ភ្នំពេញៈ នាយករដ្ឋមន្ត្រីឡាវ លោក ផនខាំ វីផាវ៉ាន់ (Phankham Viphavanh) ស្នើសុំឱ្យសាងសង់ស្ពានតភ្ជាប់រវាងកម្ពុជា និងឡាវ ដើម្បីធ្វើឱ្យទំនាក់ទំនងរវាងប្រជាជន និងប្រជាជនកាន់តែជិតស្និទ្ធនឹងគ្នា ខណៈលោកគ្រោងបំពេញទស្សនកិច្ចនៅខេត្ត ២ ជាប់ព្រំដែនកម្ពុជា ដើម្បីពង្រឹងកិច្ចសហប្រតិបត្តិការរវាងខេត្ត និងខេត្ត និងព្រំប្រទល់ជាមួយកម្ពុជា។
ការស្នើនេះធ្វើឡើងក្នុងជំនួបរវាងលោក និងលោកនាយករដ្ឋមន្ត្រី ហ៊ុន សែន នៅទីក្រុងកូម៉ាម៉ូតូប្រទេសជប៉ុននាថ្ងៃទី ២៣ ខែមេសា នៅមុនកិច្ចប្រជុំកំពូលស្ដីអំពីបញ្ហាទឹកតំបន់អាស៊ីប៉ាស៊ីហ្វិកលើកទី ៤ ដែលធ្វើឡើងរយៈពេល ២ ថ្ងៃគឺនៅថ្ងៃទី ២៣-២៤ ខែមេសា។
ហ្វេសប៊ុកលោក ហ៊ុន សែន បញ្ជាក់ ថា លោក វីផាវ៉ាន់ គ្រោងទៅទស្សនកិច្ចនៅខេត្តចំប៉ាសាក់ និងចំប៉ាលើ ប្រទេសឡាវ ដែលជាប់ព្រំដែនកម្ពុជា ដើម្បីពង្រឹងនូវកិច្ចសហប្រតិបត្តិការខេត្ត និងខេត្តដែលមានព្រំប្រទល់ជាមួយកម្ពុជា ដើម្បីបញ្ជាក់ពីគោលនយោបាយរបស់ប្រទេសទាំង ២ ក្នុងការជំរុញការលើកកម្ពស់ និងបម្រើផលប្រយោជន៍ប្រជាជននៃប្រទេសទាំង ២។
ហ្វេសប៊ុកដដែលបញ្ជាក់ថា៖ «ឯកឧត្តមនាយករដ្ឋមន្ត្រីឡាវក៏បានស្នើសុំឱ្យមានការសាងសង់ស្ពានតភ្ជាប់រវាងប្រទេសទាំង ២ ផងដែរ ដើម្បីឱ្យទំនាក់ទំនងរវាងប្រជាជន និងប្រជាជនកាន់តែជិតស្និទ្ធនឹងគ្នា ក៏ប៉ុន្តែទាក់ទងនឹងការសាងសង់ស្ពាននេះ ឯកឧត្តមរង់ចាំការពិភាក្សាជាមួយរដ្ឋមន្ត្រីក្រសួងសាធារណការឡាវសិន»។
ទាក់ទងទៅនឹងគម្រោងនៃការកសាងស្ពាននេះ លោក ហ៊ុន សែន ថ្លែងថា វាជារឿងដ៏ល្អបំផុត សម្រាប់ផ្សារភ្ជាប់ទំនាក់ទំនងរវាងប្រទេសទាំង ២ ឱ្យកាន់តែមានភាពល្អប្រសើរឡើង។
ជាមួយគ្នានេះផងដែរ លោក វីផាវ៉ាន់ ក៏បានស្នើឱ្យមានការផ្លាស់ប្ដូរទស្សនកិច្ច មេបញ្ជាការកងទ័ពនៃប្រទេសទាំង ២ ហើយក្នុងនោះលោកក៏បានអញ្ជើញលោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកទៅបំពេញទស្សនកិច្ចនៅប្រទេសឡាវនាពេលខាងមុខផងដែរ។
យោងតាមហ្វេសប៊ុកដដែល លោក ហ៊ុន សែន បានឯកភាពចំពោះការអញ្ជើញលោក ហ៊ុន ម៉ាណែត ទៅបំពេញទស្សនកិច្ចនៅប្រទេសឡាវ ដោយលោកលើកឡើងថា គឺជារឿងដ៏ល្អណាស់ និងពិតជាមានសារៈសំខាន់ក្នុងការពង្រឹងទំនាក់ទំនងរវាងកងទ័ពនៃប្រទេសទាំង ២ ឱ្យកាន់តែរឹងមាំបន្ថែមទៀត។
លោក វីផាវ៉ាន់ បានប្ដេជ្ញាចិត្តក្នុងការអនុវត្តសេចក្តីសម្រេច ដែលបានឯកភាពគ្នានាពេលកន្លងមក ជាពិសេសការបញ្ចប់នូវឯកសារមេពាក់ព័ន្ធទៅនឹងព្រំដែននៃប្រទេសទាំង ២ ខណៈលោកបានប្រកាសស្វាគមន៍ ចំពោះដំណើរបំពេញទស្សនកិច្ចរបស់លោក ហ៊ុន សែន នាពេលខាងមុខទៅកាន់ប្រទេសឡាវ។
លោកបានស្នើសុំឱ្យកម្ពុជាបន្តផ្លាស់ប្ដូរមតិយោបល់គ្នាទៅវិញទៅមក និងបានបង្ហាញការគាំទ្រចំពោះការបោះឆ្នោតឃុំសង្កាត់នៅក្នុងប្រទេសកម្ពុជា ដែលនឹងប្រព្រឹត្តទៅនៅខែមិថុនាខាងមុខ។
លោក ហ៊ុន សែន បានបង្ហាញមោទនភាពចំពោះទំនាក់ទំនងរវាងប្រទេសទាំង ២ ដោយលោកថ្លែងថា លទ្ធផលដែលប្រទេសទាំង ២ សម្រេចបានកន្លងមកនឹងធ្វើឱ្យទំនាក់ទំនង និងកិច្ចសហប្រតិបត្តិការរវាងប្រទេសទាំង ២ កាន់តែប្រសើរឡើងបន្ថែមទៀត។
លោក វីផាវ៉ាន់ បានអបអរសាទរចំពោះកម្ពុជាដែលទទួលធ្វើជាប្រធានអាស៊ាននៅឆ្នាំនេះ និងបានដើរតួនាទី «យ៉ាងសកម្ម» ក្នុងការដឹកនាំអាស៊ានកន្លងទៅ។
នៅក្នុងជំនួបជាមួយលោក បួរកែវ ភូមិវង្សសៃ ឯកអគ្គរដ្ឋទូតថ្មីឡាវប្រចាំកម្ពុជានាថ្ងៃទី ២២ ខែមេសា លោក ប្រាក់ សុខុន រដ្ឋមន្ត្រីការបរទេសបានលើកទឹកចិត្តឱ្យគណៈកម្មការចម្រុះកិច្ចការព្រំដែន (JBC) នៃប្រទេសទាំង ២ ពន្លឿនការចរចាដើម្បីដោះស្រាយខ្សែព្រំដែនពុំទាន់មានខណ្ឌសីមាដែលនៅសេសសល់ចំនួន ១៤ ភាគរយ តាមការឯកភាពរវាងថ្នាក់ដឹកនាំប្រទេសទាំង ២ កាលពីខែវិច្ឆិកា ឆ្នាំ ២០២១។ លោកបានលើកទឹកចិត្តឱ្យ JBC ទាំង ២ ពិភាក្សាលើសេចក្តីព្រាងសន្ធិសញ្ញាកំណត់ព្រំដែនរវាងប្រទេសទាំង ២ ចំពោះខ្សែបន្ទាត់ព្រំដែនដែលបានឯកភាពគ្នារួចហើយចំនួន ៨៦ ភាគរយ។
លោក ហេង គីមគង់ អ្នកស្រាវជ្រាវជាន់ខ្ពស់នៃមជ្ឈមណ្ឌលអភិវឌ្ឍន៍កម្ពុជា ប្រាប់ភ្នំពេញ-ប៉ុស្តិ៍ នាថ្ងៃទី ២៤ ខែមេសាថា វាជារឿងសំខាន់ណាស់ ដែលឡាវ និងកម្ពុជាចាំបាច់ត្រូវព្យាយាមពង្រឹងទំនាក់ទំនងរវាងប្រទេសទាំង ២។ លោកថ្លែងថា៖ «ក្នុងនាមជាប្រទេសជិតខាងប្រទេសទាំង ២ ត្រូវការគ្នាទៅវិញទៅមក ហើយគួរតែស្វែងរកវិធីសាស្ត្រក្នុងការពង្រឹងទំនាក់ទំនងទ្វេភាគីនៅគ្រប់កម្រិត»៕
វីដេអូ៖