មណ្ឌលគិរីៈ មន្ទីរបរិស្ថានខេត្តមណ្ឌលគិរី ក្រោមកិច្ចសហការជាមួយអគ្គនាយកដ្ឋានចំណេះដឹង និងព័ត៌មានបរិស្ថាននៃក្រសួងបរិស្ថានបានចុះត្រួតពិនិត្យនិងវាយតម្លៃសាលាមេត្រីភាពបរិស្ថាននៅវិទ្យាល័យ ហ៊ុនសែនកែវសីមា, សាលាបឋមសិក្សាអូរអាម, សាលាបឋមសិក្សាពូត្រំ និងអនុវិទ្យាល័យឆ្នែងកាលពីថ្ងៃសុក្រ ទី២២ ខែមេសា។
ការចុះពិនិត្យនេះត្រូវបានធ្វើឡើងក្រោមអធិបតីភាពលោកស្រី មាស ច័ន្ទធីតា អគ្គនាយិការង នៃអគ្គនាយកដ្ឋានចំណេះដឹង និងព័ត៌មានបរិស្ថាន ព្រមទាំងមានការចូលរួមពីមន្រ្តីនៃមន្ទីរបរិស្ថាននិងតំណាងអង្គការ WCS ផងដែរ។
លោកស្រី មាស ច័ន្ទធីតា បានថ្លែងក្នុងឱកាសនោះថា ចលនាប្រឡងប្រណាំង សាលាមេត្រីបរិស្ថាន មិនត្រឹមតែជំរុញឱ្យសិស្សានុសិស្ស លោកគ្រូ អ្នកគ្រូ ប្រែក្លាយចំណេះដឹងអំពីបរិស្ថានទៅជាប្រតិបត្តិមេត្រីភាពបរិស្ថាននៅក្នុងសាលារៀនប៉ុណ្ណោះទេ តែថែមទាំងជំរុញឱ្យមានការអនុវត្តនៅក្នុងសហគមន៍ ថែមទៀតផងដែរ។ វាចាំបាច់ត្រូវមានការចូលរួមពីអាណាព្យាបាល សិស្សានុសិស្ស អាជ្ញាធរមូលដ្ឋាននិងអ្នកពាក់ព័ន្ធផ្សេងទៀតក្នុងសហគមន៍ ស្របតាមលក្ខខណ្ឌវិនិច្ឆ័យ ៤ ចំណុចនៃសាលាមេត្រីបរិស្ថាន។
អនុលោមតាមក្របខណ្ឌការងារអាស៊ាន ស្តីពីសាលាមេត្រីបរិស្ថាន ក្រសួងបរិស្ថាន សហការជាមួយក្រសួងអប់រំ យុវជននិងកីឡា បានរៀបចំឱ្យមានការណែនាំដោយផ្តោតលើលក្ខណៈវិនិច្ឆ័យ ចំនួន០៤ រួមមាន៖(១) មានគោលការណ៍ និងរដ្ឋបាលរបស់សាលាលើការងារបរិស្ថាន, (២) មានការបង្រៀនមេរៀនបរិស្ថាននិងសកម្មភាពអប់រំបរិស្ថាន, (៣) មានសម្ភារបរិក្ខារអប់រំបរិស្ថាន ហេដ្ឋារចនាសម្ព័ន្ធ និងការប្រតិបត្តិបរិស្ថាន,(៤) មានភាពជាដៃគូជាមួយអ្នកពាក់ព័ន្ធ និងការផ្សព្វផ្សាយតាមសហគមន៍។
លោកស្រីបានគូសបញ្ជាក់ថា៖ «ការប្រឡងប្រណាំងសាលាមេត្រីបរិស្ថាន គឺជាគំនិតផ្តួចផ្តើមដ៏សំខាន់ និងជាយន្តការមួយដ៏មានសារៈសំខាន់ក្នុងចំណោមយន្តការ និងវិធានការជាច្រើនទៀតដែលក្រសួងបរិស្ថាន និងភាគីពាក់ព័ន្ធទាំងអស់ បានខិតខំជំរុញអនុវត្តជាបន្តបន្ទាប់សំដៅធ្វើឱ្យប្រសើរឡើងនូវ កិច្ចគាំពារបរិស្ថាន ការការពារធនធានធម្មជាតិ ការអភិរក្សជីវៈចម្រុះ និងការរស់នៅដោយចីរភាព តាមរយៈការបញ្រ្ជាបចំណេះដឹងនិងចំណេះធ្វើ ក្នុងចំណោមកុមារសិស្សានុសិស្ស និងយុវជន នៅតាមសាលារៀន និងគ្រឹះស្ថានអប់រំ ដែលជាកន្លែងប្រមូលផ្តុំមានលក្ខណៈងាយស្រួល ក្នុងការផ្លាស់ប្តូទម្លាប់ ផ្នត់គំនិត និងឥរិយាបថរបស់កុមារ និងយុវជនចំពោះអនាម័យ និងបរិស្ថាន»។
ក្នុងនាមក្រសួងបរិស្ថាន លោកស្រីបានថ្លែងអំណរគុណក្រសួងអប់រំ យុវជន និងកីឡា អាជ្ញាធរថ្នាក់ក្រោមជាតិ និងអ្នកពាក់ព័ន្ធទាំងអស់ដែលបានចូលរួមក្នុងចលនាប្រឡងប្រណាំងសាលាមេត្រីបរិស្ថាន៕