ភ្នំពេញៈ ប្រធានព្រឹទ្ធសភា លោក សាយ ឈុំ និងប្រធានរដ្ឋសភាឥណ្ឌា លោក អំ បឺរឡា (Om Birla)លើកឡើងថា ទំនាក់ទំនង និងកិច្ចសហប្រតិបត្តិការ កម្ពុជា-ឥណ្ឌា ត្រូវបានពង្រឹង និងពង្រីកយ៉ាងជិតស្និទ្ធដោយចាត់ទុក វិស័យនានារវាងប្រទេសទាំង ២ មានការរីកចម្រើនឥតឈប់ឈរ។
ការលើកឡើងដូច្នេះ ក្នុងជំនួបរវាងភាគីទាំង ២ នាថ្ងៃទី ២២ មេសា ក្នុងឱកាស លោក អំ បឺរឡា មកបំពេញទស្សនកិច្ចនៅកម្ពុជាពីថ្ងៃទី ២១-២៤ ខែមេសា។ សេចក្តីប្រកាសព័ត៌មានរដ្ឋសភាពកម្ពុជាបញ្ជាក់ នាថ្ងៃទី ២៥ មេសា ថា៖ «សម្តេចវិបុលសេនាភក្តី សាយ ឈុំ បានសម្តែងនូវសេចក្តីរីករាយដែលបានឃើញនូវទំនាក់ទំនង និងកិច្ចសហប្រតិបត្តិការដ៏ល្អលើគ្រប់វិស័យរវាងប្រជាជន និងប្រទេសទាំង ២ ដែលមានការរីកចម្រើនឥតឈប់ឈរ»។
លោក សាយ ឈុំ ថ្លែងថា ឥណ្ឌា បានគាំទ្រឯករាជភាពរបស់កម្ពុជាក្នុងទសវត្សរ៍ទី ៥០ និងជាប្រទេសដំបូងដែលទទួលស្គាល់សាធារណរដ្ឋប្រជាមានិតកម្ពុជាក្នុងទសវត្សរ៍ទី ៨០។ ប្រទេសឥណ្ឌាក៏បានបញ្ជូនកងទ័ពមួកខៀវ ក្រោមឆត្រអង្គការសហប្រជាជាតិមកជួយថែរក្សាសន្តិភាពនៅប្រទេសកម្ពុជាក្នុងបេសកកម្មរបស់អ៊ុនតាក់ផងដែរ។ កន្លងមក រដ្ឋសភា ព្រឹទ្ធសភា និងរដ្ឋាភិបាលឥណ្ឌាបានជួយអភិវឌ្ឍ ធនធានមនុស្សរបស់អគ្គលេខាធិការដ្ឋានព្រឹទ្ធសភា តាមរយៈការផ្តល់អាហារូបករណ៍រយៈពេលខ្លីមធ្យមទៅរៀននៅប្រទេសឥណ្ឌា។
ប្រភពដដែលស្រង់សម្តីលោក អំ បឺរឡា ថា៖ «ក្នុងរយៈពេល ៧ ទសវត្សរ៍កន្លងទៅ ប្រទេសឥណ្ឌាមានទំនាក់ទំនង និងកិច្ចសហប្រតិបត្តិការយ៉ាងជិតស្និទ្ធជាមួយប្រទេសកម្ពុជា»។
កាលពីឆ្នាំ ២០១៦ អគ្គលេខាធិការដ្ឋានព្រឹទ្ធសភាកម្ពុជា និងអគ្គលេខាធិការដ្ឋានព្រឹទ្ធសភាឥណ្ឌា បានចុះអនុស្សរណៈយោគយល់គ្នាផងដែរ។ ឆ្នាំ ២០២២ នេះ គឺជាឆ្នាំនៃការប្រារព្ធខួបលើកទី ៣០ នៃទំនាក់ទំនងអាស៊ាន-ឥណ្ឌា លោក អំ បឺរឡា បានអញ្ជើញថ្នាក់ដឹកនាំសភារបស់អាស៊ានបំពេញទស្សនកិច្ចនៅប្រទេសឥណ្ឌា ក្នុងនោះលោកក៏បានអញ្ជើញលោក សាយ ឈុំ ផងដែរ។
នាជំនួបថ្ងៃទី ២២ មេសានោះដែរ លោក ហេង សំរិន ប្រធានរដ្ឋសភា និងលោក អំ បឺរឡា បានជូនពរឱ្យចំណងមិត្តភាព និងសាមគ្គីភាពកម្ពុជា-ឥណ្ឌា ស្ថិតស្ថេរយូរអង្វែង និងឱ្យប្រទេសទាំង ២ ទទួលបាននូវវឌ្ឍនភាព សេចក្តីសុខចម្រុងចម្រើនជារៀងរហូតតទៅ។
លោក ហេង សំរិន ចាត់ទុកដំណើរទស្សនកិច្ចរបស់លោក អំ បឺរឡា បញ្ចប់ដោយផ្លែផ្កាជាច្រើនក្នុងការពង្រឹងចំណងមិត្តភាព និងកិច្ចសហប្រតិបត្តិការកាន់តែស៊ីជម្រៅ និងគ្រប់ជ្រុងជ្រោយរវាងស្ថាប័ននីតិប្បញ្ញត្តិក៏ដូចជានីតិប្រតិបត្តិ និងប្រជាជនប្រទេសទាំង ២។
តាមសេចក្តីប្រកាសព័ត៌មានដដែល ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា សព្វព្រះរាជហឫទ័យក្នុងការបន្តរឹតចំណងមិត្តភាពកម្ពុជា-ឥណ្ឌា ព្រមទាំងបានថ្លែងអំណរគុណចំពោះឥណ្ឌា ដែលបានបន្តជួយឧបត្ថម្ភគាំទ្រកម្ពុជា។
ការជួយឧបត្ថម្ភរបស់ឥណ្ឌា រួមមានការអភិវឌ្ឍសេដ្ឋកិច្ចសង្គម ការជួយអភិរក្សប្រាង្គប្រាសាទ ការផ្តល់ជំនួយមនុស្សធម៌ សង្គ្រោះ ប្រជារាស្ត្រកម្ពុជាដែលទទួលរងគ្រោះដោយទឹកជំនន់ ការផ្តល់វ៉ាក់សាំង និងសម្ភារជួយទប់ស្កាត់ការរីករាលដាលនៃជំងឺកូវីដ ១៩ សាលាក្ដីខ្មែរក្រហម ការជួយគាំទ្រ ដំណើរការបោះឆ្នោត និងវិស័យសំខាន់ៗជាច្រើនទៀត រួមចំណែកជួយលើកកម្ពស់ជីវភាពសុខុមាលភាពប្រជារាស្ត្រ និងធ្វើឱ្យការស្ថាបនានៅកម្ពុជា មានការរីកចម្រើនជឿនលឿនដោយឥតឈប់ឈរ។
សេចក្តីប្រកាសបន្តថា៖ «ព្រះអង្គបានសព្វព្រះរាជហឫទ័យរំភើបរីករាយចំពោះការរីកចម្រើននៃទំនាក់ទំនងមិត្តភាពរវាងកម្ពុជា-ឥណ្ឌា ក្នុងរយៈពេលដ៏យូរលង់កន្លងមក ដែលបានរួមសុខ រួមទុក្ខជាមួយគ្នា និងបានបង្កើតកិច្ចសហប្រតិបត្តិការលើគ្រប់វិស័យ ដើម្បីនាំមកនូវផលប្រយោជន៍រួមសម្រាប់ប្រជាជាតិនៃប្រទេសយើងទាំង ២ ដែលនាំ មកនូវគុណប្រយោជន៍យ៉ាងធំធេង ក្នុងការបន្តជំរុញឱ្យចំណងសាមគ្គីភាព និងកិច្ចសហប្រតិបត្តិការទ្វេភាគីលើគ្រប់វិស័យរបស់ប្រជាជាតិនៃប្រទេសយើងទាំង ២ កម្ពុជា-ឥណ្ឌា កាន់តែទទួលបាននូវភាពរីកចម្រើន ថ្កុំថ្កើង និងជិតស្និទ្ធថែមទៀត»។
ស្ថានទូតឥណ្ឌានៅកម្ពុជាបញ្ជាក់ នាថ្ងៃទី ២៥ មេសា ថា ក្នុងជំនួបជាមួយលោក សាយ ឈុំ លោក អំ បឺរឡា លើកឡើងថា៖ «យើងផ្តល់តម្លៃចំពោះទំនាក់ទំនងរបស់យើង ដោយផ្អែកលើប្រវត្តិសាស្ត្ររួមវប្បធម៌រស់រវើក និងទំនាក់ទំនងរវាងប្រជាជន និងប្រជាជន»៕