ភ្នំពេញៈអង្គភាពប្រឆាំងអំពើពុករលួយ (អ.ប.ព.) និងក្រុមហ៊ុនជេធីអ៊ីនធើណេសិនណល (ខេមបូឌា) ឯ.ក របស់ជប៉ុនបានចុះហត្ថលេខាលើអនុស្សរណៈនៃការយោគយល់ (MOU) គ្នា ដើម្បីសហការប្រយុទ្ធប្រឆាំងអំពើពុករលួយដែលធ្វើឱ្យចំនួនចុះអនុស្សរណៈរវាង អ.ប.ព និងវិស័យឯកជនកើនដល់ជាង ១០០ ហើយ។
ពិធីចុះហត្ថលេខាលើអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការនេះត្រូវបានធ្វើឡើងរវាងលោកទេសរដ្ឋមន្ដ្រី ឱម យ៉ិនទៀង ប្រធានអង្គភាពប្រឆាំងអំពើពុករលួយនិងលោក Roy Manalili អគ្គនាយកក្រុមហ៊ុនជេធី អ៊ីនធើណេសិនណល (ខេមបូឌា) ឯ.ក JT International (Cambodia)Co.,Ltd(JTI) កាលពីថ្ងៃទី ២១ ខែមេសា នៅសណ្ឋាគារ Hyatt Regency Phnom Penh។
JTI ជាក្រុមហ៊ុនជប៉ុន ដែលមានទីស្នាក់ការនៅប្រទេសស្វ៊ីស ហើយមានបុគ្គលិកជិត ៥០០ នាក់ នៅកម្ពុជា។
អ.ប.ព បានបញ្ជាក់ថាការចុះហត្ថលេខានេះគឺ «បង្ហាញឱ្យឃើញនូវឆន្ទៈសហការក្នុងការប្រយុទ្ធប្រឆាំងអំពើពុករលួយតាមរយៈការចុះអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការជាមួយអង្គភាពប្រឆាំងអំពើពុករលួយ ដែលជាស្ថាប័នឯករាជ្យបង្គោលទទួលអាណតិ្តលើការងារនេះបន្ថែមលើក្រុមហ៊ុនជាតិអន្តរជាតិ-សភាពាណិជ្ជកម្ម-សមាគម-គ្រឹះស្ថានសាធារណៈចំនួន ១០៣ ដែលបានចុះអនុស្សរណៈជាមួយ អ.ប.ព. កន្លងមក»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី បានថ្លែងថា តាមរយៈការចុះ MOU រវាងរដ្ឋនិងវិស័យឯកជននេះគឺជាយន្តការមួយក្នុងចំណោមយន្តការផ្សេងៗទៀតរបស់អង្គភាពប្រឆាំងអំពើពុករលួយ ដើម្បីទប់ស្កាត់ការស៊ីសំណូកសូកប៉ាន់នៅក្នុងការប្រព្រឹត្តអំពើពុករលួយដែលក្រុមហ៊ុនតែងជួបប្រទះ។ លោកថា៖ « អ៊ីចឹងសម្រាប់ខ្ញុំ គិតថានេះជាគំនិតផ្តួចផ្តើមមួយរបស់អង្គភាពប្រឆាំងអំពើពុករលួយនៅក្នុងការជួយដល់ក្រុមហ៊ុន ដើម្បីឱ្យគាត់ប្រតិបត្តិការអាជីវកម្មស្អាតស្អំ» ។
លោកបានបញ្ជាក់ថា MOU នេះមានវិសាលភាពធំ ប៉ុន្តែរឿងដែលសំខាន់ជាងគេនោះ គឺក្រុមហ៊ុនទាំងឡាយណាដែលចង់ចៀសវាងពីការស៊ីសំណូកសូកប៉ាន់ ការបង់លុយសេវាក្រៅផ្លូវការ ដូច្នេះ MOU នេះអាចជាមធ្យោបាយមួយសម្រាប់ក្រុមហ៊ុនខ្លួនឯងបញ្ចៀសបញ្ហានេះ។
ទន្ទឹមនេះដែរ លោកបានលើកទឹកចិត្តដល់រដ្ឋាភិបាល ដែលជារួមគឺការបង្កលក្ខណៈ ឬការបង្កើតនូវបរិយាកាសស្អាតស្អំ ប្រតិបត្តិការអាជីវកម្មឱ្យស្អាតស្អំនិងបង្កើតនូវបរិយាកាសវិនិយោគស្មើៗភាពគ្នា។ លោកថា៖ «មានន័យថាក្រុមហ៊ុនតូចក្តី ធំក្តី គឺត្រូវតែគោរពច្បាប់ដូចគ្នា មានការអនុលោមស្មើៗគ្នា ទោះបីជាក្រុមហ៊ុនទាំងនោះមិនមាន MOU ប៉ុន្តែក្នុងនាមយើងជារដ្ឋាភិបាលគួរតែបង្កើតយន្តការឱ្យមាន ដើម្បីឱ្យក្រុមហ៊ុនទាំងអស់ អាចទទួលបាននូវការការពារពីការប្រព្រឹត្តអំពើពុករលួយ»។
ទាក់ទងអំពើពុករលួយនៅក្នុងវិស័យសាធារណៈវិញ លោក ប៉ិច ពិសី បានថ្លែងថា តាមការសិក្សាស្រាវជ្រាវរបស់អង្គការអន្តរជាតិផ្សេងៗបានបន្តរកឃើញថាអំពើពុករលួយនៅក្នុងវិស័យសាធារណៈនៅកម្ពុជានៅមានច្រើនជាពិសេសនៅក្នុងផ្នែកផ្តល់សេវាដល់ពលរដ្ឋក្តី និងផ្តល់ដល់វិស័យឯកជនក្តី។ ជាមួយនេះដែរលោកបានជំរុញដល់ស្ថាប័នពាក់ព័ន្ធអនុវត្តច្បាប់ដែលមានស្រាប់ឱ្យបានត្រឹមត្រូវនោះនឹងអាចកាត់បន្ថយអំពើពុករលួយបានហើយ។
ទន្ទឹមនឹងនេះដែរ អង្គភាពប្រឆាំងអំពើពុករលួយ បន្តស្វាគមន៍និងលើកទឹកចិត្តដល់វិស័យឯកជនដទៃទៀតឱ្យបន្តចូលរួមក្នុងការប្រយុទ្ធប្រឆាំងអំពើពុករលួយ ដើម្បីចូលរួមអនុវត្តនូវគោលនយោបាយកំណែទម្រង់ស៊ីជម្រៅរបស់រាជរដ្ឋាភិបាលកម្ពុជាលើការប្រយុទ្ធប្រឆាំងអំពើពុករលួយទាំងក្នុងវិស័យសាធារណៈ និងឯកជនសំដៅធានានូវប្រសិទ្ធភាព តម្លាភាព គណនេយ្យភាពក្នុងការប្រកបធុរកិច្ច និងផ្តល់សេវាសាធារណៈក្នុងគោលដៅលើកស្ទួយបរិយាកាសវិនិយោគអំណោយផលដល់ការប្រកួតប្រជែងដោយស្មើភាព និងការរីកចម្រើនប្រកបដោយចីរភាពនៅកម្ពុជា៕