ភ្នំពេញៈ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុថ្លែងថា វិស័យអប់រំកម្ពុជាកំពុងបោះជំហានទៅរកទម្រង់នៃការអប់រំតាមបែបឌីជីថលដែលទម្រង់នេះកំពុងឆ្លើយតបយ៉ាងប្រត្យក្ស ទៅនឹងក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជាឆ្នាំ ២០២១-២០៣៥។
លោក អូន ព័ន្ធមុនីរ័ត្ន ថ្លែងដូចនេះនៅក្នុងពិធីបើកសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា ២០២០-២០២១ និងលើកទិសដៅឆ្នាំសិក្សា ២០២១-២០២២ នៅវិទ្យាស្ថានបច្ចេកវិទ្យាកម្ពុជាកាលពីថ្ងៃទី ២៥ មេសា ២០២២។
លោកថ្លែងថា តាមរយៈរបាយការណ៍របស់លោក ហង់ជួន ណារ៉ុន រដ្ឋមន្ត្រីក្រសួងអប់រំ លោកសូមកោតសរសើរដ៏ស្មោះចំពោះថ្នាក់ដឹកនាំក្រសួងអប់រំ អង្គភាពក្រោមឱវាទ មន្ទីរអប់រំ រាជធានី-ខេត្ត និងគ្រឹះស្ថានសិក្សាទាំងអស់ ដែលបានខិតខំបំពេញការងារយ៉ាងសកម្មដោយធានាបាននូវសុវត្ថិភាពល្អចំពោះសុខុមាលភាពរបស់បុគ្គលិក អប់រំ និងធានាបាននូវនិរន្តរភាពនៃការសិក្សារបស់សិស្សានុសិស្ស និងនិស្សិត ក្នុងអំឡុងពេលប្រយុទ្ធប្រឆាំងនឹងជំងឺកូវីដ ១៩ ក៏ដូចជា បានដំណើរការឆ្នាំសិក្សាថ្មី ២០២១-២០២២ មកទល់ពេលនេះ។
លោកថ្លែងថា៖ «ខ្ញុំពិតជារីករាយ និងមានមោទនភាពខ្ពស់ ដោយបានកត់សម្គាល់ឃើញថា វិស័យអប់រំកំពុងបោះជំហានទៅរកទម្រង់នៃការអប់រំតាមបែបឌីជីថលដែលទម្រង់នៃការអប់រំបែបនេះកំពុងឆ្លើយតបយ៉ាងប្រត្យក្ស ទៅនឹងក្របខ័ណ្ឌគោលនយោបាយសេដ្ឋកិច្ច និង សង្គមឌីជីថលកម្ពុជាឆ្នាំ ២០២១-២០៣៥»។
លោកបញ្ជាក់ថា ការប្រែក្លាយវិបត្តិទៅជាកាលានុវត្តភាពនាពេលនេះ ពិតជាមានសារៈសំខាន់ណាស់ ដោយសារយុវជនយើងកំពុងត្រូវការសេវាអប់រំតាមបែបថ្មី ទំនើប និងមានគុណភាពកម្រិតខ្ពស់ ជាពិសេសនៅពេលមានការកើនឡើងយ៉ាងឆាប់រហ័សនៃការប្រើប្រាស់បច្ចេកវិទ្យា និងប្រព័ន្ធអ៊ីនធឺណិតជាដើម។
បើតាមលោក អូន ព័ន្ធមុនីរ័ត្ន ការអភិវឌ្ឍសមត្ថភាព និងទទួលផលពីបច្ចេកវិទ្យាទាំងនេះ ប្រកបដោយប្រសិទ្ធភាព និងវៃឆ្លាត គឺជាកត្តាចាំបាច់ ដើម្បីធានានូវឧត្តមភាពប្រៀបធៀបរបស់កម្ពុជានៅក្នុងតំបន់ និងសកលលោក។
លោកបានបញ្ជាក់ថា៖ «ខ្ញុំពិតជាគាំទ្រដល់គំនិតផ្តួចផ្តើមនៃការអប់រំតាមបែបឌីជីថល ដើម្បីពង្រឹងសមត្ថភាពផ្នែក អក្ខរកម្មឌីជីថលដល់សិស្ស និស្សិត និងយុវជន ក្នុងគោលបំណងទាញប្រយោជន៍ពីសេដ្ឋកិច្ចឌីជីថល និងធ្វើឱ្យយុវជនជំនាន់ក្រោយមានលទ្ធភាពគ្រប់គ្រាន់ក្នុងការទាញយកប្រយោជន៍ពីបច្ចេកវិទ្យាថ្មីៗ និងទីផ្សារឌីជីថល»។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ថ្លែងក្នុងពិធីបើកសន្និបាតនេះថា គិតត្រឹមឆ្នាំសិក្សា ២០២១-២០២២ សាលាមត្តេយ្យសិក្សា និងគ្រឹះស្ថានសិក្សាចំណេះទូទៅទាំងសាធារណៈ និងឯកជនមានចំនួន ១៨ ៤៣០ ក្នុងនោះមត្តេយ្យសិក្សាសហគមន៍ចំនួន ៣ ០៨៣ គ្រឹះស្ថានសិក្សាចំណេះទូទៅសាធារណៈចំនួន ១៣ ៦៨១ និងគ្រឹះស្ថានសិក្សាឯកជនចំនួន ១ ៦៦។ រីឯសិស្សសរុបមានចំនួន ៣ ៥៨៩ ០២៥ នាក់ សិស្សស្រី ៥០,៤ ភាគរយ។
ចំណែកគ្រឹះស្ថានឧត្តមសិក្សាសរុបមានចំនួន ១៣០ ក្នុងនោះគ្រឹះស្ថានឧត្តមសិក្សាសាធារណៈមាន ៤៨ និងគ្រឹះស្ថានឧត្តមសិក្សាឯកជនបាន ៨ ដោយមាននិស្សិតកំពុងសិក្សាសរុបចំនួន ១៩៨ ៣៦៣ នាក់ ក្នុងនោះមានស្រី ៤៩,៧ ភាគរយ។
លោកថ្លែងថា៖ «ថ្វីដ្បិតដំណើរការរៀន និងបង្រៀនក្នុងរយៈពេល ២ ឆ្នាំកន្លងមក ត្រូវបានអាក់ខានដោយអន្លើ ដោយសារវិបត្តិកូវីដ ១៩ ក្រសួងអប់រំ យុវជន និងកីឡាបានបន្តអនុវត្តកម្មវិធីកំណែទម្រង់ និងបានប្រែក្លាយវិបត្តិកូវីដ ១៩ ទៅជាឱកាស»។
លោកបានឱ្យដឹងថាឆ្នាំ ២០២២ នេះ សន្និបាតអប់រំបានដាក់ចេញវិធានការកែទម្រង់វិស័យអប់រំដំណាក់កាលទី ៣ គឺការកសាងប្រព័ន្ធ និងការអភិវឌ្ឍសមត្ថភាពដោយដាក់ឱ្យអនុវត្តអភិក្រមស្តីពីការគ្រប់គ្រងផ្ដោតលើលទ្ធផល ឆ្ពោះទៅរកការដោះស្រាយបញ្ហាជាលក្ខណៈប្រព័ន្ធ និងតាមបែបអនុវិស័យ។
លោកបន្តថា សន្និបាតអប់រំបានសម្រេចដាក់ចេញវិធានការ ការពង្រឹងប្រព័ន្ធគ្រប់គ្រងអប់រំដោយត្រូវរួមបញ្ចូលគ្នានូវការពិនិត្យឡើងវិញមុខងារ និងភារកិច្ច ការរៀបចំផែនការប្រចាំឆ្នាំ ការអនុវត្តគន្លងអាជីព ការអភិវឌ្ឍសមត្ថភាព និងការពិនិត្យតាមដាន និងវាយតម្លៃ... ដោយបើប្រាស់ប្រព័ន្ធរង្វាយតម្លៃការបំពេញការងារប្រចាំឆ្នាំ។
លោកស្រី Foroogh Foyouzat តំណាងអង្គការយូនីសេហ្វប្រចាំកម្ពុជាថ្លែងក្នុងពិធីបើកសន្និបាតនេះដែរថា ដូចឆ្នាំមុនៗដែរ សន្និបាតអប់រំផ្ដល់ឱកាសសម្រាប់អ្នកពាក់ព័ន្ធទាំងបុគ្គលិកអប់រំនៅថ្នាក់ជាតិ និងនៅថ្នាក់ក្រោមជាតិ សាលារៀន និងក្រុង/ស្រុក/ខណ្ឌទូទាំងប្រទេស ដើម្បីកែលម្អការផ្តល់សេវាអប់រំដោយផ្ទាល់ហើយចូលរួមពិភាក្សាគ្នា ដើម្បីពង្រឹងគោលនយោបាយ និងប្រព័ន្ធអប់រំទាំងមូល។
លោកស្រីបានថ្លែងថា៖ «សន្និបាតអប់រំឆ្នាំនេះ វេទិកាថ្នាក់ជាតិ ថ្នាក់រាជធានី/ខេត្ត និងសាលារៀន ដែលនឹងត្រូវបានធ្វើឡើងក្នុងរយៈពេលប៉ុន្មានថ្ងៃខាងមុខនេះ នឹងពិភាក្សាអំពីបញ្ហាអប់រំសំខាន់ៗជាច្រើនជាមួយអ្នកពាក់ព័ន្ធក្នុងវិស័យអប់រំ។ ខ្ញុំទន្ទឹងរង់ចាំស្ដាប់នូវទស្សនៈផ្សេងៗដែលនឹងត្រូវចែករំលែកជាផ្នែកមួយនៃកិច្ចពិភាក្សាទាំងនេះ..»។
បើតាមលោកស្រី Foroogh Foyouzat ក្នុងចំណោមសមិទ្ធផលជាច្រើនទាក់ទងនឹងការឆ្លើយតបនឹងជំងឺកូវីដ ១៩ គឺការបង្កើតបរិយាកាសសិក្សាប្រកបដោយសុវត្ថិភាពនៅសាលារៀនជាមួយនឹងការផ្ដល់ការរៀនពីចម្ងាយអំឡុងពេលបិទសាលា និងការដាក់ឱ្យប្រើប្រាស់ឡើងវិញនូវកញ្ចប់សិក្សាបំប៉នបន្ថែមសម្រាប់ការរៀន និងបង្រៀន។ លោកស្រីថាជាមួយនឹងការបើកសាលារៀនឡើងវិញ និងកិច្ចខិតខំប្រឹងប្រែងយ៉ាងសកម្មទាំងនេះបានធ្វើឱ្យកុមារអាចបន្តការសិក្សាដោយរលូនប្រកបដោយសុវត្ថិភាពនៅដើមឆ្នាំសិក្សាថ្មីដែលបានចាប់ផ្ដើមពីថ្ងៃទី ១០ ខែមករាឆ្នាំ ២០២២។
លោកស្រីបន្ថែមថា ដោយមានការអនុវត្តយ៉ាងតឹងរ៉ឹងនូវស្តង់ដាប្រតិបត្តិលើសុខភាព និងសុវត្ថិភាពនៅតាមសាលារៀននីមួយៗ សាលារៀនស្ទើរតែទាំងអស់នៅតែបើកដំណើរការ ទោះបីជាមានការរីករាលដាលជាបន្តបន្ទាប់ពីជំងឺកូវីដ-១៩ ក៏ដោយ។ នេះបានបង្ហាញឱ្យឃើញម្តងទៀតថា សាលារៀនមិនមែនជាកត្តាជំរុញសំខាន់នៃការឆ្លងជំងឺកូរីដ ១៩ ហើយការរៀននៅក្នុងថ្នាក់រៀនគឺអាចធ្វើទៅបានដោយសុវត្ថិភាព។
លោកស្រីថ្លែងថា៖ «ខ្ញុំសូមអបអរសាទរ ចំពោះការយកចិត្តទុកដាក់របស់ក្រសួងក្នុងការបង្កើតបរិយាកាសសិក្សាប្រកបដោយសុវត្ថិភាព និងជំរុញឱ្យសាលាបន្តបើកដំណើរការ»៕