.jpg)
កម្លាំងនគរបាលទទួលបានថវិកា ៤លានរៀល ជាការលើកទឹកចិត្តក្នុងការបំបែកសំណុំរឿងរំលោភសម្លាប់ក្នុងក្រុងសំរោង។ រូបថត នគរបាលជាតិ
ឧត្តរមានជ័យៈ ថវិកាចំនួន៤ លានរៀលត្រូវបានលោក ហួត សុធី ស្នងការនគរបាលខេត្តប្រគល់ជូនកម្លាំងនគរបាលនៃអធិការដ្ឋាននគរបាលក្រុងសំរោង និងកម្លាំងផែនការងារនគរបាលព្រហ្មទណ្ឌខេត្តឧត្តរមានជ័យ កាលពីថ្ងៃទី២៣ ខែមេសានេះ ដើម្បីជាការលើកទឹកចិត្តក្នុងកិច្ចខិតខំយកចិត្តទុកដាក់ស្រាវជ្រាវស៊ើបអង្កេត និងបំបែកសំណុំរឿងករណីឃាតកម្មរំលោភសម្លាប់នាពេលថ្មីៗនេះ។
ថវិកាទាំងនោះបានមកពីលោកនាយឧត្តមសេនីយ៍ នេត សារឿន អគ្គស្នងការនគរបាលជាតិចំនួន ២លានរៀល, លោកប៉ែន កុសល្យ អភិបាល នៃគណៈអភិបាលខេត្តចំនួន ១លានរៀលនិងលោកឧត្តមសេនីយ៍ទោ ហួត សុធី ស្នងការនគរបាលខេត្តចំនួន ១ លានរៀលផងដែរ។
កិច្ចខិតខំប្រឹងប្រែងរបស់កម្លាំងនគរបាលបានឈានទៅរកការចាប់ខ្លួនជនល្មើសចំនួន ៣ នាក់ ដែលបានរំលោភនិងសម្លាប់លើយុវតីម្នាក់ក្នុងភូមិចម្ការចេក សង្កាត់អូរស្មាច់ ក្រុងសំរោង ខេត្តឧត្តរមានជ័យ កាលពីថ្ងៃទី១៥ ខែមេសា ឆ្នាំ ២០២២។ ជនទាំង ៣ នាក់ត្រូវបានសាលាដំបូងខេត្តឧត្តរមានជ័យ សម្រេចឃុំខ្លួនបណ្តោះអាសន្នដាក់ពន្ឋនាគារ ពីបទឃាតកម្មដោយមានអំពើឃោរឃៅ និងអំពើរំលោភសេពសន្ថវៈកាលពីថ្ងៃទី២២ ខែមេសានេះ៕
