ៍ ដូចជា មានការឈឺក្បាល រោយស្មានិងក មិនឃ្លានអាហារ និងពិបាកលេបអាហារ ឈឺខ្នង ណែនទ្រូង ឈឺក្រពះ និងសាច់ដុំ។
ចំណែកឯវិធីសាស្ដ្រក្នុងការកាត់បន្ថយបញ្ហាសុខភាពផ្លូវចិត្តនេះ គឺត្រូវអនុវត្តនូវវិធីសាស្ត្រដូចជា ធ្វើសមាធិ គេងឱ្យបានគ្រប់គ្រាន់ ធ្វើអ្វីដែលយើងចូលចិត្ត ហាត់ប្រាណប្រចាំថ្ងៃ ចេញទៅក្រៅ ត្រូវសកម្មក្នុងសហគមន៍ បរិភោគអាហារមានសុខភាព ចៀសវាងការ ទទួលទានកាហ្វេ និងគ្រឿងស្រវឹង។
លោក ឌិន គឹម នាយកប្រតិបត្តិសាខាកាកបាទក្រហមកម្ពុជាខេត្តប៉ៃលិន បានមានប្រសាសន៍ថា កន្លងមកសាខាកាកបាទ ក្រហមកម្ពុជាខេត្តប៉ៃលិន បានធ្វើការចុះអប់រំផ្សព្វផ្សាយស្តីពីការបង្ការទប់ស្កាត់ការឆ្លងរាលដាលនៃជំងឺកូវីដ១៩ ជូនដល់ប្រជា ពលរដ្ឋនៅតាមមូលដ្ឋាន ក៏ដូចជានៅក្នុងពន្ធនាគារខេត្តប៉ៃលិនបានជាច្រើនលើកមកហើយ៕