សៀមរាបៈ អង្គការជំនួយផ្នែកច្បាប់នៃកម្ពុជា( LAC ) និងអង្គការក្រុមការងារដើម្បីដោះស្រាយទំនាស់ (ACT) ក្រោមកិច្ចសហការជាមួយរដ្ឋបាលសាលាខេត្ត និងមន្ទីរព័ត៌មានខេត្តសៀមរាបបានរៀបចំសិក្ខាសាលាមួយពី "អង្គភាពពាក់ព័ន្ឋ និងការអនុវត្តច្បាប់របបសារព័ត៌មាន"នាថ្ងៃទី ២២ ខែមេសា។
យោងតាមក្រសួងព័ត៌មានបានឱ្យដឹងថា គោលបំណងសំខាន់របស់សិក្ខាសាលានេះ គឺដើម្បីផ្តល់ជូនបន្ថែមដល់អ្នកសារព័ត៌មាននិងមន្ត្រីអនុវត្តច្បាប់ពាក់ព័ន្ធ ក្នុងខេត្តសៀមរាប ឱ្យបានយល់ដឹងកាន់តែច្បាស់អំពីសិទ្ធិ និងច្បាប់ ស្តីពីរបបសារព័ត៌មាន និងការប្រកាន់យករបស់អ្នកសារព័ត៌មាន អំពីក្រមសីលធម៌វិជ្ជាជីវ:របស់ខ្លួន អនុវត្តឱ្យស្របតាមទិដ្ឋភាពច្បាប់ និងលិខិតបទដ្ឋានគតិយុត្តិនានា ដែលមានជាធរមាន ស្របពេលដែលវិស័យព័ត៌មាននៅកម្ពុជាមានការរីកចម្រើន ហើយចំនួនអ្នកប្រើប្រាស់ប្រព័ន្ធបណ្តាញសង្គមនានា កាន់តែមានចំនួនកើនឡើងឥតឈប់ឈរផងនោះ។
លោកលីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាបបានមានប្រសាសន៍ក្នុងឱកាសនោះថា“ព័ត៌មាន” គឺជាវិស័យមួយដ៏មានសារ:សំខាន់ ក្នុងការទំនាក់ទំនងរវាងប្រជាពលរដ្ឋជាមួយសង្គម និងសេដ្ឋកិច្ចជាតិ និងអន្តរជាតិ តាមរយ:ការមើល ការអាន ការស្តាប់ ពីបណ្តាញផ្សព្វផ្សាយនានា ទាំងក្នុង និងក្រៅប្រទេស។
លោកបានបញ្ជាក់ថា៖«បច្ចុប្បន្ននេះ យើងសង្កេតឃើញថា វិស័យព័ត៌មាននៅលើពិភពលោក ជាពិសេសនៅក្នុងព្រះរាជាណាចក្រកម្ពុជា កំពុងមានសន្ទុះរីកចម្រើនគួរជាទីមោទន:។ ជាមួយនឹងការរីកចម្រើន នៃវិស័យព័ត៌មាននេះ ក្នុងនោះ វាមានទាំងចំណុចវិជ្ជមានផង និងអវិជ្ជមានផងដែរ»។
លោកបានបន្តថា មានភាពវិជ្ជមានជាច្រើននៃវិស័យព័ត៌មាន ដោយសារប្រជាពលរដ្ឋអាចទទួលបានដំណឹងផ្សេងៗ ដែលពាក់ព័ន្ធនឹងស្ថិរភាពនយោបាយ សន្តិសុខ និងសុវត្ថិភាពសង្គម ស្ថានភាពសេដ្ឋកិច្ច និងការអប់រំផ្សេងៗ ទាំងការថែទាំសុខភាព ចំណីអាហារ អនាម័យបរិស្ថាន។ល។ លើសពីនោះ តាមរយ:ប្រព័ន្ធផ្សព្វផ្សាយនានា ហើយក៏ជាស្ពានចម្លង នូវរាល់សំណូមពរ បញ្ហា មតិយោបល់រវាងប្រជាពលរដ្ឋ ជាមួយរាជរដ្ឋាភិបាល និងពីរាជរដ្ឋាភិបាលមកប្រជាពលរដ្ឋវិញ បានដឹង និងធ្វើការដោះស្រាយ។
ជាមួយគ្នានេះភាពអវិជ្ជមានក៏កើតមានញឹកញាប់ដែរ ដោយហេតុថា ស្ថាប័នព័ត៌មាន ឬបុគ្គលព័ត៌មានខ្លះផ្សព្វផ្សាយព័ត៌មានរបស់ខ្លួនខ្វះប្រភព មានលក្ខណ:មិនពិត បំពុល និងបំផ្លើស ហើយមានគោលបំណងទាញផលចំណេញខាងនយោបាយ ពីប្រព័ន្ធផ្សព្វផ្សាយនោះ នឹងធ្វើឱ្យប្រជាពលរដ្ឋមានការយល់ច្រឡំចំពោះរាជរដ្ឋាភិបាល និងអាជ្ញាធរមានសមត្ថកិច្ច ធ្វើឱ្យប្រជាពលរដ្ឋមានការថ្នាំងថ្នាក់ ជាមួយអាជ្ញាធរមូលដ្ឋាន និងថ្នាក់ដឹកនាំ។
ក្នុងនាមក្រសួងព័ត៌មាន និងក្នុងនាមរដ្ឋបាលសាលាខេត្តសៀមរាប លោកលីវ សុខុន បានជំរុញដល់សិក្ខាកាម ក្នុងអង្គសិក្ខាសាលា ប្រឹងប្រែងស្តាប់ការពន្យល់បកស្រាយរបស់វាគ្មិន និងពិភាក្សាសួរនាំឱ្យស្របទៅតាមចំណុចនៃប្រធានបទក្នុងអង្គសិក្ខាសាលា និងសង្ឃឹមថាក្រោយបញ្ចប់សិក្ខាសាលាដែលមានរយ:ពេលមួយថ្ងៃនេះទៅ អ្នកសារព័ត៌មាន និងមន្ត្រីអនុវត្តផ្នែកច្បាប់នឹងយល់កាន់តែច្បាស់អំពីតួនាទីភារកិច្ចក្នុងការអនុវត្តច្បាប់របបសារព័ត៌មាន ស្របទៅតាមក្រមសីលធម៌វិជ្ជាជីវ:រៀងៗខ្លួន៕