ភ្នំពេញៈ មជ្ឈមណ្ឌលសកម្មភាពកំចាត់មីនកម្ពុជា (CMAC) និងតំណាងក្រុមការងារប្រទេសជប៉ុនបានឯកភាពគ្នាលើគោលដៅនៃការចាប់ផ្ដើមអនុវត្ដគម្រោងជាអាទិភាពមួយចំនួនក្នុងនោះមាន គម្រោងរំដោះផ្ទៃដីរងផលប៉ះពាល់ដោយសារគ្រាប់មីននៅខេត្តបាត់ដំបងចំនួន ៩ ៤៥៤ ហិកតា និងគម្រោងជួយសង្គ្រោះជនរងគ្រោះដោយសារមីន តាមរយៈការធ្វើសមាហរណកម្មសេដ្ឋកិច្ចសង្គមក្នុងទំហំទឹកប្រាក់ប្រមាណ ១៧ លានដុល្លារអាមេរិក។
លោក ហេង រតនា ប្រតិភូរាជរដ្ឋាភិបាល និងអគ្គនាយកស៊ីម៉ាក់បានថ្លែងប្រាប់ភ្នំពេញប៉ុស្ដិ៍ នៅថ្ងៃទី ២៤ មេសាថា កាលពីថ្ងៃទី ២២ មេសា លោកតំណាងឱ្យភាគីរាជរដ្ឋាភិបាល-កម្ពុជា និងស្ថានទូតជប៉ុន តំណាងរដ្ឋាភិបាលជប៉ុនមន្ត្រីក្រុមហ៊ុនប្រឹក្សាយោបល់ជប៉ុន CA នៅទីក្រុងតូក្យូបានជួបប្រជុំលើកទី ១ របស់គណៈកម្មការប្រឹក្សាយោបល់នៃគម្រោងសមាហរណកម្មការបោសសម្អាតមីន និងសង្គ្រោះជនពិការដោយសារមីនដំណាក់កាលទី ២ ដោយផ្ទាល់ និងតាមប្រព័ន្ធហ្ស៊ូមនៅទីបញ្ជាការដ្ឋានស៊ីម៉ាក់ ដើម្បីពិភាក្សាលើគម្រោងបោសសម្អាតគ្រាប់មីនដែលគ្រោងនឹងចំណាយថវិកាប្រមាណជិត ១៧ លានដុល្លារក្នុងរយៈពេល ៤ ឆ្នាំ (២០២២-២០២៥)។
លោកថ្លែងថា៖ «ខ្ញុំបានចូលរួមដឹកនាំក្នុងកិច្ចប្រជុំលើកទី ១ តាមប្រព័ន្ធ ZOOM ដោយមានការចូលរួមពីមន្ត្រីស្ថានទូតជប៉ុនប្រចាំកម្ពុជា និងមន្ត្រីក្រុមហ៊ុនប្រឹក្សាយោបល់ជប៉ុន CA នៅទីក្រុងតូក្យូ ដើម្បីពិនិត្យ និងសម្រេចលើផែនការសកម្មភាពការងារដែលនឹងត្រូវអនុវត្តក្នុងគម្រោង»។ ទោះបីមានក្រុមការងារមួយចំនួនស្ថិតនៅទីក្រុងតូក្យូ អ្នកខ្លះនៅភ្នំពេញ ប៉ុន្ដែក្រុមការងារអាចជួបប្រជុំពិភាក្សាគ្នាបានដោយរលូន។
លោកថ្លែងថា គម្រោងសមាហរណកម្មការបោសសម្អាតមីន និងសង្គ្រោះជនពិការដោយសារមីនដំណាក់កាលទី ២ នេះមានថវិកាចំនួន ២ ០០០ លានយ៉េន (ស្នើនឹងប្រមាណជិត ១៧ លានដុល្លារ) ដែលត្រូវអនុវត្តរយៈពេល ៤ ឆ្នាំ (២០២២-២០២៥) សម្រាប់បម្រើគោលដៅសំខាន់ចំនួន ៣ គឺទី១ រំដោះផ្ទៃដីរងផលប៉ះពាល់ដោយសារគ្រាប់មីននៅខេត្តបាត់ដំបងចំនួន ៩ ៤៥៤ ហិកតា។ ទី ២ ទិញគ្រឿងចក្រកម្ទេចមីន និងគ្រឿងបន្លាស់ និងទី ៣ ជួយសង្គ្រោះជនរងគ្រោះដោយសារមីន តាមរយៈការធ្វើសមាហរណកម្មសេដ្ឋកិច្ចសង្គម។ តាមរយៈការប្រជុំនេះក្រុមការងារបានពិនិត្យទៅលើគោលដៅនៃការចាប់ផ្ដើមអនុវត្ដគម្រោង និងការងារអាទិភាពមួយចំនួនទៀត ក៏ដូចជាកម្លាំង សម្រាប់ដំណើការប្រតិបត្ដិការជារួមក្រុមគណៈកម្មការប្រឹក្សាយោបល់នៃគម្រោងសមាហរណកម្មការបោសសម្អាតមីន និងសង្គ្រោះជនពិការដោយសារមីនដំណាក់កាលទី ២ នេះ។
លោកបញ្ជាក់ថា៖ «ក្នុងគម្រោងដែលយើងឯកភាពនោះ គឺយើងមានគម្រោងរំដោះផ្ទៃដីរងផលប៉ះពាល់ដោយសារគ្រាប់មីន នៅខេត្តបាត់ដំបងចំនួន ៩ ៤៥៤ ហិកតា មានរយៈពេល ៤ ឆ្នាំ (២០២២-២០២៥)»។
បើតាមលោក ហេង រតនា ឆ្នាំ ២០២២ នេះ អង្គភាពស៊ីម៉ាក់មានអាយុកាល ៣០ ឆ្នាំ ហើយអង្គភាពស៊ីម៉ាក់បានធ្វើការបោសសម្អាតផ្ទៃដី ចម្ការមីន និងចម្ការគ្រាប់សរុបជាង ១ ៥៦៩ គីឡូម៉ែត្រក្រឡា រុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទជិត ៣ លានគ្រាប់ ក្នុងនោះមីនប្រឆាំងមនុស្សចំនួន ៥៥៤ ២៦១ គ្រាប់ គ្រាប់មីនប្រឆាំងរថក្រោះចំនួន ១១ ២២៣ គ្រាប់ គ្រាប់យុទ្ធភណ្ឌមិនទាន់ផ្ទុះចំនួន ១ ៩០៩ ៧៩៥ គ្រាប់ គ្រាប់បែកទម្លាក់ពីយន្តហោះរួមនិងគ្រាប់បែកចង្កោមចំនួន ៤២៨ ៦៨០ គ្រាប់ និងរកឃើញទីតាំងគ្រាប់បែកគីមីចំនួន ៨៧ ទីតាំង ព្រមទាំងឆ្លើយតបសំណើសុំអន្តរាគមន៍បន្ទាន់ៗបានចំនួន ១១៩ ៧២៨ ករណី។ លទ្ធផលនេះបានចូលរួមចំណែកជាមួយរាជរដ្ឋាភិបាលក្នុងការពង្រឹងសុខសុវត្ថិភាពជូនប្រជាពលរដ្ឋ និងស្តារសេដ្ឋកិច្ចសង្គមឱ្យមានការអភិវឌ្ឍឥតឈប់ឈរ។
លោក រតនា បញ្ជាក់ថា៖ «ក្រៅពីការងារស្នូលរបស់ស៊ីម៉ាក់ក្នុងកិច្ចការបោសសម្អាតមីន និងយុទ្ធភណ្ឌមិនទាន់ផ្ទុះ ព្រមទាំងចូលរួមចំណែកការអភិវឌ្ឍជាមួយរាជរដ្ឋាភិបាល ខ្ញុំក៏តែងតែកៀរគររកជំនួយពីសប្បុរសជន និងមិត្តភក្តិជិតឆ្ងាយឱ្យជួយអភិវឌ្ឍដល់ប្រជាជននៅតាមជនបទ ជាពិសេសជួយអភិវឌ្ឍនៅតំបន់ដែលបានបោសសម្អាតមីនរួច និងជួយសង្គ្រោះជនពិការដោយសារមីន ជាក់ស្ដែងបានជួយកសាងសាលារៀន មណ្ឌលសុខភាព អណ្ដូងទឹក ជីកស្រះទឹក ផ្តល់ការហ្វឹកហ្វឺនជំនាញកសិកម្ម ព្រមទាំងជួយអភិវឌ្ឍហេដ្ឋារចនាសម្ព័ន្ធរូបវន្តជនបទដូចជា ផ្លូវក្រួសក្រហម និងប្រព័ន្ធធារាសាស្ត្រជាដើម»៕