.jpg)
លោកនាយករដ្ឋមន្ត្រី ហ៊ុន សែន។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន កំពុងតែពិនិត្យទៅលើលទ្ធភាពនៃការចាក់វ៉ាក់សាំងកូវីដ ១៩ ដូសទី៥ សម្រាប់មន្រ្តីជួរមុខ ដើម្បីបង្កើនភាពសុំា កាន់តែច្រើន ប៉ុន្តែអ្វីដែលលោកនៅតែអំពាវនាវ និងចង់បានបំផុតនោះ គឺសុំឱ្យប្រជាពលរដ្ឋមកទទួលយកនូវវ៉ាក់សាំងដូសទី៣ ឱ្យបានគ្រប់ៗគ្នា សម្រាប់ប្រជាពលរដ្ឋប្រមាណជាជាង ៦ លាននាក់ទៀត។
លោកនាយករដ្ឋមន្រ្តីបានថ្លែងដូចនេះ តាមរយៈសារសំឡេងពិសេសនាព្រឹកថ្ងៃទី ២៦ ខែមេសានេះ ដោយលោកក៏បានបញ្ជាក់ផងដែរថា បើទោះបីជាមិនមានអ្នកណាចាក់ដូសទី៣ នេះក៏ដោយ ក៏មិនត្រូវបានទទួលនូវការផាកពិន័យឬដាក់ទណ្ឌកម្មនោះដែរ ប៉ុន្តែវាគឺជាការការពារនូវសុខភាព សុខុមាលភាពរបស់ប្រជាពលរដ្ឋម្នាក់ៗ និងក្រុមគ្រួសារតែប៉ុណ្ណោះ។
លោកបានថ្លែងថា៖ «ការតម្រូវឱ្យមានការចាក់ដូសទី៣ នេះ ក៏អាចចាត់ទុកថា ជាកាតព្វកិច្ចដែលខាងផ្នែកសុខភាពរបស់យើង តម្រូវឱ្យចាក់ដូសទី៣ នេះ ដើម្បីរក្សានូវភាពធន់នៃសុខភាពរបស់យើងដែរ និងការចូលរួមចំណែកក្នុងការការពារនៃការឆ្លងមេរោគកូវីដ ១៩»។
ទន្ទឹមនឹងនេះដែរ លោក ហ៊ុន សែន ក៏បានថ្លែងដោយលោកបានធ្វើការលើកទឹកចិត្តដល់ប្រជាពលរដ្ឋឱ្យធ្វើតេស្តរហ័សរកមេរោគកូវីដ ១៩ ហើយក្នុងករណីមានការសង្ស័យ ត្រូវដាក់ខ្លួនឱ្យនៅដាច់ដោយឡែក និងត្រូវធ្វើការព្យាបាល បើមានការរកឃើញឆ្លងជំងឺនេះ៕
