ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវ និងប្រកាសជាថ្មីទៀត ដោយតម្រូវឱ្យកម្មករ-កម្មការិនី និងប្រជាពលរដ្ឋទាំងអស់នៅទូទាំងប្រទេសត្រូវតែបានចាក់វ៉ាក់សាំងកូវីដ-១៩ ដូសជំរុញ ដែលជាដូសទី ៣ ជាចាំបាច់ ដើម្បីឈានឆ្ពោះទៅដល់ការបន្ធូរបន្ថយទាំងស្រុង ឬ ១ ផ្នែកធំនៃវិធានការសុខាភិបាលសម្រាប់ការពារការឆ្លងនូវជំងឺកូវីដ ១៩។
តាមរយៈសារសំឡេងពិសេសនៅថ្ងៃទី ២៤ មេសាលោក ហ៊ុន សែន ក៏បានស្នើឱ្យលោកស្រី ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) ដោយសហការជាមួយគ្រប់កម្លាំងទាំងអស់បើកយុទ្ធនាការ ដើម្បីចាក់វ៉ាក់សាំងជូនកម្មករ កម្មការិនីនៅគ្រប់រាជធានីខេត្តដែលមានរោងចក្រសហគ្រាស កម្មករសំណង់ កម្មករក្រៅប្រព័ន្ធ និងអ្នករកស៊ីដែលងាយរងនូវហានិភ័យ។
លោកមានប្រសាសន៍ថា៖ «ត្រូវធ្វើយ៉ាងណាឱ្យពួកគាត់មានដូសទី ៣ ហើយប្រសិនបើពួកគាត់ទទួលបានដូសទី ៤ ក៏កាន់តែប្រសើរ។ ប៉ុន្តែអ្វីដែលជាសំណូមពររបស់ខ្ញុំដែលទាបបំផុតគឺចាក់ដូសទី ៣ ហើយដូសទី ៣ នេះយើងនៅសល់មនុស្សប្រមាណជាង ៦ លាននាក់ទៀត ដែលត្រូវចាក់ ដោយសារមកដល់ពេលនេះ យើងចាក់បានរហូតដល់ជាង ៨ លាននាក់ហើយ»។
លោកបន្តថា ការធ្វើបែបនេះគឺដើម្បីពង្រឹងភាពស៊ាំសហគមន៍ និងដើម្បីងាយស្រួលដល់ការបើកទាំងស្រុងហើយដោយគ្មានការត្រឡប់ក្រោយវិញឡើយ ដោយត្រូវរៀនរស់ជាមួយនឹងកូវីដ ១៩។ ជាមួយគ្នានេះ លោកបញ្ជាក់ថា ភាពស៊ាំសហគមន៍បាននាំទៅដល់ការឆ្លងកូវីដ ១៩ មានចំនួនតិចតួចចាប់តាំងពីមុនពិធីបុណ្យចូលឆ្នាំខ្មែរ រហូតមកដល់ពេលនេះ ដោយពុំមានសញ្ញាណាមួយ បង្ហាញពីការឆ្លងរីករាលដាលនោះទេ។
ក្រសួងសុខាភិបាលដាក់ចេញនូវយុទ្ធនាការចាក់វ៉ាក់សាំងកូវីដដូសជំរុញ បន្ទាប់ពីពិធីបុណ្យចូលឆ្នាំមក ដោយចំនួនអ្នកមកទទួលការចាក់វ៉ាក់សាំងបានកើនឡើងចន្លោះពី ៣ ទៅ ៤ ឬ ៥ ដងក្នុង ១ ថ្ងៃដែលគោលដៅ ៣ ធំៗដំបូងដែលបានចាប់ផ្តើមមាននៅតាមរោងចក្រ ទីប្រជុំជន (ផ្សារ) និងសាលារៀន។
លោកស្រី ឱ វណ្ណឌីន ថ្លែងថា ក្នុងយុទ្ធនាការចាក់វ៉ាក់សាំងកូវីដ ១៩ ដូសជំរុញនេះបានផ្តោតទៅលើគោលដៅធំៗដូចជា កម្មករ-កម្មការិនី នៅតាមរោងចក្រ ពលរដ្ឋនៅតាមទីប្រជុំជន ទីផ្សារធំៗ និងតាមសាលារៀន។ ដោយសារចំនួនសិស្សានុសិស្សដែលគាត់បានមកចាក់វ៉ាក់សាំងនេះ ជាពិសេសពីក្រុមអាយុពី ៦ ឆ្នាំដល់ក្រោម ១២ ឆ្នាំនេះ គឺនៅទាប ទើបបានជាក្រសួងផ្តោតយកចិត្តទុកដាក់ទៅលើក្រុមទាំងនោះ។ លោកស្រីថ្លែងថា៖ «ក្រោយពីយើងចាប់ផ្តើមអនុវត្តនូវយុទ្ធសាស្ត្រធ្វើយុទ្ធនាការដោយប្រើប្រាស់កម្លាំងគ្រូពេទ្យកងទ័ព កម្លាំងយុវជនស្ម័គ្រចិត្ត ដែលកំពុងតែប្រតិបត្តិការនៅតាមបណ្តាខេត្តដែលយើងបានបញ្ជូនទៅនេះយើងឃើញថា អ្នកដែលមកទទួលយកការចាក់វ៉ាក់សាំងនេះ មានការកើនឡើងច្រើនមែនទែន»។ បើតាមលោកស្រី ឱ វណ្ណឌីន មុនពេលធ្វើយុទ្ធនាការនេះជាមធ្យមមួយថ្ងៃមានមនុស្សចំនួនប្រមាណពី ៥ ០០០ ទៅ ៧ ០០០ នាក់មកទទួលការចាក់វ៉ាក់សាំងដូសជំរុញ (ទី ៣ និងទី ៤) ប៉ុន្តែក្រោយពីចាប់ផ្តើមធ្វើយុទ្ធនាការនេះ ចំនួនបានហក់ឡើងខុសគ្នា ៣ ទៅ ៤ ដង ឬថ្ងៃខ្លះ រហូតដល់ ៥ ដង។
លោកស្រីបញ្ជាក់ថា៖ «ដូចនេះ វាឡើងពីមធ្យមចំនួន ៥ ០០០ នាក់ក្នុង ១ ថ្ងៃ ទៅជិត ២ ម៉ឺននាក់ ឬថ្ងៃខ្លះលើសពី ២ ម៉ឺននាក់ក្នុង ១ ថ្ងៃ។ នេះគឺជាចំនួនមួយដែលវាមានការស្ទុះឡើងខ្លាំង ហើយខ្ញុំរំពឹងទុកថា បើយើងសម្រុកធ្វើជាបន្តទៀតរហូតដល់ដំណាច់ខែនេះ យើងនឹងអាចផ្តល់នូវវ៉ាក់សាំងនេះដល់បងប្អូនយើងបានមួយចំនួនធំទៀត»។
លោកស្រី លី អៃឡែន តំណាងអង្គការសុខភាពពិភពលោកប្រចាំកម្ពុជាក៏បានលើកឡើងដែរថា ការចាក់វ៉ាក់សាំងកូវីដ-១៩ បានធ្វើដំណើររឹតតែខ្លាំងជាងមុនទៀតជាពិសេសយុទ្ធនាការចាក់ដូសជំរុញ។ លោកស្រីថ្លែងថា៖ «ក្នុងនាមអង្គការសុខភាពពិភពលោក យើងសង្ឃឹមថា យើងនឹងមានឱកាសក្នុងការរៀនសូត្រពីគំរូ (Model) បែបបទជោគជ័យ ដែលប្រទេសកម្ពុជាអាចបង្ហាញទៅដល់ពិភពលោក ថ្នាក់តំបន់... ក្នុងរបៀបថា តើធានាយ៉ាងម៉េច និងត្រូវធ្វើយ៉ាងណា ដើម្បីឱ្យការគ្រប់គ្រងប្រកបដោយនិរន្តរភាព ដើម្បីឆ្លើយតបនឹងជំងឺកូវីដហើយយើងដឹងថា ប្រទេសកម្ពុជាមានបទពិសោធច្រើនក្នុងការចែករំលែកទៅក្នុងថ្នាក់តំបន់ក៏ដូចជាសកលលោក»។
កាលពីនៅថ្ងៃទី ២៤ ខែមេសា វ៉ាក់សាំងកូវីដ ១៩ ប្រភេទ AstraZeneca ជាជំនួយរបស់រដ្ឋាភិបាល និងប្រជាជន អ៊ីតាលីចំនួនជាង ១ លានដូសត្រូវបានដឹកមកដល់កម្ពុជា ហើយពិធីប្រគល់ និងទទួលជាផ្លូវការនឹងធ្វើឡើងនៅថ្ងៃទី ២៥ ខែមេសា ក្រោមអធិបតីភាពលោកនាយករដ្ឋមន្ត្រី ហ៊ុន សែន៕