.jpg)
ពិធីចុះហត្ថលេខារវាងអាជ្ញាធរមីននិងមូលនិធិមនុស្សធម៌ Golden West ពីថ្ងៃទី២៥ មេសា ។ រូបថត អាជ្ញាធរមីន
ពិធីចុះហត្ថលេខានេះបានប្រព្រឹត្តទៅនៅទីស្នាក់ការអាជ្ញាធរមីននិងចុះហត្ថលេខាដោយលោក ព្រំ សុភមង្គល អគ្គលេខាធិការអាជ្ញាធរមីននិងលោក Len Austin តំណាងប្រចាំប្រទេសកម្ពុជានៃមូលនិធិមនុស្សធម៌ Golden West នាថ្ងៃទី២៥ ខែមេសា។
លោកលី ធុជ ទេសរដ្ឋមន្ត្រី និងជាអនុប្រធានទី១អាជ្ញាធរមីនថ្លែងក្នុងពិធីនេះថាអាជ្ញាធរមីននៅតែត្រូវការជំនួយអន្តរជាតិដើម្បីធ្វើទំនើបកម្មជំនាញបច្ចេកទេសនិងច្នៃប្រឌិតការបោសសម្អាតមីនតាមបែបបច្ចេកវិទ្យានិងធ្វើស្តង់ដាចំណេះដឹងនិងវិជ្ជាជីវៈរបស់ប្រតិបត្តិករ។ភាពជាដៃគូយុទ្ធសាស្ត្រនេះនឹងលើកកម្ពស់ការអភិវឌ្ឍការស្រាវជ្រាវ និងជួយបណ្ដុះបណ្ដាលជំនាញបន្ថែមទៀតក្នុងការស្វែងរកបញ្ហាប្រឈម។
លោក លី ធុជ បញ្ជាក់ថា៖«ពិធីចុះហត្ថលេខាលើភាពជាដៃគូនេះនឹងចូលរួមជួយលើកកម្ពស់ទំនើបនីយកម្មលើជំនាញបច្ចេកទេសនិងការច្នៃប្រឌិតក្នុងការងារបោសសម្អាតមីនតាមបច្ចេកវិទ្យាទំនើបនាពេលបច្ចុប្បន្នដែលនឹងផ្តល់នូវសុវត្ថិភាពកាន់តែខ្ពស់បន្ថែមទៀតសម្រាប់អ្នកដោះមីននិងកាន់តែមានប្រសិទ្ធភាពនិងរហ័សជាមុនក្នុងការរំដោះផ្ទៃដីជូនប្រជាពលរដ្ឋ»។
លោកបញ្ជាក់ថា កម្ពុជា នឹងពង្រឹងការអនុវត្តការស្រាវជ្រាវបច្ចេកវិទ្យាថ្មីៗបន្ថែមទៀតក្នុងការចូលរួមដោះស្រាយបញ្ហាមីនព្រមទាំងជួយផ្តល់នូវវឌ្ឍនភាពលើមធ្យោបាយស្រាវជ្រាវសម្រាប់វិស័យមីនមនៅកម្ពុជាដែលភាពជាដៃគូនេះ នឹងជួយពន្លឿនឲ្យកម្ពុជាឆាប់សម្រេចនូវគោលដៅរបស់ខ្លួនផងដែរ។
លោកថ្លែងថា៖«យើងត្រូវការជំនាញពីមូលនិធិមនុស្សធម៌Golden Westជាចាំបាច់នៅក្នុងប្រទេសកម្ពុជា ហើយយើងជឿជាក់យ៉ាងមុតមាំថាការបន្តគាំទ្ររបស់ Golden West នឹងជួយយើងឱ្យសម្រេចបាននូវគោលដៅរបស់យើងកាន់តែលឿន មានសុវត្ថិភាព និងមានប្រសិទ្ធភាពជាងមុន»។
លោកបន្តថា៖ «យើងសង្ឃឹមថានឹងឃើញមានការអភិវឌ្ឍជំនាញថ្មីៗនិងបច្ចេកវិទ្យាថ្មីៗបន្ថែមទៀតដែលត្រូវដាក់បញ្ចូលទៅក្នុងសកម្មភាពមីន ដែលអាចឱ្យប្រតិបត្តិកររបស់យើងអាចបំពេញភារកិច្ចឱ្យអស់ពីសមត្ថភាព»។
លោក លី ធុជ ថ្លែងថា នេះគឺជាសមិទ្ធផលថ្មីមួយសម្រាប់កម្ពុជាក្នុងការធ្វើជាគំរូដឹកនាំពិភពលោកក្នុងនាមជាប្រទេសដែលមានជំនាញច្រើនហើយបន្តសម្របខ្លួនទៅនឹងបច្ចេកវិទ្យានិងវិធីសាស្ត្រថ្មីៗដែលមានមូលនិធិមនុស្សធម៌ Golden West នឹងជួយអាជ្ញាធរមីនចំពោះការបន្តកិច្ចខិតខំប្រឹងប្រែងក្នុងសកម្មភាពមីន។
គួរបញ្ជាក់ថា មូលនិធិមនុស្សធម៌Golden West គឺជាអង្គការសប្បុរសធម៌មិនស្វែងរកប្រាក់ចំណេញដែលមានមូលដ្ឋាននៅសហរដ្ឋអាមេរិកដែលមានការប្តេជ្ញាចិត្តក្នុងការអភិវឌ្ឍបច្ចេកវិជ្ជាច្នៃប្រឌិត ការបណ្តុះបណ្តាល និងបច្ចេកទេសដែលប្រើប្រាស់ដើម្បីបង្កើនប្រសិទ្ធភាពជាសកលនៃសហគមន៍សកម្មភាពមីនមនុស្សធម៌។
Golden West បានធ្វើការជាមួយរដ្ឋាភិបាលកម្ពុជា ទីភ្នាក់ងារបោសសម្អាតមីនមនុស្សធម៌របស់ខ្លួន និងកងយោធពលខេមរភូមិន្ទ ចាប់តាំងពីខែមីនា ឆ្នាំ២០០៥។
លោក Len Austin ថ្លែងក្នុងពិធីនេះថា៖«តាមរយៈការចុះMoU នេះ និងភាពជាដៃគូជាមួយអាជ្ញាធរមីនយើងនឹងអាចបង្កើនសមត្ថភាពដើម្បីដោះស្រាយតម្រូវការរបស់សហគមន៍សកម្មភាពកំចាត់មីនកម្ពុជានិងធានាបាននូវការផ្សព្វផ្សាយកាន់តែទូលំទូលាយនិងការអនុវត្តនវានុវត្តន៍ដើម្បីសង្គ្រោះជីវិតនិងថែរក្សាទ្រព្យសម្បត្តិនៅក្នុងប្រទេសកម្ពុជា»។
លោកបន្តថាភាពជាដៃគូរវាងអាជ្ញាធរមីននិងGolden West នឹងនាំមកនូវការច្នៃប្រឌិតនិងរូបរាងថ្មីអំពីវិធីសាស្ត្រនៃផ្តល់ការបណ្តុះបណ្តាលនិងការគាំទ្រដល់អ្នកដោះមីន អ្នកបច្ចេកទេសបោសសម្អាតយុទ្ធភណ្ឌមិនទាន់ផ្ទុះ ការគ្រប់គ្រងនិងបុគ្គលិកគាំទ្រដែលមិនត្រឹមតែចំពោះអ្នកនៅក្នុងប្រទេសកម្ពុជាប៉ុណ្ណោះទេថែមទាំងទៅកាន់ពិភពលោកផងដែរ។
លោកLen Austin ថ្លែងថា៖ «យើងនឹងខិតខំធ្វើឱ្យព្រះរាជាណាចក្រកម្ពុជាក្លាយជាមជ្ឈមណ្ឌលឧត្តមភាពពិតប្រាកដសម្រាប់ពិភពលោកបានឃើញនិងយកគំរូតាមក្នុងសកម្មភាពដោះមីនមនុស្សធម៌»៕
