.jpg)
ពលរដ្ឋជាង ១៥០០ គ្រួសារ មកទទួលយកអំណោយជាអង្ករចំនួន ៣០តោន នាថ្ងៃសៅរ៍ ទី២៣ ខែមេសា។ រូបថត វេង សាខុន
ត្បូងឃ្មុំ/កំពង់ចាមៈ រដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទ លោក វេង សាខុន លោក សៀង ណាំ សមាជិករដ្ឋសភានិងអាជ្ញាធរមូលដ្ឋាននាំយកអង្ករចំនួន ៣០ តោនមកចែកជូនពលរដ្ឋជាង ១៥០០ គ្រួសារនាថ្ងៃសៅរ៍ ទី២៣ ខែមេសា។
ការចែកនេះត្រូវបានធ្វើឡើងក្នុងពិធីបុណ្យឆ្លងដំបូលព្រះវិហារ សម្ពោធសមិទ្ធផលនានា និងពុទ្ធាភិសេក ក្នុងវត្តឥន្ទកោសីចុងកោះជ្រូក ភូមិទីបួន ឃុំកោះសំរោង ស្រុកកំពង់សៀម។
បន្ទាប់ពីលោកអភិបាលស្រុករាយការណ៍ជូនជ្រាបដោយសង្ខេបអំពីសមិទ្ធផលសំខាន់ៗដែលវត្តបានខិតខំកសាងកន្លងមក ថ្នាក់ដឹកនាំ និងក្រុមការងារបានធ្វើការសំណេះសំណាលជាមួយបងប្អូនពុទ្ធិបរិស័ទពាក់ព័ន្ធបញ្ហាជីវភាព សន្តិសុខទូទៅ ការអភិវឌ្ឍមូលដ្ឋាន បញ្ហាកូវីដ១៩ យុទ្ធនាការបោះឆ្នោត និងការទៅបំពេញសិទ្ធិជាពលរដ្ឋទៅបោះឆ្នោតនាពេលខាងមុខ។
កាយវិការដែលប្រកបដោយស្មារតីទទួលខុសត្រូវ និងសិល្ប:នៃការចែករំលែកនេះ ពិតជាបានបង្ហាញពីការគិតគូរយកចិត្តទុកដាក់អំពីបញ្ហាជីវភាព សេចក្តីត្រូវការ រួមសុខ រួមទុក្ខរបស់បងប្អូនប្រជាពលរដ្ឋនៅមូលដ្ឋាន។ សកម្មភាពយ៉ាងសកម្មរបស់សមាជិកក្រុមការងារនេះបានឆ្លើយតបតាមប្រសាសន៍ណែនាំដ៏ខ្ពង់ខ្ពស់ប្រមុខរដ្ឋាភិបាល ដែលបានលើកឡើងឱ្យមន្រ្តីត្រូវចុះមូលដ្ឋានឱ្យបានជាប់ជាប្រចាំដើម្បីប្រមូលយកនូវរាល់បញ្ហា និងសេចក្តីត្រូវការចាំបាច់របស់បងប្អូន រួចធ្វើការដោះស្រាយជូនឱ្យបានទាន់ពេលវេលា ទូលំទូលាយ និងមានប្រសិទ្ធភាព។ នេះបើយោងតាមហ្វេសប៊ុករបស់លោករដ្ឋមន្រ្តី វេង សាខុន។
លោករដ្ឋមន្រ្តី ក៏បានជម្រាបជូនអង្គពិធីផងដែរអំពីបញ្ហានយោបាយជាតិ និងអន្តរជាតិ បច្ចុប្បន្នភាពនៃវិបត្តិជំងឺឆ្លងកូវីដ១៩ ការស្តារសេដ្ឋកិច្ចជាតិឡើងវិញស្របតាមគន្លងប្រក្រតីភាពថ្មី សកម្មភាពបង្កបង្កើនផល ព្រមជាមួយការផលិតស្បៀងប្រចាំថ្ងៃ និងជាពិសេសគុណសម្បត្តិដ៏ធំធេងរបស់រាជរដ្ឋាភិបាលដែលបានកសាង និងអភិវឌ្ឍប្រទេសជាតិឱ្យមានសុខសន្តិភាព និងការរីកចម្រើនដែលមាននាពេលបច្ចុប្បន្ន៕
