.jpg)
អ្នកដំណើរបើកបរឆ្លងកាត់ក្រសួងអប់រំ។ ហេង ជីវ័ន
ភ្នំពេញៈ ក្រសួងអប់រំ យុវជន និងកីឡា បានអំពាវនាវសុំឱ្យសប្បុរសជនក្នុងនិងក្រៅប្រទេសជួយឧបត្ថម្ភជារង្វាន់ និងការលើកទឹកចិត្តបន្ថែមដល់ជយលាភី សិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យានាពេលប្រឡងក្នុងខែមិថុនាខាងមុខនេះ។
សេចក្តីអំពាវនាវរបស់ក្រសួងអប់រំបានឱ្យដឹងថា ក្នុងគោលបំណងលើកកម្ពស់គុណភាពអប់រំ តាមរយៈការអភិវឌ្ឍធនធានមនុស្ស ដែលមានចំណេះដឹង និងជំនាញ ប្រកបដោយសមត្ថភាពខ្ពស់ សំដៅអភិវឌ្ឍសេដ្ឋកិច្ច ក៏ដូចជា កសាងសង្គមជាតិឱ្យបានរឹងមាំ ក្រសួងអប់រំ យុវជន និងកីឡា តែងតែរៀបចំការប្រឡងជ្រើសរើសសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យាសម្រាប់សិស្សថ្នាក់ទី ៩ និងថ្នាក់ទី១២។ នៅក្នុងឆ្នាំនេះ ដំណើរការនឹងប្រព្រឹត្តទៅចាប់ពីថ្ងៃទី១៣ ខែមិថុនា ឆ្នាំ ២០២២ នៅវិទ្យាល័យ ១០ មករា ១៩៧៩ ខេត្ត សៀមរាប។
ពិធីបើក នឹងប្រព្រឹត្តទៅនាថ្ងៃទី១២ ខែមិថុនា ឆ្នាំ ២០២២ វេលាម៉ោង ៨:០០នាទីព្រឹក នៅក្នុងបរិវេណវិទ្យាល័យ ១០ មករា ១៩៧៩ ខេត្តសៀមរាប។ ពិធីបិទ ចែកវិញ្ញាបនបត្រ និងរង្វាន់ជយលាភី នឹងប្រព្រឹត្តទៅនាថ្ងៃទី១៩ ខែមិថុនា ឆ្នាំ ២០២២ វេលាម៉ោង ៨:០០ នាទីព្រឹក នៅក្នុងបរិវេណវិទ្យាល័យ ១០ មករា ១៩៧៩ ខេត្តសៀមរាប។
ក្រសួងបានសរសេរថា៖«ដើម្បីធ្វើឱ្យពិធីនេះកាន់តែអធិកអធម ក្រសួងអប់រំ យុវជន និងកីឡាសូមធ្វើការអំពាវនាវចំពោះសម្តេច ឯកឧត្តម លោកជំទាវ លោកឧកញ៉ា អ្នកឧកញ៉ា លោក លោកស្រី អ្នកនាងកញ្ញា និងសប្បុរសជនក្នុងប្រទេស ក៏ដូចក្រៅប្រទេស មេត្តា ជួយឧបត្ថម្ភជាថវិកា ជាសម្ភារ សម្រាប់ជារង្វាន់ និងការលើកទឹកចិត្តបន្ថែមដល់ជយលាភីសិស្សពូកែទូទាំងប្រទេស សំដៅ ជំរុញចលនានេះឱ្យកាន់តែមានប្រសិទ្ធភាពខ្ពស់នៅឆ្នាំបន្តបន្ទាប់»។
សប្បុរសជនត្រូវបានអញ្ជើញឱ្យចូលរួមក្នុងពិធីបិទ ចែកវិញ្ញាបនបត្រ និងរង្វាន់ជយលាភី ដើម្បីទទួលលិខិត ថ្លែងអំណរគុណរបស់ក្រសួងអប់រំ យុវជន និងកីឡា។ កន្លែងទទួលអំណោយ៖ នាយកដ្ឋានកិច្ចការប្រឡង ស្ថិតនៅអគារលេខ ១៦៩ មហាវិថីព្រះនរោត្តម រាជធានី ភ្នំពេញ ទូរសព្ទលេខ ០១២ ៨៤៣ ៤៧៥ និង ០៧៧ ៩៩៤ ២០០៕
