ភ្នំពេញៈ អគ្គាធិការនៃអគ្គាធិការដ្ឋានក្រសួងមហាផ្ទៃក្រើនរំឭកមន្ត្រីត្រូវពិនិត្យរាល់ឯកសារដែលរដ្ឋបាលរាជធានីខេត្តបំភ្លឺមកក្រសួងឱ្យបានគ្រប់ជ្រុងជ្រោយ បើក្នុងករណីមិនសមស្រប ឬខុសពីកម្មវត្ថុ ឬខ្លឹមសារឱ្យបំភ្លឺនោះ ប្រធាននាយកដ្ឋានជំនាញ ជាពិសេសអគ្គាធិការរងទទួលបន្ទុកអាចចុះអង្កេតជាក់ស្តែង ឬក្រើនរំឭកឱ្យបំភ្លឺម្តងទៀត។
លោក អ៊ីវ លាង អគ្គាធិការនៃអគ្គាធិការដ្ឋានក្រសួងមហាផ្ទៃបានធ្វើការក្រើនរំឭកបែបនេះទៅដល់មន្ត្រីជំនាញ និងអគ្គាធិការរងទទួលបន្ទុក ខណៈលោកដឹកនាំកិច្ចប្រជុំពិភាក្សាកែសម្រួលកំណត់ទម្រង់របាយការណ៍ កំណត់បង្ហាញ និងលិខិតនានារបស់អគ្គាធិការដ្ឋាន នៅថ្ងៃទី ២១ មេសា ឆ្នាំ ២០២២ នៅសាលប្រជុំរបស់អគ្គាធិការដ្ឋាននៃក្រសួងមហាផ្ទៃ។ លោកថ្លែងថា ទម្រង់លិខិតកំពុងប្រើប្រាស់ក្នុងអគ្គាធិការដ្ឋានមានលក្ខណៈល្អប្រសើរ រួមទាំងការរៀបចំខ្លឹមសារ ផងដែរ ប៉ុន្តែមិនទាន់មានទម្រង់តែមួយដូចៗគ្នានៅឡើយតាមនាយកដ្ឋានចំណុះ។ ហេតុនេះក្នុងអង្គភាពតែមួយ គួរណាស់ប្រើប្រាស់ទម្រង់លិខិតតែមួយដូចគ្នា លើកលែងតែខ្លឹមសារនៃលិខិតអាស្រ័យតាមភាពជាក់ស្តែង។
លោកក្រើនរំឭកថា រាល់របាយការណ៍ដែលរាជធានីខេត្តបំភ្លឺមកក្រសួងមហាផ្ទៃ ត្រូវភ្ជាប់ជាមួយនូវឯកសារពាក់ព័ន្ធដើម្បីមានមូលដ្ឋានពិនិត្យផ្ទៀងផ្ទាត់ និងស្នើប្រធាន នាយកដ្ឋានជំនាញ ជាពិសេសអគ្គាធិការរងទទួលបន្ទុក ត្រូវពិនិត្យវិភាគខ្លឹមសារឱ្យបានគ្រប់ជ្រុងជ្រោយ និងហ្មត់ចត់ មិនមែនចេះតែផ្អែកតាមការបំភ្លឺរបស់រាជធានី-ខេត្តនោះទេ។
លោកបញ្ជាក់ថា៖ «បើក្នុងករណី មិនសមស្រប ឬខុសពីកម្មវត្ថុ ឬខ្លឹមសារឱ្យបំភ្លឺនោះ ប្រធាននាយកដ្ឋានជំនាញ ជាពិសេសអគ្គាធិការរងទទួលបន្ទុកអាចលើកយោបល់ថា តើគួរចុះអង្កេតជាក់ស្តែង ឬក្រើនរំឭកឱ្យបំភ្លឺម្តងទៀត»។
លោក អ៊ីវ លាង លើកឡើងពីការងាររដ្ឋបាល ការចាត់ចែងសំណុំរឿង ឬបណ្តឹង និងវគ្គបណ្តុះបណ្តាលផងដែរ។ លោកថ្លែងថា៖ «សម្រាប់វគ្គបណ្តុះបណ្តាលសូមប្រធាននាយកដ្ឋានសហការជាមួយអគ្គាធិការរងទទួលបន្ទុកត្រូវពិនិត្យថា តម្រូវការវគ្គបណ្តុះបណ្តាលអីខ្លះ ដើម្បីឆ្លើយតបឱ្យត្រូវនឹងតម្រូវការទំហំការងារ វិស័យការងារ និងសមត្ថភាពរបស់មន្ត្រី»។
លោកអគ្គាធិការបញ្ជាក់ថា បើចាំបាច់អាចអញ្ជើញគ្រូ ឬអ្នកជំនាញពីខាងក្រៅអង្គភាព មកបង្ហាត់បង្ហាញដល់មន្ត្រី ដែលការបណ្តុះបណ្តាលជាការយកចិត្តទុកដាក់ពីថ្នាក់ដឹកនាំក្រសួង ព្រោះចំណុចនេះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ តែងតែចង្អុលបង្ហាញលើកទឹកចិត្តឱ្យមានការរៀបចំវគ្គបណ្តុះបណ្តាលដល់មន្ត្រី ដើម្បីការបង្កើនចំណេះដឹង និងសមត្ថភាព ដែលជារឿងសំខាន់ ក្នុងការប្រែក្លាយជាធនធានមួយមានសក្ដានុពល និងប្រសិទ្ធភាពការងារតាមអង្គភាព។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាថ្លែងនៅថ្ងៃទី ២៤ ខែមេសាថា ការក្រើនរំឭកនេះជារឿងល្អ ហើយថាជាការកត់សម្គាល់របស់លោកឃើញថា នាពេលកន្លងមកមានក្រសួង ឬអាជ្ញាធរពាក់ព័ន្ធជាច្រើនតែងធ្វើការដាស់តឿនក្រើនរំឭក។ ប៉ុន្តែអភិបាលកិច្ចល្អ ក្នុងសង្គមប្រជាធិបតេយ្យដូចអ្វីដែលរដ្ឋធម្មនុញ្ញជាតិបានចែង គឺប្រសិទ្ធភាព និងប្រសិទ្ធផលនៃការងារ។
លោកថ្លែងថា៖ «ហេតុនេះបើតាមគោលការណ៍អភិបាលកិច្ចល្អ ការងារគួរតែផ្តោតទៅលើគោលនយោបាយទៅលើគោលការណ៍ឱ្យបានច្រើនជាជាងអាស្រ័យពឹងផ្អែកទៅលើការបំភ្លឺរបស់បុគ្គលណាម្នាក់ ឬក៏ក្រុមណាមួយ»៕