ភ្នំពេញៈ ក្រសួងបរិស្ថាន អង្គការអភិរក្ស រួមទាំងស្ថានទូតអាមេរិកប្រចាំកម្ពុជា និងតារាចម្រៀងផងនោះ បានបង្ហោះសារអបអរសាទរទិវាភពផែនដីកាលពីថ្ងៃទី ២២ ខែមេសា ក្នុងន័យបំផុសឱ្យមានការរួមគ្នាថែរក្សា និងវិនិយោគលើការការពារធនធានធម្មជាតិ និងការអភិរក្សជីវចម្រុះ ជាពិសេសរួមគ្នាធ្វើយុទ្ធនាការ «មនុស្សម្នាក់ដើមឈើ ១ ដើម»។
ក្រសួងបរិស្ថានបានបង្ហោះសារថា សូមអបអរសាទរទិវាភពផែនដី ២២ មេសា ក្រោមប្រធានបទ «វិនិយោគលើភពផែនដីយើង» អមជាមួយនឹងរូបភាពផែនដី ដើមឈើ និងកូនឈើបណ្តុះថ្មីជាច្រើនសន្លឹក។
ដោយឡែក អង្គការ WWF នៅកម្ពុជាវិញ បានសរសេរនៅលើហ្វេសប៊ុកថា ទិវាភពផែនដី ថ្ងៃទី ២២ ខែមេសា «យើងខ្ញុំសូមអំពាវនាវឱ្យមានការចូលរួមបន្ថែមទៀតតាមរយៈសកម្មភាពបុគ្គល ឬសមូហភាព ក្នុងការការពារធនធានធម្មជាតិរបស់កម្ពុជា និងការអភិរក្សជីវចម្រុះដើម្បីជាដំណោះស្រាយមួយដល់ការបង្កើនភាពធន់របស់សហគមន៍យើង ទប់ទល់នឹងហានិភ័យអាកាសធាតុ និងគាំទ្រការអភិវឌ្ឍដោយចីរភាព សម្រាប់យើងគ្រប់គ្នា»។
WWF បានលើកឡើងថា រួមគ្នា! អាចកសាងនូវអនាគតមួយដែលមានបរិស្ថានប្រសើរប្រកបដោយសុខភាពល្អ ដោយចូលរួមទាំងអស់គ្នា អនុវត្តនូវសកម្មភាពមេត្រីភាពបរិស្ថានសម្រាប់ការរស់នៅប្រចាំថ្ងៃកាត់បន្ថយប្រើប្រាស់ឡើងវិញ និងកែច្នៃឡើងវិញ។
លើសពីនេះ ក្នុងឱកាសអបអរទិវាភពផែនដីនេះ អង្គការនេះក៏បានបង្ហាញពីការប្រទះឃើញវត្តមានកូនផ្សោតថ្មី ១ ក្បាលទៀតផងដែរ។
WWF កម្ពុជាបានឱ្យដឹងថា ក្នុងអំឡុងពេលចុះអនុវត្តការស្រាវជ្រាវតាមដងទន្លេមេគង្គ ក្រុមអ្នកជំនាញស្រាវជ្រាវ និងតាមដានសត្វផ្សោតនៃរដ្ឋបាលជលផល និងអង្គការមូលនិធិសកលសម្រាប់អភិរក្សធម្មជាតិ WWF បានកត់ត្រាតាមរយៈរូបថតនៅថ្ងៃទី ២២ ខែមេសានូវវត្តមានរបស់កូនផ្សោតថ្មី ១ ក្បាលខណៈពេលវាកំពុងហែលជាមួយផ្សោតធំៗ ៩ ក្បាលទៀតក្នុងដែនជម្រកធម្មជាតិនៃអន្លង់សត្វផ្សោតកាំពីនៃខេត្តក្រចេះ។
ក្រុមអ្នកស្រាវជ្រាវបានប៉ាន់ប្រមាណថា សត្វផ្សោតថ្មីនេះ មានអាយុទើបតែ ៥ ថ្ងៃប៉ុណ្ណោះ ហើយថា ជាកូនសត្វផ្សោតទី ២ សម្រាប់ឆ្នាំ ២០២២ នេះ។
សត្វផ្សោតទន្លេមេគង្គត្រូវបានចាត់ថ្នាក់ក្នុងបញ្ជីក្រហមរបស់អង្គការ IUCN ជាប្រភេទសត្វរងគ្រោះថ្នាក់ជិតផុតពូជបំផុត។
លទ្ធផលនៃជំរឿនសត្វផ្សោតទន្លេមេគង្គក្នុងឆ្នាំ ២០២០ ដោយរដ្ឋបាលជលផល និងអង្គការ WWF បានបង្ហាញថា មានសត្វផ្សោតចំនួនត្រឹមតែ ៨៩ ក្បាលប៉ុណ្ណោះដែលកំពុងរស់នៅក្នុងទន្លេមេគង្គកម្ពុជា។
ដោយឡែកដើម្បីអបអរទិវាភពផែនដីនេះ គម្រោង USAID Greening Prey Lang-ព្រៃឡង់បៃតង ក៏បានអំពាវនាវផងដែរឱ្យពលរដ្ឋចូលរួមយុទ្ធនាការ «មនុស្សម្នាក់ដើមឈើ ១ ដើម»។
គម្រោងនេះបានសរសេរនៅលើហ្វេសប៊ុកថា «អ្នកណាថា មនុស្សម្នាក់មិនមានឥទ្ធិពលក្នុងការផ្លាស់ប្តូរដ៏ល្អសម្រាប់ផែនដីរបស់យើង? សកម្មភាពរបស់មនុស្សម្នាក់រួមបញ្ចូលគ្នាបង្កើតបានជាសមិទ្ធផលរាប់លានរហូតដល់រាប់ពាន់លាន»។
តោះ!ចូលរួមជាមួយពួកយើងនៅក្នុងយុទ្ធនាការ «មនុស្សម្នាក់ ដើមឈើ ១ ដើម» ដើម្បីអបអរទិវាភពផែនដីឆ្នាំ ២០២២ ដើម្បីបង្ហាញការតាំងចិត្តចូលរួមការពារភពផែនដីរបស់យើង...រួមគ្នាយើងអាចការពារផែនដីរបស់យើង។
នៅក្នុងទិវានេះ ឯកអគ្គរដ្ឋទូតសហរដ្ឋអាមេរិក លោក W.Patrick Murphy ក៏ដូចជា តារាចម្រៀងមួយចំនួន រួមមាន កញ្ញា មាស សុខសោភា លោក ឆន សុវណ្ណរាជ និង Rainne Dara ក៏បានចូលរួមក្នុងយុទ្ធនាការ «មនុស្សម្នាក់ដើមឈើ ១ ដើម» ផងដែរ។
ស្ថានទូតសហរដ្ឋអាមេរិកបានសរសេរថា អ្នកអាចចូលរួមយុទ្ធនាការនេះ និងបង្ហាញការតាំងចិត្តចូលរួមការពារភពផែនដីរបស់យើងដោយបង្ហោះរូបថត ឬវីដេអូដែលអ្នកដាំ ឬការពារដើមឈើ។ សូមប្រើ hashtag#OnePersonOneTree និង #EarthDay2022 ទាំងអស់គ្នា យើងអាចការពារផែនដីរបស់យើងបាន។
លោក W.Patrick Murphy បានលើកឡើងថា ក្នុងឱកាសទិវាភពផែនដីឆ្នាំ ២០២២ នេះ ក្នុងការចូលរួមជាមួយនឹងមិត្ដ-កម្ពុជារបស់ខ្ញុំក្នុងយុទ្ធនាការ «មនុស្សម្នាក់ ដើម្បីឈើ ១ ដើម»។ លោកថា យុទ្ធនាការរបស់យើងគាំទ្រសារ «វិនិយោគលើផែនដីរបស់យើងនៃទិវារបស់ភពផែនដីទូទាំងពិភពលោក។
លោកថ្លែងថា៖ «សកម្មភាពរបស់យើងម្នាក់ៗក្នុងការការពារភពផែនដីរបស់យើងមានឥទ្ធិពលយ៉ាងខ្លាំង។ ចូលរួមជាមួយយើងថ្ងៃនេះ ដើម្បីការពារ ឬដាំដើមឈើ ១ ដើម»។
លោកបានបង្ហាញពីការចូលរួមនេះថា ពួកលោកបានដាំដើមឈើមួយចំនួនរួចហើយនៅក្នុងគេហដ្ឋានរបស់លោកសម្រាប់អ្នកដែលត្រូវមកស្នាក់នៅបន្តនាពេលអនាគត។ លោកថា៖ «យើងទាំងអស់គ្នាអាចបង្កើតការផ្លាស់ប្ដូរសម្រាប់ផែនដីរបស់យើងបាន»។
កញ្ញា មាស សុខសោភា នៅក្នុងទិវានេះដែរ បានបង្ហាញអារម្មណ៍រំភើបរីករាយ ដោយបានបញ្ជាក់ថា ថ្ងៃនេះកញ្ញាបានដាំដើមឈើ ១ ដើមទៀត ដើម្បីចូលរួមនៅក្នុងយុទ្ធនាការមនុស្សម្នាក់ដើមឈើ ១ ដើម។
កញ្ញាបានថ្លែងថា៖ «អ៊ីចឹង អ្នកទាំងអស់គ្នាអាចចូលរួមលេងជាមួយនឹងពួកយើងទាំងអស់គ្នាបានណា ហើយផូស្តនៅលើបណ្ដាញសង្គមរបស់អ្នកទាំងអស់គ្នារៀងៗខ្លួន ដើម្បីបង្ហាញអំពីការស្រឡាញ់ ខ្វាយខ្វល់ទៅលើធនធានធម្មជាតិរបស់យើង។ ពួកយើងដឹងហើយថាធម្មជាតិ គឺជាអ្នកជួយយើងពិសេសដើមឈើ ១ ដើមនេះបានជួយជាម្លប់ដល់មនុស្សទាំងឡាយ ហើយបានជួយកាត់បន្ថយផ្សែងពុល សារធាតុពុលនៅក្នុងទីក្រុង និងជួយកាត់បន្ថយនូវបញ្ហាគ្រោះធម្មជាតិផងដែរ»៕