.jpg)
នគរបាលអន្តរជាតិកម្ពុជា និងនគរបាលអន្តរជាតិជួបពិភាក្សាការងារ ដើម្បីពង្រឹងកិច្ចសហប្រតិបត្តិការ កាលពីថ្ងៃទី២១ ខែមេសា។ រូបថតប៉ូលីស
ភ្នំពេញៈ លោកភោគ កុលកុមារ អនុប្រធាននាយកដ្ឋានរដ្ឋបាលទូទៅ និងជាប្រធានការិយាល័យនគរបាលអន្តរជាតិកម្ពុជាបានជួបប្រជុំទ្វេភាគីជាមួយប្រតិភូរបស់អគ្គលេខាធិការដ្ឋាននគរបាលអន្តរជាតិនៅព្រឹកថ្ងៃទី១៩ ដល់ថ្ងៃទី២១ ខែមេសានេះ ដើម្បីពង្រឹងនូវទំនាក់ទំនងកិច្ចសហប្រតិបត្តិការឱ្យកាន់តែជិតស្និទ្ធ និងក្នុងនាមជាសមាជិកនគរបាលអន្តរជាតិ។
អង្គភាពពាក់ព័ន្ធចូលរួម រួមមានការិយាល័យនគរបាលអន្តរជាតិ, នាយកដ្ឋានប្រឆាំងបទល្មើសបច្ចេកវិទ្យា, នាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន, អគ្គនាយកដ្ឋានអន្តោប្រវេសន៍ និងសាលាបណ្ឌិត្យសភានគរបាលកម្ពុជា។
ក្នុងឱកាសនោះ លោកភោគ កុលកុមារ និងសហការីបានធ្វើបទបង្ហាញរំលេចនូវនិន្នាការបទល្មើសថ្មីៗ និងករណីជោគជ័យទៅលើកិច្ចសហប្រតិបត្តិការទ្វេភាគី និងបណ្តាប្រទេសដែលជាសមាជិករបស់នគរបាលអន្តរជាតិ ដែលការិយាល័យនគរបាលអន្តរជាតិកម្ពុជាបានធ្វើកន្លងមក។
លោកក៏បានស្វាគមន៍តំណាងការិយាល័យសម្របសម្រួលសម្រាប់អាស៊ីនិងប៉ាស៊ីហ្វិកខាងត្បូង របស់អគ្គលេខាធិការដ្ឋាននគរបាលអន្តរជាតិ ដែលមានគម្រោងធ្វើទស្សនកិច្ចនៅការិយាល័យនគរបាលអន្តរជាតិកម្ពុជា ដើម្បីត្រួតពិនិត្យស្តង់ដា គុណភាព ក៏ដូចជាគាំទ្រការផ្គត់ផ្គង់ទៅលើប្រព័ន្ធផ្ទុកទិន្នន័យI-24/7 និងកម្មវិធីកសាងសមត្ថភាពនានា។
លោកភោគ កុលកុមារបានបន្តថា ប្រសិនបើមានសំណូមពរអំពីតម្រូវការគាំទ្រពីអគ្គលេខាធិការដ្ឋាននគរបាលអន្តរជាតិ ដូចជាការធ្វើបច្ចុប្បន្នភាព ទៅលើឧបករណ៍ផ្ទុកទិន្នន័យI-24/7 ឬកម្មវិធីកសាងសមត្ថភាពនានា សូមផ្តល់ដំណឹងជាមុន ដើម្បីឱ្យខាងលោកមានពេលក្នុងការរៀបចំការគាំទ្រទៅតាមសំណូមពរ៕
