.jpg)
រដ្ឋមន្ត្រីសុខាភិបាល និងអាជ្ញាធរខេត្តកំពង់ស្ពឺបង្ហាញមុងជ្រលក់ថ្នាំក្នុងពិធីពីថ្ងៃទី ២៤ មេសា។ រូបថត រដ្ឋបាលខេត្តកំពង់ស្ពឺ
ភ្នំពេញៈ នៅក្នុងខួបលើកទី ៥០ នៃឱសថអាតេមីស៊ីនីន និងវេទិកាសហប្រតិបត្តិការអន្តរជាតិ ដើម្បីកសាងសហគមន៍នៃសុខភាពទូទៅ សម្រាប់មនុស្សជាតិ នៅថ្ងៃទី ២៥ ខែមេសា លោកនាយករដ្ឋមន្ត្រី ហ៊ុន សែន បានលើកឡើងថា កម្ពុជានឹងបន្តកិច្ចសហប្រតិបត្តិការជាមួយគ្រប់តួអង្គ ពិសេសចិន ដើម្បីលុបបំបាត់ជំងឺគ្រុនចាញ់។
លោក ហ៊ុន សែនក៏បានបង្ហាញពីការគាំទ្រ ចំពោះគ្រប់សកម្មភាព និងកិច្ចសហប្រតិបត្តិការ ដែលបាននិងកំពុងអនុវត្ត ដើម្បីកសាងសហគមន៍នៃសុខភាពទូទៅសម្រាប់មនុស្សជាតិ ជាពិសេសការលុបបំបាត់ជំងឺគ្រុនចាញ់ តាមរយៈការប្រើប្រាស់ឱសថអាតេមីស៊ីនីន ខណៈក្នុងរយៈពេល ៤ ឆ្នាំចុងក្រោយនេះ កម្ពុជាមិនមានអ្នកស្លាប់ដោយសារជំងឺគ្រុនចាញ់ឡើយ។
លោកមានប្រសាសន៍ថា៖ «សម្រាប់ទិសដៅទៅអនាគតកម្ពុជានឹងបន្តពង្រឹងកិច្ចសហការជាមួយគ្រប់តួអង្គពាក់ព័ន្ធទាំងអស់ ជាពិសេសសាធារណរដ្ឋប្រជាមានិតចិន តាមរយៈគំនិតផ្តួចផ្តើមខ្សែក្រវាត់ និងផ្លូវ កិច្ចសហប្រតិបត្តិការមេគង្គ-ឡានឆាង និងមូលនិធិជំនួយសហប្រតិបត្តិការត្បូង-ត្បូងប្រទេសចិន ជាដើម ដើម្បីឈានទៅលុបបំបាត់ជំងឺគ្រុនចាញ់ទាំងស្រុង»។
ជាមួយគ្នានេះដែរ លោកនាយករដ្ឋមន្ត្រីក៏បានបង្ហាញពីការគាំទ្រចំពោះគ្រប់សកម្មភាព និងកិច្ចសហប្រតិបត្តិការដែលបាននិងកំពុងអនុវត្តដើម្បីកសាងសហគមន៍នៃសុខភាពទូទៅ សម្រាប់មនុស្សជាតិ ជាពិសេសការលុបបំបាត់ជំងឺគ្រុនចាញ់ តាមរយៈការប្រើប្រាស់ឱសថអាតេមីស៊ីនីន។
សម្រាប់ប្រទេសកម្ពុជាដែលស្ថិតក្នុងមហាអនុតំបន់ទន្លេមេគង្គ ធ្លាប់មានជំងឺគ្រុនចាញ់ជាង ១៧ ម៉ឺនករណី និងស្លាប់ជិត ១ ០០០ នាក់ នាទសវត្សរ៍ឆ្នាំ ៨០ ប៉ុន្តែក្នុងឆ្នាំ ២០២១ កន្លងទៅ ជំងឺគ្រុនចាញ់បានថយចុះមកនៅចំនួន ៣ ៩៥៩ ករណី និងគ្មានការស្លាប់រយៈពេល ៤ ឆ្នាំចុងក្រោយ បើទោះជាប្រឈមនឹងការលំបាកដោយសារការរីករាលដាលនៃជំងឺកូវីដ ១៩ ក៏ដោយ។
សមិទ្ធផលដ៏ត្រចះត្រចង់នេះ កើតចេញពីការអនុវត្តនូវយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ ២០១១-២០២៥ របស់រាជរដ្ឋាភិបាល ដែលមានទិសដៅយុទ្ធសាស្ត្រចំនួន ៤ រួមមាន ការធ្វើរោគវិនិច្ឆ័យ និងព្យាបាលឱ្យបានរហ័ស ព្យាបាលដោយប្រើថ្នាំអាតេមីស៊ីនីន ឱ្យបានត្រឹមត្រូវតាមរូបមន្តដើម្បីបញ្ចៀសភាពស៊ាំរបស់ថ្នាំនេះ បង្ការការចម្លងមេរោគគ្រុនចាញ់ដោយប្រើប្រាស់មុងជ្រលក់ថ្នាំ និងការងារអប់រំលើកកម្ពស់សុខភាព ដោយមានការចូលរួមពីគ្រប់ផ្នែកពាក់ព័ន្ធទាំងអស់ ជាពិសេសការចូលរួមរបស់ប្រជាពលរដ្ឋ។
លោកបន្ថែមថា ទន្ទឹមនេះដែរ ប្រសិទ្ធភាពនៃការអនុវត្តយុទ្ធសាស្ត្រជាតិ គឺការផ្សារភ្ជាប់ដោយភាពទន់ភ្លន់ និងបត់បែន តាមយុទ្ធសាស្ត្រសកល និងតំបន់ ព្រមទាំងរៀនសូត្រដកស្រង់បទពិសោធពីគ្នាទៅវិញទៅមក។ លោក ហ៊ុន សែន បានបញ្ជាក់ថា៖ «ខ្ញុំក៏សូមអំពាវនាវដល់ភាគីពាក់ព័ន្ធទាំងអស់បន្តជំរុញកិច្ចសហប្រតិបត្តិការផ្អែកលើទំនុកចិត្ត ភាពជាដៃគូដោយយកប្រជាជនជាស្នូល និងមូលដ្ឋានពហុភាគីនិយម ដើម្បីឈានឆ្ពោះទៅសម្រេចទស្សនវិស័យ ពិភពលោកគ្មានជំងឺគ្រុនចាញ់ឆ្នាំ ២០២៥»។
លោក វ៉ី សំណាង អភិបាលខេត្តកំពង់ស្ពឺបានថ្លែងក្នុងទិវាជាតិប្រយុទ្ធនឹងជំងឺគ្រុនចាញ់កាលពីថ្ងៃទី ២៤ ខែមេសា ក្រោមប្រធានបទ «រួមគ្នាអនុវត្តគន្លងសកម្មភាពថ្មីៗឈានទៅកាត់បន្ថយបន្ទុកជំងឺគ្រុនចាញ់សកល ដើម្បីលើកកម្ពស់សុខុមាលភាព» ថា ស្ថានភាពគ្រុនចាញ់នៅទូទាំងខេត្តកំពង់ស្ពឺនាប៉ុន្មានឆ្នាំចុងក្រោយនេះ បានថយចុះគួរឱ្យកត់សម្គាល់។
លោកបានថ្លែងថា ក្នុងខេត្តកំពង់ស្ពឺ ស្ថានភាពជំងឺគ្រុនចាញ់បានថយចុះក្នុងរង្វង់ ៥៥% រៀងរាល់ឆ្នាំ ចាប់តាំងពីឆ្នាំ ២០១៩ មក។ ក្នុងនោះនៅឆ្នាំ ២០១៩ មាន ៥ ៥៣៤ ករណី ឆ្នាំ ២០២០ មាន ២ ៤៦៩ ករណី និងឆ្នាំ ២០២១ មានចំនួន ១ ២២១ ករណី ហើយដោយឡែកករណីគ្រុនចាញ់សន្ធំ និងចម្រុះបានថយចុះក្នុងរង្វង់ ៧០% រៀងរាល់ឆ្នាំផងដែរ។
លោក វ៉ី សំណាង បន្តថា ក្នុងត្រីមាសទី ១ ឆ្នាំ ២០២២ នេះនិន្នាការនៃជំងឺគ្រុនចាញ់ក៏មានការថយចុះដែរ គឺមានចំនួន ១៩៩ ករណីក្នុងនោះ ប្រភេទគ្រុនចាញ់សន្ធំ និងចម្រុះមានចំនួន ២៧ ករណី និងប្រភេទលាប់ចំនួន ១៧២ ករណី៕
