.jpg)
ក្មេងៗនៅសហគមន៍ក្រីក្រមួយក្នុងខណ្ឌចំការមន រាជធានីភ្នំពេញកាលពីខែមីនា ឆ្នាំ ២០២១។ ហ៊ាន រង្សី
ភ្នំពេញៈ ក្រសួងសុខាភិបាលបានរៀបចំ «យុទ្ធសាស្ត្រប្រាស្រ័យទាក់ទង ដើម្បីផ្លាស់ប្តូរឥរិយាបថសម្រាប់លើកកម្ពស់អាហារូបត្ថម្ភមាតា ទារក និងកុមារតូចនៅកម្ពុជា» ដើម្បីឈានទៅដល់ការសម្រេចបាននូវគោលដៅកាត់បន្ថយអត្រាក្រិសក្រិនឱ្យបាន ១៩% និងបង្កើនអត្រាការបំបៅដោះកូនតែ ១ មុខគត់ ចាប់ពីកើតដល់អាយុ ៦ ខែឱ្យបាន ៨៥% នៅត្រឹមឆ្នាំ ២០៣០។
យោងតាមអង្គការហេលេន ខេល័រ (Helen Keller) បានឱ្យដឹងកាលពីសប្តាហ៍មុនថា ប្រទេសកម្ពុជាបានទទួលជោគជ័យនៅក្នុងការកាត់បន្ថយអត្រាក្រិសក្រិនពី ៥០% នៅឆ្នាំ ២០០០ មកត្រឹម ៣២% នៅឆ្នាំ ២០១៤ និងបានធ្វើឱ្យប្រសើរទ្បើង នូវស្ថានភាពសុខភាព និងអាហារូបត្ថម្ភមាតា ទារក និងកុមារតូចនាទសវត្សរ៍ចុងក្រោយនេះ។
ទោះជាយ៉ាងណាក៏ដោយ អត្រាក្រិសក្រិននៅតែមានកម្រិតខ្ពស់ (៣២%) បើធៀបនឹងកម្រិតនៃការអភិវឌ្ឍសេដ្ឋកិច្ចរបស់ប្រទេសនេះ។ អង្គការ Helen Keller បានបញ្ជាក់ថា៖ «អត្រាក្រិសក្រិនខ្ពស់នេះ គឺជាកត្តាគំរាមកំហែង និងរាំងស្ទះដល់និរន្តរភាពនៃការអភិវឌ្ឍសេដ្ឋកិច្ច ធនធានមនុស្ស និងការបន្តកំណើនរបស់ប្រទេសនេះផងដែរ។ ការដោះស្រាយបញ្ហាក្រិសក្រិនមានសារៈសំខាន់ និងចាំបាច់ដើម្បីឱ្យកម្ពុជា អាចសម្រេចគោលដៅនៃការអភិវឌ្ឍប្រកបដោយចីរភាពរបស់ខ្លួនត្រឹមឆ្នាំ ២០៣០»។
រដ្ឋលេខាធិការក្រសួងសុខាភិបាលលោកស្រី ប្រាក់ សោភ័ណនារី បានប្រាប់អ្នកសារព័ត៌មានកាលពីថ្ងៃទី ២២ ខែមេសា ថា ក្រសួងសុខាភិបាល សហការជាមួយអង្គការដៃគូនានា ដូចជា Helen Keller, UNICEF, World Bank, WHO, Alive and Thrive និងអង្គការមួយចំនួនទៀត បានរៀបចំបង្កើននូវឯកសារដ៏សំខាន់មួយគឺយុទ្ធសាស្ត្រប្រាស្រ័យទាក់ទង ដើម្បីផ្លាស់ប្តូរឥរិយាបថសម្រាប់លើកកម្ពស់អាហារូបត្ថម្ភមាតា ទារក និងកុមារតូចនៅកម្ពុជាដែលនឹងប្រកាសដាក់ឱ្យប្រើប្រាស់នៅពេលឆាប់ៗខាងមុននេះ។
លោកស្រីបន្ថែមថា យុទ្ធនាការនេះនឹងបង្កើតជាការធ្វើពាណិជ្ជកម្ម ផ្ទាំងរូបភាព ខិត្តប័ណ្ណនិងតាមរយៈរូបភាពជាច្រើនផ្សេងៗទៀត ហើយក៏មានការធ្វើជាយុទ្ធនាការ នៅតាមតំបន់គោលដៅសំខាន់ៗ ក្នុងខេត្តចំនួន ៧ ផងដែរ។ ខេត្តទាំងនោះរួមមាន ខេត្តមណ្ឌលគិរី រតនគិរី ស្ទឹងត្រែង ព្រះវិហារ ក្រចេះ កំពង់ឆ្នាំង និងខេត្តកោះកុងហើយក្រសួងក៏នឹងធ្វើយុទ្ធនាការនេះនៅតាមបណ្តាខេត្តផ្សេងទៀតផងដែរ ក្រោមការឧបត្ថម្ភពីអង្គការដៃគូ។
លោកស្រី ប្រាក់ សោភ័ណនារី មានប្រសាសន៍ថា ៖ «ខេត្ត ៧ ដែលយើងយកមកធ្វើជាគោលដៅសម្រាប់គម្រោងអាហារូបត្ថម្ភនៅកម្ពុជានេះ ដោយសារយើងពិនិត្យលទ្ធផលនៃការអង្កេតឃើញថា ខេត្តទាំងនេះមានអត្រានៃកង្វះអាហារូបត្ថម្ភខ្ពស់ជាងគេ បើធៀបជាមួយនឹងខេត្តផ្សេងៗទៀត ហើយក៏ជាខេត្តដែលមានប្រជាពលរដ្ឋរស់នៅរប៉ាត់រប៉ាយ និងជាតំបន់ដែលមានជនជាតិភាគតិចរស់នៅច្រើនផងដែរ»។
យុទ្ធសាស្ត្រប្រាស្រ័យទាក់ទងដើម្បីផ្លាស់ប្តូរឥរិយាបថសម្រាប់លើកកម្ពស់អាហារូបត្ថម្ភមាតាទារក និងកុមារតូចនេះ ផ្តោតលើអាទិភាពចំនួន ៤ ចំណុច ដែលផ្តល់សារ:សំខាន់លើឱកាសមាស ១ ០០០ ថ្ងៃដំបូងនៃជីវិត ដែលក្នុងនោះមានអាហារូបត្ថម្ភសម្រាប់មាតា ផ្តោតលើការបរិភោគអាហារចម្រុះការបំបៅកូនដោយទឹកដោះម្ដាយ ការផ្ដល់អាហារបន្ថែម និងការតាមដានលើកកម្ពស់ការលូតលាស់ និងការអភិវឌ្ឍទារក និងកុមារតូច។
ទន្ទឹមនឹងនេះដែរ លោក ហ៊ូ ក្រើន នាយរងអង្គការ Helen Keller បានលើកឡើងឱ្យដឹងដែរថា ក្នុងនាមជាដៃគូផ្នែកអាហារូបត្ថម្ភរបស់ក្រសួងសុខាភិបាល លោកមានការគាំទ្រទាំងស្រុងនូវយុទ្ធសាស្ត្រថ្មីនេះ ដែលយុទ្ធសាស្ត្រថ្មីនេះបានរៀបចំឡើងដោយបានគិតគូរល្អិតល្អន់ និងគ្រប់ជ្រុងជ្រោយ លើការប្រែក្លាយពីចំណេះដឹង ទៅជាការអនុវត្តផ្លាស់ប្តូរឥរិយាបថជាក់ស្តែង លើអាហារូបត្ថម្ភរបស់មាតា ទារក និងកុមារ។
លោកមានប្រសាសន៍ថា៖ «ខ្ញុំសង្ឃឹមថា យុទ្ធសាស្ត្រថ្មីនឹងជួយជំរុញនូវការលើកកម្ពស់ស្ថានភាពអាហារូបត្ថម្ភមាតា ទារក និងកុមារឱ្យកាន់តែប្រសើរឡើង នៅពេលខាងមុខ ប្រសិនបើយុទ្ធសាស្ត្រនេះ ត្រូវបានពង្រឹងក្នុងការអនុវត្តឱ្យមានប្រសិទ្ធភាពខ្ពស់នោះ»។
បើតាមលោក ហ៊ូ ក្រើន ការសិក្សាតាមបែបវិទ្យាសាស្ត្របានរកឃើញថា ទំនាក់ទំនង ដើម្បីផ្លាស់ប្ដូរឥរិយាបថតាមរយៈការប្រាស្រ័យទាក់ទងបុគ្គល និងសង្គមគឺមានប្រសិទ្ធភាពខ្ពស់ក្នុងការលើកកម្ពស់ការអនុវត្ត និងការផ្លាស់ប្ដូរទម្លាប់ចិញ្ចឹមទារក និងកុមារតូច ក៏ដូចជាស្ថានភាពអាហារូបត្ថម្ភ និងឥរិយាបថសុខភាពដទៃទៀតដែរ៕
